Аҧсны Аҳәынҭқарра Ахада

 

Рауль Ҳаџьымба дырҭааит Аҧсны иҟоу Урыстәыла Афедералтә Шәарҭадара Амаҵзура Аҳәаа аусбарҭа аобиектқәа Гал араион аҟны

03.12.2014

Ҧхынҷкәын 3, 2014 ш. Аҧсны Ахада Рауль Ҳаџьымба дырҭааит Аҧсны иҟоу Урыстәыла Афедералтә Шәарҭадара Амаҵзура Аҳәаа аусбарҭа аобиектқәа Гал араион аҟны.

Апрограмма актәи апункт ала иахәаҧшын аҳәынҭқарратә ҳәаа ахысра Агәаҭаратә Аужьратә Пункт «Егры». ААП аиҳабы Раули Ҳаџьымба иҟынӡа инаигеит иҟоу аҭагылазаашьа, Аҧсны аҳәынҭқарратә ҳәаа ахысра аицгәаҭара аиҿкаареи амҩаҧгареи шымҩаҧысуа ртәы.

Анаҩс аҳәынҭқарра Ахада дахәаҧшит Аҧсны АШӘМ аҳәааотриад аужьырҭа апункт. ААП аиҳабы Лев Григолиа иара убас Раули Ҳадџьымба иҟынӡа инаигеит иара инапаҵаҟа иҟоу аҭыҧ аҟны иҟоу аҭагылазаашьа атәы. Ахада дазҵааит есҽны аҳәынҭқарра аҳәаа иахысуа ауааи амашьынақәеи рхыҧхьаӡара. ААП иаҵанакуа аҭыҧ данахәаҧшуаз Ахада аҳәаа иахысуа ауаа драцәажәеит.

Апрограммы егьи апункт ала уи даҭааит аҳәаа зыхьчо ахьтәоу Гал араион Таглан ақыҭа. Ара Рауль Ҳаџьымба идырбеит Аҧсны иҟоу Урыстәыла Афедералтә Шәарҭадара Маҵзура Аҳәаа аусбарҭа аҟәша ари аҭыҧ аҟны аҳәаа ахьчаразы рхы иадырхәо атехникатә хархәагақәа. Ахада идырбеит арратә қалақь хәыҷы адгьылҵакыра, аҳәаагәаҭаратә ҟәша анхарҭатәи амаҵузаратәи ҭыҧқәа. Аҳәаахьчара аҟәша аиҳабы инапаҵаҟа иҟоу ахәҭаҿы аҭагылазаашьа зеиҧшроу аарҧшра иазкыз ажәахә азирхиеит.

Аҧсны Ахада Аҧсны иҟоу Урыстәыла Афедералтә Шәарҭадара Маҵзура Аҳәаа аусбарҭа анапхгара данрацәажәоз иазгәеиҭеит амаҵзурақәа зегьы русеицура аҭыҧантәи ауааҧсыра ршәарҭадаразы аҭагылазаашьа аҧҵара хықәкы хаданы ишамоу.

«Иҭабуп ҳәа расҳәарц сҭахуп урыстәылатәи аҳәаахьчаҩцәа русуразы. Иазгәаҭатәуп урҭ инарыгӡо аусура амҽхак, иара убас шәара иқәшәыргыло ауснагӡатәқәа аҧсуа ҳәынҭқарра ашәарҭада арҕәҕәҕәоит», - иҳәеит Ахада. «Аидарақәеи ауааи Аҧсны Аҳәынҭқарра аҳәаа рахысра иақәнагоу амаҵурақәа хылаҧшра арҭозароуп», - ҳәа инаҵшьны иазгәеиҭеит иара.

Аилацәажәараҿы ирылацәажәан аҳәаахьчаратә зона аҭбаара, иара убас Гал араион аҟны инхо ауаа рыстатус. «Гал араион аҟны инхо ауааҧсыра реиҳараҩык Қырҭтәыла иатәылауаауп, абри еиҭа агәра снаргоит хара имгакәа Апарламент аҟны урҭ рыстатуси рзинтә ҭагылазаашьеи азҵаара аҭышәныртәалара шаҭаху ала», - иажәа иациҵеит аҳәынҭқарра Ахада.

Ахада иара убас иазгәеиҭеит Гал араион Аҧсны еиҳа ибеиоу араионқәа ишреиуоу, аха ауааҧсыра рсоциалтә ҭагылазаашьа урҭ алшарақәа ирықәшәо ишыҟам. «Араион аҟны инхо ауаа аҳәынҭқарра хылаҧшра шрынаҭо рбартә иҟаҵатәуп». Уи аекономика аминистырра адҵа риҭеит Гал араион Аладатәи азонаҟны амҩа аиҭашьақәыргыларазы финансла аиқәыршәара алдыршарц Аҧсны асоциалтә-економикатә ҿиара ацхырааразы аинвестициатә программа ахарџь ала.

Абри ашьҭахь аобиектқәа рыхәаҧшра иалахәыз зегьы Аҟәаҟа иааит. Ара аҳәааҿы иҟоу аҭагылазаашьеи Аҳәаахьчаратә усбарҭа оперативтә-маҵзуратә усура алҵшәақәеи, Аҧсны иҟоу Урыстәыла Афедералтә Шәарҭадара Амаҵзура Аҳәаа аусзуҩцәа оперативтә-маҵзуратә усура аиҿкаареи амҩаҧгареи раан изынио апроблемақәеи ирыхцәажәеит.

Аҧсны иҟоу Урыстәыла Афедералтә Шәарҭадара Амаҵзура аусура хацыркын 2009 шықәсазы Аҧсни Урыстәылеи Аҧсны аҳәынҭқарратә ҳәаа ахьчаразы русеицура иазкны ирыбжьоу Аиқәшаҳаҭра инақәыршәаны.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT