Аҧсны Аҳәынҭқарра Ахада

 

Ахада Аҧсны Жәлар Реизара – Апарламент ашҟа аҳәынҭқкарра Ахада имаҵура шаанижьуазы адокумент ишьҭит

12.01.2020

Ажьырныҳәамза 12 рзы Аҧсны Аҳәынҭқарра Ахада Рауль Ҳаџьымба Аҧсны Жәлар Реизара – Апарламент ашҟа аҳәынҭқкарра Ахада имаҵура шаанижьуазы адокумент ишьҭит.

Адокумент аҟны иазгәаҭоуп Ахада имаҵура шаанижьуа атәылаҟны аҭынчреи аҭышәынтәалареи реиқәырхаразы.

Рауль Ҳаџьымба Аҧсны жәлар рышҟа ааҧхьара ҟаиҵеит телехәаҧшрала:

«Акыр иаҧсоу ҳауаажәлар!

Ишыжәбо еиҧш, арҭ амшқәа рзы Аҧсны аҭагылазаашьа акырӡа иуадаҩын. Иҟан аимак-аиҿак – ауаажәларратә-политикатә зҵаарақәа рыкәша-мыкәша. Урҭ рзы сара сгәаанагара сҳәон, иагьысҳәоит иаахтны – ҳажәлари ихьыҧшым Аҧсны Аҳәынҭқарреи ҧхьаҟатәи рлахьынҵа, рҧеиҧш ҳасаб азуны.

Исылшо зегьы ҟасҵон, иҟасҵоит иҟамларцазы аиҿагылара, избанзар ҳажәлар ирхыргахьеит имаҷымкәа атрагедиақәа, арыцҳарақәа. Ҳара ҳазхәыцроуп ҳҭоурых, ҳазнысыз амҩа, шаҟаҩ рхы ақәырҵаз иахьа иҳамоу ахақәиҭра. Сара сашьҭоуп алхрақәа ракәу, аҳәынҭқарратә система аиқәырхара акәу – зегьы азакәани, азини, Аконституциеи рымҩала имҩаҧысларц. Даҽа мҩак – ишәарҭоу мҩоуп! Имаҷым иҳалшаз, ҳзыхьӡаз, зегьы шәымчала, ажәлар зегьы рымчала. Ирацәоуп ҳазхьымӡазгьы. Аха сгәанала, агәкажьра аҭахым, аҧсҭазаара ҧхьаҟа ицоит. Иҟалароуп аҭынчра, аилибакаара. Уаҳа ҧсыхәа шыҟам аабароуп зегьы, избанзар ҳазегь жәларык ҳауп, адунеи зегьы рылаҧш ҳхуп.

Иҭабуп ҳәа шәасҳәоит сеилызкааз, исыдгылаз, ҳзеиҧш усқәа рҿы апринципра аазырҧшыз! Иара убас ҳаҭыр сзақәуп досу игәаанагара, амчраҿы дыҟазаргьы, аоппозициаҿы дыҟазаргьы.

Ҳазҭалаз аныҳәамш – ашықәс ҿыц азы ишәзеиҕьасшьоит агәамч, агәалаҟара бзиа!

Анцәа ду илаҧш агымхааит Аҧсны аҵеира ршьала, рфырхаҵала иаагоу ҳ-Аҧсуа ҳәынҭқарра! Сара сыуаажәлар сшәылагылоуп, шәхьаа – схьаауп, шәгәыҕра саргьы исгәыҕроуп! Сыҧсадгьыл аҿы сыҟоуп, уи аҧеиҧш азы аринахысгьы исылшо зегьы ҟасҵалоит».


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT