Аҧсны Аҳәынҭқарра Ахада

 

Ахада ауаажәларра-политикатә ҭагылазаашьа дахцәажәеит

19.09.2019

Цәыббрамза 19 рзы аҳәынҭқарра Ахада Рауль Ҳаџьымба атәылаҟны иҟоу ауаажәларра-политикатә ҭагылазаашьеи аҵыхәтәантәи амшқәа рзы иҟаҵаз аҳәамҭақәеи дрыхцәажәеит.

«Аӡбара цоит, ҳгәы иаанагоит ирыдыркыло аӡбамҭа ҳтәыла иазеиҕьны иҟалап ҳәа. Алеқсандр Анқәаб Ҳаџьымбеи Кәыҵниеи рҽеидкыланы алхра ҿыцқәа реиҿкааразы иҟаиҵаз ааҧхьаразы, иазгәасҭарц сҭахуп, ари ҳара ҳзы иҿыцуп ҳәа иҳаҧхьаӡом.

Амеморандум ҳәа изышьҭоу аздырхиеит иҳәынҭқарратәым аиҿкаарақәеи Асҭамыр Ҭаниеи, хаҭарнакра ззиуа ҳаздырам аха. Егьырҭ рпозициа еилкаауп, ари - иҳәынҭқарратәым аиҿкаарақәа зышьцылоу ауп, урҭ мраҭашәаратәи агрантаҭаҩцәа ргәыҕрақәа еиларымгароуп.

Иацы Алхас Кәыҵниа иҟаиҵаз аҳәамҭаҟны ҳаиҧылара далацәажәо, уи амаӡа ирзазшәа иҳәоит. Имаӡоу ҳәа акгьы ҳаламцәажәаӡеит, ҳажәлар реидкылара хықәкыс измаз ажәалагала ҟаҵан Аҧыза-министр ихаҭыҧуаҩ имаҵуразы. Сара ари аиҧылара аҧшьызымгаӡеит, уи мҩаҧысит Кәыҵниаа рхаҭарнакцәа ааины «ҳара ҳиацәажәоит ари аҭагылазаашьа шәалацәажәарц азы» ҳәа анҳарҳәа ашьҭахь.

Алхас Кәыҵниа идагьы арҭ амшқәа рзы аиҧылара зҭахыз ыҟан, урҭгьы мҩаҧысит. Аӡәы аҭагылазаашьа алҵразы аиҿцәажәарақәа мҩаҧгатәуп иҳәон, даҽаӡәы аидгылара аҭахуп иҳәеит, аха урҭ аиҧыларақәа ртәы Алхас Кәыҵниа издырӡом. Икәша-мыкәша имҩаҧысуа цқьа издырӡом ҳәа сгәы иаанагоит.

Иџьашьатәуп, аиҧылараҟны дааины, ҳаицәажәара ашьҭахь иҟаиҵаз аҳәамҭаҟны «ахада дахызҳәаз» ҳәа сыӡбахә ахьиҳәо. Сполитикуп зҳәо ауаҩы илогика уамашәа иҟоуп. Акызаҵәык, иазгәасҭарц исҭаху, Аҧыза-министр ихаҭыҧуаҩ имаҵура мап ацәикит, аха убри аан Аҧыза-министр имаҵуразы Аслан Бжьаниа дҳадигалеит, уи мап ацәаҳкит.

Алхрақәа реихшьалақәа дасу ишиҭаху рынарҳә-аарҳәра ишаҿыц иаҿуп, сара агәра згоит ҳауаажәлар реиҳараҩык ас уаҳа цашьа амам ҳәа ишырыҧхьаӡо. Алхрақәа хыркәшоуп, иаиааиз ихьӡ ҳәоуп, аилахәаахәҭрақәа ҳарҟәаҵроуп», - ҳәа азгәеиҭеит Рауль Ҳаџьымба. 

 

 


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT