Аҧсны Аҳәынҭқарра Ахада

 

Ахада Аҧсадгьыл ахьчаҩцәа ирызку ашәҟәы «Афырхацәа - Аиааира ҳзаазгаз» аӡыргара даҭааит

04.11.2019

Ахада Аҧсадгьыл ахьчаҩцәа ирызку ашәҟәы «Афырхацәа - Аиааира ҳзаазгаз» аӡыргара даҭааит

Абҵара 4 рзы Аҧсны Аҳәынҭқарра Ахада Рауль Ҳаџьымба апублицист Гәугәуца Џьыкырҧҳа Аҧсадгьыл ахьчаҩцәа ирызку лышәҟәы «Афырхацәа - Аиааира ҳзаазгаз» аӡыргара даҭааит.

Аҭыжьымҭа иаҳәоит 1992-1993 шш.Аҧсны Аџьынџьтәылатә еибашьраан зыҧсадгьыл зхы ақәызҵаз, Гәдоуҭа ақалақь мрагыларатәи ахәҭа иалҵыз 52-ҩык аибашьцәа рыҧсҭазааратә мҩа атәы.
Гәугәуца Џьыкырҧҳа Ахада Рауль Ҳаџьымба иҭабуп ҳәа иалҳәеит ашәҟәы аҭыжьра иаиҭаз адгыларазы.

«Иахьатәи амш аибашьраҟны иҭахаз ргәалашәара иазкуп. Зыхшара зцәыӡыз анацәа рхьаа ахааназы ҳаргьы иаҳҳьааны иаанхоит. Аҳәынҭқарра Ахада Рауль Ҳаџьымба иҭабуп ҳәа иасҳәарц сҭахуп иҟаиҵаз адгыларазы», – лҳәеит лара.

Аҳәынҭқарра Ахада иаҵшьны иҳәеит Аҧсадгьыл ахьчаҩцәа рыхьӡ акамыршәра, урҭ рфырхаҵарақәа ртәы абиҧара ҿыцқәа рахь аиагара иамоу аҵак ду атәы.

«Ҳаҭыр зқәу ҳанацәа, ҳаҭыр зқәу ҳабацәа, ҳашьцәа, ҳаҳәшьцәа! Абри аҩыза ахҭыс, аибашьраан иҳацәҭахаз ҳаҷкәынцәа ҳаҳәшьцәа ирызку лаӷырӡыда иузымҩаҧгаӡом. Ихьанҭоуп арҭ азҵаарақәа рылацәажәара, аха сгәы иаанагоит, ҳаҷкәынцәеи ҳаҳәшьцәеи рыӡбахә зҳәо ари ашәҟәы гәаларшәага мацараны ишыҟамло. Ари ҳаҧхьаҟатәи ҳҧеиҧш, уаҳа ҳадгьыл аҟны еибашьра ҟамло, ҳаидгылара ҕәҕәахо, ҳажәлар раӡәкра ирсимволуп. Абарҭ ҳаҷкәынцәа, зыжәҩахыр еидҵаны еибашьуаз, ргәы еиҭамскәа аӷа ианижәлоз аиааира агаразы иҟарҵоз, ҳарҭгьы иаҳхамышҭыртә еиҧш аҭагылазаашьақәа аҧаҳҵалароуп. Хымҧада, иаҭахуп раҧхьаӡа инаргыланы ҳара ҳаидгылара, аибашьраан ҳазцәымӷыз аӷа ҳаниҿагылаз еиҧш. 

Иҭабуп ҳәа басҳәоит бара, хаҭала Гәугәуца, бџьабаа даараӡа ирацәоуп, ари ашәҟәы ус унатәаны иуҩыртә еиҧш иҟаӡамызт ҳәа сгәы иаанагоит. Бара иҟабҵаз, ҭаацәацыҧхьаӡа брылсны, аматериалқәа еизганы, абри аҩыза аҭыжьымҭа ҟалартә еиҧш аџьабаа ахьыббаз, хаҭала бҿаҧхьа схырхәоит. Схырхәоит шәара иахьа абра иҟоу шәҿаҧхьа, иҟам, адунеи зыҧсаххьоу ргәалашәара аҿаҧхьа. Иҟазааит наунагӡа ҳадгьыл аҟны аҭынч ҧсҭазаара, ҳхәыҷқәа ҧеиҧш бзиа роуааит, иҟазааит аиааира, еиҭах аиааира. Абзиарақәа шәымазааит, иҭабуп ҳәа шәасҳәоит зегьы!», – иҳәеит Ахада иқәгылараҟны.

Емма Ермолова Аџьынџьтәылатә еибашьраҟны иҭахаз ранацәа рыхьӡала ашәҟәы аҭыжьразы иҭабуп ҳәа ралҳәеит.
«Ари ҭоурыхуп, ари ҳҿар рааӡараҟны имҩақәҵаганы иҟалоит. Иаҳхамышҭааит ахааназы ҳтәыла ахьчара зхы ақәызҵаз зегьы», – лҳәеит лара.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT