Аҧсны Аҳәынҭқарра Ахада

 

Аслан Бжьаниа Владимир Путин ихьӡала ацҳамҭа дәықәиҵеит

26.03.2020

Иалху Аҧсны Аҳәынҭқарра Ахада Аслан Бжьаниа Урыстәылатәи Афедерациа Ахада Владимир Путин ихьӡала ацҳамҭа дәықәиҵеит.

Ацҳамҭаҟны, ҷыдала, иҳәоуп:

«Гәык-ҧсыкала иҭабуп ҳәа шәасҳәар сҭахуп Аҧсны Аҳәынҭқарра Ахада имаҵурахьы салхра инамаданы сыхьӡала иаашәышьҭыз адныҳәалартә аацҳамҭазы.

Аҧсни Урыстәылеи ирыбжьоу аидгыларатә еизыҟазаашьақәа алшара дуқәа рымоуп ҿҳәара дула наҟ-ааҟ феида аманы аҿиаразы. Ҳара ахә ҳаракны иаҳшьоит Аҧсны Аҳәынҭқарра ашьақәгылара апроцесс, аҳәынҭқарратә суверенитети жәларбжьаратәи апозициақәеи рырҕәҕәараҟны Шәара хаҭала шәлагала. Урыстәылатәи Афедерациа анапхгара аганахьала иҟоу ганрацәалатәи адгылара иқәыҧшу ҳҳәынҭқарра аҿаҧхьа иқәгылоу ашәарҭарақәа риааира алнаршоит акыр.
Сара сганахьала исҳәарц сҭахуп Аҧсны Аҳәынҭқарра анапхгара ҿыц аҳәынҭқаррабжьаратә усеицура ахырхарҭақәа зегьы рыла ҳтәылақәа рыбжьара иҟоу аиамадара аҧхьаҟагьы арҕәҕәареи аизырҳареи хықәкыс ишамоу.

Ари аҭагылазаашьа схы иархәаны, ҳаҭыр зқәу Владимир Владимир-иҧа, ишәзеиҕьасшьар сҭахуп агәабзиара, агәамч, аҭакҧыхқәра зцу шәусураҟны аринахысгьы аихьӡарақәа».


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org