Ахада Ауаажәларратә палата алахәразы акандидатцәа дырҧылеит

Ахада Ауаажәларратә палата алахәразы акандидатцәа дырҧылеит

Абҵарамза 5 рзы Аҧсны Аҳәынҭқарра Ахада Рауль Ҳаџьымба Ахада иквота иазкны Ауаажәларратә палата алахәразы акандидатцәа злахәыз аиҧылара мҩаҧигеит.

Аиҧылараан ирылацәажәан Ауаажәларратә палатеи аҳәынҭқарратә мчхара аусбарҭақәеи русеицура, иара убас Ауаажәларратә палата ароль арҕәҕәареи рызҵаарақәа.

«Ауаажәларратә палатаҟны ишьҭырхуаз азҵаарақәа аҵак ду рыман. Ауаажәларратә палата аусурала Аиҳабыреи ауаажәларреи русеицура алыршатәуп хымҧада. Изныкымкәа ауаажәларратә палата алахәцәеи ҳареи ҳаиқәшәахьан. Иуадаҩыз азҵаарақәа маҷымкәа абра ирылацәажәан, аҳәынҭқарратә бызшәа азҵаара, аиҳабыреи аоппозициеи реизыҟазаашьақәа уҳәа убас егьырҭгьы. Сара есқьынгьы Ауаажәларратә палата аус ацура сазхиоуп, иарбан зҵааразаалакгьы, ихьанҭоу азҵаарақәагьы налаҵаны. 

Аҳәынҭқарра аҧсҭазаараҟны Ауаажәларратә палата ароли аҵаки есааира ишьҭыхлатәуп», – иҳәеит Ахада.

Аҳәынҭқарра Ахада иара убас иҳәеит аҭҵаарадырратә усбарҭақәеи Ауаажәларратә палатеи рхаҭарнакцәа алархәны азакәанапроектқәа аҧхьанатәтәи рыҧхьара аидеиа адгылара шаиҭо.

Ауаажәларратә палата ҧасатәи ааҧхьарақәа рылахәҩы Сократ Џьынџьал иазгәеиҭеит Ауаажәларратә палата адгылара аҭара шаҭаху уи иазнархио абжьгарақәа аҳәынҭқарратә усбарҭақәа ахәаҧшразы ирыдыркылаларц азы.

«Аҧышәа иаҳнарбеит Ауаажәларратә палата аусура иамоу аҵакы. Даҽа усуп, уи абжьгарақәа шынагӡахо. Ари, ҳара еснагь ҳаззыхынҳәло зҵаароуп, Шәара шәышҟагьы. Аилазаарақәа зегьы дасу рхықәкқәа рымоуп, аиҳабыра дара руснагӡатәқәа рымоуп, ауаажәларратә еиҿкаарақәагьы убас, аха ҳазегьы иаҳзеиҧшны ҳҿаҧхьа иқәгылоу уснагӡатәуп аҭышәынтәалара аиқәырхареи ауаҩы изинқәа реиқәырхареи, ауаа аҭагылазаашьа бзиа рзаҧҵаразы алшарақәа раҧҵара».


Абҵарамза 5 рзы Ахада Ауаажәларратә палата алахәцәа рышьақәырҕәҕәара иазку Аусҧҟа инапы аҵаиҩит.

Аусҧҟа атекст аҟны иҳәоуп:

«Аҧсны Аҳәынҭкарра Ауаажәларратә палатазы» Аҧсны Аҳәынҭкарра Азакәан ахәҭаҷ 8 инақәыршәаны ишьақәырҕәҕәазааит Ауаажәларратә палата алахәцәас:

Бигәаа Гарри Максим-иҧа

Џьынџьал Сократ Раҷ-иҧа

Кьычба Гульнара Михаил-иҧҳа

Лишьенко Игор Андреи-иҧа

Лабахәуа Елена Макбет-иҧҳа

Лолуа Рита Владимир-иҧҳа

Маиромиан Валери Франц-иҧа

Мироненко Вадим Никола-иҧа

Смыр Сергеи Макар-иҧа

Тополиан Альберт Гаспар-иҧа

Убириа Данил Ҭемыр-иҧа

Ҳапат Низам Ҳасан-иҧа

Ҳашыг Руслан Мкан-иҧа».




Возврат к списку