Валери Бганба Аҧсны Аҳәынҭқарра Ахада имаҵурақәа рынагӡарахь инеира иазку аилатәараҟны иқәгылара

Ҳаҭыр зқәу Аҧсны Аҳәынҭқарра Хадас иалху, ҳаҭыр зқәу Аҧсны Жәлар Реизара адепутатцәа, аҩызцәа, асасцәа.

Ҳазну ашықәс хәажәкырамза 22 рзы имҩаҧысит Аҧсны Аҳәынҭқарра ахада иалхрақәа. Ари ахҭыс иаԥхьанеиуан даара иуадаҩыз аполитикатә процессқәа. Убарҭ ирыхҟьаны усҟан атәыла ахадас иҟаз Рауль Ҳаџьымба иусура аанижьит. Имариамызт абарҭ апроцессқәа азакәан мҩа рықәҵара, аха ҳара иҳалшеит урҭ риааира. Сара иҭабуп ҳәа расҳәар сҭахуп Аҧсны Жәлар Реизара адепутатцәа, аминистрцәа, аполитикатә партиақәа рактивқәа. Дара иуадаҩыз аҭагылазаашьаан рхымҩаҧгашьа, ааԥсарак ҟамҵакәа имҩаԥыргоз аиҿцәажәарақәа, аиҧыларақәа ирылҵшәахеит алхратә процесс азакәан иахымҧо, адемократиатә принципқәа инарықәыршәаны амҩаԥысра.

Даараӡа иҭабуп ҳәа расҳәар сҭахуп аҳәынҭқарра ахада иалхразы кандидатцәас иқәгылаз. Урҭ азакәангьы иахымҧеит, раҧсуарагьы аадырҧшит.
Аҧсуа ҳәынҭқарра аҿиара мҩа иануп, аха уи амҩа хра аманы иҟаларц, шьҭахьҟа ихьамҵразы иаҭахуп аҩныҵҟатәи аҭынчра. Абас патуеиқәҵарала имҩаҧысыз алхрақәа ҳгәыӷра дырӷәӷәоит аилибакаара шеиҳахо азы, ҳамч, ҳдырра аҳәынҭқарра аргылара ишадаҳҵо азы.
Ҿыц иалху аҳәынҭқарра Ахада иахьа имоуп аҭагылазаашьа ажәлар, аполитикцәа еидикылартә, иааникылартә ауааԥсыра реиҩшара. Уи идызҵаз, игәра згаз ажәлар роуп. Дахьӡаратәы агәамч изеиӷьаҳшьоит.

Акыр иаҧсоу аҩызцәа!

Иахьатәи аныҳәатә церемониа иалахәуп Аҧсны Жәлар Реизара адепутатцәа, Аконституциатә ӡбарҭа аӡбаҩцәа, иалху Ахада ихаҭыҧуаҩ Бадра Зураб-иҧа Гәынба, Алхратә комиссиа хада анапхгара, 2020 ш. Аҧсны ахадарахьы алхразы акандидатцәа, аилатәара иалахәуп иара убас ҳҩызцәа  – Аҧсны Аҳәынҭқарраҟны иҟоу  Урыстәылатәи Афедерациа Аҷыдалкаатәи Азинмчызмоуи ацҳаражәҳәаҩ  Алеқсеи Аркади-ҧа Двинианин, Аҧсны Аҳәынҭқарраҟны иҟоу Алада Уаҧстәыла Аҷыдалкаатәи Азинмчызмоуи ацҳаражәҳәаҩ Олег Илиа-иҧа Боциев, Аҧсны Аҳәынҭқарраҟны иҟоу Приднестровиатәи Молдавиатәи Ареспублика аофициалтә хаҭарнак Гарри Сергеи-иҧа Кәупалба.




Возврат к списку