Рауль Ҳаџьымбеи Анатоли Бибилови ҭелла реицәажәара

 Цәыббрамза 5 рзы имҩаҧысит Аҧсны Аҳәынҭқарра Ахада Рауль Ҳаџьымбеи Алада Уаҧстәыла Ареспублика Ахада Анатоли Бибилови ҭелла реицәажәара.

Аҳәынҭқарра Ахадацәа еиҭа аладауаҧстәыла-ақырҭуа ҳәаа аилагарақәеи Қырҭтәыла аполициа аблокпост мыругала аиқәыршәареи ирыдҳәалоу азҵаарақәа инарымаданы ақыҭа Уиста аҳаблаҟны иҟоу аҭагылазаашьа иалацәажәеит.

Анатоли Бибилов Рауль Ҳаџьымба иҭабуп ҳәа иеиҳәеит Аҧсны анапхгареи Аҧсны ауаажәларратә еиҿкаарақәеи Алада Уаҧстәыла Ареспублика амчхарақәа имҩаҧырго аусураҟны иҟарҵо адгылареи арегион аҟны аҭагылазаашьа зыруадаҩуа Қырҭтәыла аганахьала имҩаҧысуа аусқәа рҿагылареи рзы.

Рауль Ҳаџьымба иазгәеиҭеит Аҧсны Аҳәынҭқарра есқьынгьы Алада Уаҧстәыла аиашьаратә жәлар рыцхыраара ишазхиоу. Иара убас иҳәеит ишьақәгылаз аҭагылазаашьа аиҿцәажәарақәа рыла амҩақәҵара аҭахуп ҳәа игәы ишаанаго.  

Анатоли Бибилов иаҵшьны иҳәеит Қырҭтәыла анапхгара аганахьала апровокациақәа шыҟоугьы, Алада Уаҧстәыла иалшо зегьы шыҟанаҵо ареспубликаҟны ашәарҭадареи аҭышәынтәалареи реиқәырхара алыршаразы.


Возврат к списку