Аҧсны Аҳәынҭқарра Ахада

 

Тҟәарчал араион аҟны аусуратә ныҟәара

30.07.2019

Тҟәарчал араион аҟны аусуратә ныҟәара

Ҧхынгәымза 30 рзы Аҧсны Аҳәынҭқарра Ахада Рауль Ҳаџьымба Тҟәарчал араион аҟны аусуратә ныҟәара мҩаҧигеит.

Тҟәарчал имҩаҧысит Асоциалтә-економикатә ҿиара ацхрааразы аинвестициатә программа ахарџь ала иаахәаз автобусқәа араион аҭара.

«Араион иаиуит автобусқәа фба, урҭ рахьтә ҩба – ашколтә автобусқәоуп, акы ақалақь аҟны иаанҳажьуеит, даҽакы Агубедиатәи абжьаратәи ашкол иаҳҭоит. Ақалақьқәа ирыбжьоу атранспорт азы ауадаҩра злаҟоу ала, иаанхаз автобусқәа ҧшьба  ақалақьбжьаратә еимадарахь идәықәаҳҵоит.  Иара убас ҳара аҩадатәи азона, Џьантухантә ахәыҷқәа ааҳгоит, уахь, аҳаблахь амаршрут ыҟан, аха ахәыҷқәа ашкол иахьӡаӡомызт аҟнытә, шьҭа ари азҵаара ӡбахоит», - иазгәалҭеит Тҟәарчал араион Администрациа Ахада Аида Чачхалиаҧҳа.

Аҳәынҭқарра Ахада Тҟәарчал Араионтә хәышәтәырҭа хада аргылара ахьымҩаҧысуа аҭыҧ даҭааит. Ари аобиект аҟны аусурақәа мҩаҧысуеит Асоциалтә-економикатә ҿиара ацхрааразы аинвестициатә программа ахарџь ала. Араионтә хәышәтәырҭа хада шьақәгылоуп акорпусқәа хҧа рыла, уахь иаҵанакуеит ахирургиа аҟәша, акушер-геникологиа, атерапиа, аполиклиника. Арҩычаратә усурақәа ахыркәшарахь инеиуеит. Иара убас аобиект аҟны имҩаҧган амцарцәаратә хьчара ардыргабжьы ашьақәыргыларазы амыруга, афымца цәаҳәа ҿыц, ихыркәшахоит аҳауаҩнарсга ашьақәыргылара.

 Иаараны иҟоуп аҧҟаратә блокқәа рыҟны аҳауа арыцқьаразы ҷыдалатәи аламинартә ҭуанқәа.    Иара убас ишьақәыргылахоит алифти аинвалидцәа рышьҭыхга. Аобиект ахархәарахь ирыҭахоит   2019 шықәса анҵәамҭазы.

«Ас еиҧш ахәышәтәырҭа ҳҭахуп, избанзар 11 қыҭа ҳара иҳаҵанакуеит, рызегьы ацхырааразы ҳара иҳадҵаалоит. Ашықәс алагамҭа инаркны 3 нызқьҩык инареиҳаны иҳадаҳкылахьеит. Ҳгәыҕуеит ахәышәтәырҭа ҿыц анаартха ашьҭахь аспециалистцәа ҿарацәа аусуразы иаҳзаап ҳәа. Аусурагьы ахаҭабзиара еиҕьхап ҳәа ҳгәы иаанагоит», - ҳәа азгәалҭеит Тҟәарчалтәи АХӘХ Аҳақьым хада   Лали Гәыргәлиаҧҳа.

Ахада иара убас даҭааит 5-тәи абжьаратәи ашкол. Ара арҽеиратә усурақәа мҩаҧысуеит абаза наплакҩы, амеценат ихарџьқәа рыла.

«Ари ашкол аҟны арҽеиратә усурақәа мҩаҧгамызт 1985 шықәса раахыс. Нанҳәамза 20 –нӡа ауадақәа рыҩныҵҟа рҽеихоит, аҧенџьырқәеи ашәқәеи ҧсаххоит. Аусура аҕьырак хыркәшахоит, иаанхаз ашьыхрақәеи, ашәрақәеи роуп. Ари ашкол далгахьан Ахада Рауль Ҳаџьымба. Уажәы ара аҵара рҵоит 100 рҟынӡа ахәыҷқәа», - иазгәеиҭеит ашкол адиректор Дмитри Шьоуа.

Иара убас Ахада дахәаҧшит ареспубликатә биуџьет ахарџь ала Тҟәарчал аџьырмыкьаҟны имҩаҧысуа арҽеиратә усурақәа.  

«Аџьырмыкьа даара арҽеира аҭахын, Ахада ибзоураны, ареспубликатә биуџьет ахарџь ала аиҭашьақәыргылара иалагеит. Ҳазҭагылоу аамҭазы адәқьанеишәақәа рыргылара иаҿуп, ахыб хиоуп. Аџьырмыкьа акәша-мыкәша иара иаҵанакуа адәқьанқәа ыҟоуп, урҭ қьырала ҳауаажәлар иргоит. Анаҩс арҭ адәқьанқәагьы рырҽеира ҳалагоит. Уи акорпус хада арҽеиратә усурақәа рышьҭахь. Аргылара хацыркын  ҵыҧх, иҟан 80 ҭыҧ, шьҭа 140 ҭыҧ ҟалараны иҟоуп. Аусурақәа реиҳарак ҟаҵоуп, лассы зегьы хыркәшахап ҳәа ҳгәы иаанагоит», - лҳәеит Тҟәарчал араион Администрациа Ахада Аида Чачхалиаҧҳа.

Ахада ибеит иара убас амашьынамҩа «Тҟәарчал-Бедиа» аҟны имҩаҧысуа аусура.

«Аҵыхәтәаны ҳаныҟаз аахыс иҟаҵоу маҷӡам. Аобиектқәа акыр ахыркәшарахь инеит. Араион азы уажәы ихадароу амҩуп. Амза 10 шыҟоу аусурақәа хыркәшахароуп, Тҟәарчал ақалақь иаиуеит ақыҭақәа ақалақь иамаздо амҩатә инфраструктура», - иазгәеиҭеит Ахада.

АЕ «Аҧснывтомҩа»анапхгаҩы  Борис Ачба иҳәеит амашьынамҩаҟны аусурақәа шымҩаҧысуа атәы:

«Аусура иалагеит 2017 шықәсазы, ара акырџьара адгьыл ҳәазоит, 5 инареиҳаны аҵыргәа ҭыӡқәа ргылан. Амҩақәа роура – 11,5 километр ыҟоуп, иҟаҵоуп 7 км рҟынӡа. Ҳаграфик ҳацәхҟьеит ацҳақәа 4 ргылатәхеит иҿыцны, Аҧсны анапхгара урҭ рыргалара аҧара азоунажьит. 9 қыҭак еимаздо ари амҩа акраҵанакуеит».

A65A9459.JPGA65A0047.JPG

A65A9393.JPG

A65A9866.JPG



 




Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT