Аҧсны Аҳәынҭқарра Ахада

 

Ахада Геннади Аламиа дидикылеит

24.09.2019

Ахада Геннади Аламиа дидикылеит


Цәыббрамза 24 рзы Аҧсны Аҳәынҭқарра Ахада Рауль Ҳаџьымба дидикылеит ауаажәларратәи аполитикатәи усзуҩы, «Ахьӡ-Аҧша» аорден аҩбатәи аҩаӡара занашьоу Геннади Аламиа, официалла 70 шықәса ихыҵра азгәаҭара инамаданы.

Аҳәынҭқарра Ахада дырзааҭгылеит Геннади Аламиа аҳәынҭқарра аргылараҟны илагамҭақәа.

«Шәара еснагь аҳәынҭқарра аргылараҟны шәалахәын шәыҧсадгьыл алахьынҵа раҧхьа иргылатәуп ҳәа иҧхьаӡаны. Шәпоезиа философиатә хаҿсахьала еибаркуп, уи аҧсҭазаара ахаҭа ишәыҵанаҳәоит. Шәара шәырҿиара ҳажәлар рыбзиабара иаҧсахахьеит. Шәыхьӡ нарҭбааны еицырдыруеит публицистк, иара убас профессионалтә еиҭагаҩык иаҳасабала. Шәаҧхьа ишьҭоу аусқәа иҵегьы ишырацәоу агәра ганы сыҟоуп. Шәаргьы, шәҭаацәагьы ирзеиӷьасшьоит агәабзиара, агәамч, аизҳазыӷьара, аихьӡарақәа шәусқәа зегьы рҿы», – иҳәеит Ахада.

Геннади Аламиа, аҳәынҭқарра Ахада иҭабуп ҳәа иеиҳәеит.

«Зынӡагьы сажәит сҳәар сҭахӡам, насгьы ашықәсынҵыра ала акәӡам, ухы, улшара шыҟоу еиҧш ауп ақәра шыршәо рҳәоит. Ҳара иаҳхаҳгаз анаҩс, сара 70 шықәса схыҵра азгәасҭоит ҳәа аҳәара сцәыуадаҩуп, иаразнак исгәалашәоит анышә иамадоу, урҭ ианырымҵыз нысҵит ҳәа, уи гәырӷьара дук сзаанагом. Аха, нас санхәыцлак, ахәыҷқәа ыҟоуп, иҟоуп изызҳауа аҿар, шьҭа ҧыҭрак сыҟаз сҳәагәышьоит. Аха, исҭахуп ҳтәыла аҧеиҧш иҵегьы илашаны избарц. Урҭ ҭахеит убас еиҧш агәыӷра рыманы, убри аҟынтә ҳаидгыланы ҳаицынхароуп, ҳаҧсадгьыли ҳажәлари ҧхьаҟатәи рҧеиҧш аизҳазыӷьаразы. Иҭабуп даара!», – иҳәеит Геннади Аламиа.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT