Аҧсны Аҳәынҭқарра Ахада

 

Ахада Витали Мутко дидикылеит

18.12.2019

Ахада Витали Мутко дидикылеит

 
Ҧхынҷкәынмза 18 рзы Аҧсны Аҳәынҭқарра Ахада Рауль Ҳаџьымба Аҧсны Аҳәынҭқарреи Урыстәылатәи Афедерациеи рыбжьара асоциалтә-економикатә еимадаразы Аиҳабырабжьаратә комиссиа аилатәара аҽалархәразы Аҧсны Аҳәынҭқарра усуратә визитла иаҭааз Урыстәылатәи Афедерациа Аиҳабыра Ахантәаҩы ихаҭыҧуаҩ Витали Мутко дидикылеит.

Витали Мутко Рауль Ҳаџьымба иҭабуп ҳәа иаиҳәеит иҟаиҵаз адкыларазы.

«Иҭабуп аҧхарра зҵаз аиҧыларазы. Ҳара ҳарҭааит Гагра, Афон ҿыц, Аҟәа иҟаз асоциалтә, аинфраструктуратә, анџьныртә обиектқәа. Иааидкыланы зегьы рыҩаӡара бзиоуп. Ҳаззааҭгылаз азҵаарақәа рацәоуп, иара убас ҧхынҷкәынмзазы ихыркәшахо ҳапрограмма иазкызгьы. 2020-2022 ш.ш. рызтәи апрограмма инықәырҧшны еиқәыршәоуп, иара убас ирзааҭгылан егьырҭ азҵаарақәагьы. Ауниверситет аҿы иаҳбаз-иҳаҳаз агәахәара ҳнаҭеит, аҿар ҳрацәажәеит. Аҿар азҵаара бзиақәа ҳарҭеит, аҳәарақәа ҟарҵеит. Ҳахәаҧшит аспорттә комплексгьы, уи лассы аиҭашьақәыргылара ацхыраара аҭаразы ҳаицәажәеит», - иҳәеит Витали Мутко.

Ахада иазгәеиҭеит Аиҳабырабжьаратә комиссиа аилатәараҿы аҧхьаҟатәи Асоциалтә-економикатә ҿиара ацхраарзы аинвестициатә программаҟны иазгәаҭоу аусмҩаҧгатәқәа рылацәажәара иамоу аҵакы, иара убас уи аҧхьатәи аусмҩаҧгатәқәа рынагӡара аихшьалақәа рзыҟаҵара.

«Хымҧада, ҳара ҳзы акраҵанакуеит ихадараны иҟоу, Аинвестпрограммаҿы иарбоу аусмҩаҧгатәқәа рынагӡара. Убри аангьы 2018-2019 шықәсқәа рзы имҩаҧгоу аусурақәа рыхцәажәарагьы, иара убас 2020-2022 шықәсқәа рзы имҩаҧаҳгараны иҟоу аусмҩаҧгатәқәагьы ҳарзааҭгылароуп. Ари Аҧсны арҿиара иацхраауеит, афинанстә лшарақәа реизырҳаразы аҭагылазаашьақәа аҧнаҵоит»,- иҳәеит Ахада.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org