Аҧсны Аҳәынҭқарра Ахада

 

Имҩаҧысит Ахада хантәаҩра ззиуаз аминистрцәа реилазаара аилатәара

26.07.2019

Имҩаҧысит Ахада хантәаҩра ззиуаз аминистрцәа реилазаара аилатәара

 Ԥхынгәымза 26 рзы  Аԥсны  Аҳәынҭқарра Ахада Рауль Ҳаџьымба ихантәаҩрала имҩаԥысит Аԥсны аминистрцәа реилазаара аилатәара.  

Амшхәаԥштә хада иалагалан абарҭ азҵаарақәа:

1. «Арӡынба ихьӡ зху Аҟәа ақалақь жәларбжьаратәи аҳаиртә баӷәаза аеродром азеиҧш гыларҭа змоу аеродром ҳәа астатус аҭаразы» Ахада Идҵа апроект;   

2.  В.Г. Арӡынба ихьӡ зху Жәларбжьаратәи аҳаиртә баӷәаза «Аҟәа»  анбантә код аҭара;

3.  Аԥсны Аҳәынҭқарра аҳаиртә наӡаӡаареи авиациеи рхархәарази, В. Г. Арӡынба ихьӡ Жәларбжьаратәи аҳаиртә баӷәаза аусура иазку аусмҩаԥгатәқәа рынагӡареи рзы анорматив-зинтә актқәа разырхиара.

Аҳәынҭқарратә мазареи априватизациеи рҳәаақәҵаразы аҳәынҭқарратә еилакы ахантәаҩы Вахтанг Ԥиԥиа Ахада идҵа инақәыршәаны имҩаԥгаз аусурақәа ртәы дазааҭгылеит:

«Ҳара ари аусура амҩаԥгара ҳалагеит Ахада идҵала. Аобиект аҟны апроект-харџьынҵатә усурақәа рымҩаԥгара иақәшаҳаҭхаз аурыс инвестор дадыԥхьалан. Иааиуа амзазы ихыркәшахоит апроект-харџьынҵатә документқәа реиқәыршәаразы имҩаҧысуа аусура. Абри аамҭазы иахәҭоу атрибутқәа ахҵаны иҟазароуп. Аҟәа ақалақь аҳаиртә баӷәаза ус баша ҳаиртә-транспорттә хаданы мацара иҟаӡам. Ари даара крызҵазкуа обиектоуп.  Ҳара ҳзықәгәыӷуа апассаџьырцәа рырацәахара мацара акәӡам. Аобиект хаҳара аманы иҟазҵо еиҳаракгьы аидарамҩангара ауп. Аԥсны ахаангьы аҵак ду змаз транспорттә бжьысырҭаны иҟан. Аҳаиртә баӷәаза аусура иаламыргакәа, Аԥсны аҧхьаҟа атранспорттә база зыҟалом. Ари раԥхьатәи шьаҿоуп, уи анаҩсангьы, аидарақәа рымҩангаразы амшынтә баӷәаза ду аус адулара мҩаҧысуеит».

Аминистрцәа реилазаара аилатәараҟны Ахада инапы аҵаиҩит «В.Г. Арӡынба ихьӡ зху аҳаиртә баҕәаза Жәларбжьаратәи аҳаиртә баӷәаза аеродром «Аҟәа» азеиԥштә гыларҭа ҳәа астатус аҭаразы» Адҵа.  

Адокумент аҟны,  ҷыдала, иҳәоуп:

«Аҧсны Аҳәынҭқарра Аҳаиртә закәанеидкыла инақәыршәаны, В.Г. Арӡынба ихьӡ зху   Жәларбжьаратәи аҳаиртә баӷәаза «Аҟәа» аеродром атәылауааи аҳәынҭқарратә  ҳаирпланқәеи ргыларҭазы ахархәара хықәкыс иҟаҵаны, В.Г. Арӡынба ихьӡ зху   Жәларбжьаратәи аҳаиртә баӷәаза «Аҟәа» аеродром азеиҧш гыларҭа змоу аеродром астатус аҭазааит».

Аҧыза-министр Валери Бганба ишиҳәаз ала, атәылауааи арратә авиациеи рзеиҧш гыларҭа алыршара ауп ари зызку. 

Аминистрцәа реилазаара Ақәҵара аднакылеит В.Г. Арӡынба ихьӡ зху Жәларбжьаратәи аҳаиртә баӷәаза «Аҟәа» анбантә код аҭаразы;

 

Адокумент атекст аҟны иҳәоуп:

«В.Г. Арӡынба ихьӡ зху «Жәларбжьаратәи аҳаиртә баӷәаза «Аҟәа» иааиҧмырҟьаӡакәа жәларбжьаратәи аҳаиртә мҩангарақәеи аҳаирпланқәа жәларбжьаратәи рыҧыррақәеи рымҩаҧгара, аҳаиртә еимадара, Аҧсны Аҳәынҭқарра атуризм, аекономикатә еизыҟазаашьақәа рырҿиаразы аартра хықәкыс иҟаҵаны, 2009 шықәса нанҳәамза 5 аҟн.   № 2473-с-IV Аҧсны Аҳәынҭқарра Аҳаиртә Закәанеидкыла ахәҭаҷ 47, ахәҭаҷ 48 Аҧсны Аҳәынҭқарра Аиҳабыреи Урыстәылатәи Афедерациа Аиҳабыреи рыбжьара аҳаиртә транспорт аусхк аҟны русеицуразы 2010 ш. жәабранмза 17 аҟн. Аиқәшаҳаҭреи, жәларбжьаратәи азини жәларбжьаратәи аиқәшаҳаҭрақәеи рыпринципқәеи рнормақәеи инарықәыршәаны,  

 Аҧсны Аҳәынҭқарра Аминистрцәа реилазаара

 

ИАҚӘНАҴОИТ: 

1. Иаартызааит:

 В.Г. Арӡынба ихьӡ зху Аҟәа ақалақь жәларбжьаратәи аҳаиртә баӷәаза аеродром аҳаирпланқәа жәларбжьаратәи рыҧыррақәа рымҩаҧгаразы;

- В.Г. Арӡынба ихьӡ зху «Жәларбжьаратәи аҳаиртә баӷәаза «Аҟәа» аҳаирпланқәа рыҧыррақәа рымҩаҧгаразы.

2. В.Г. Арӡынба ихьӡ зху жәларбжьаратәи аҳаиртә баӷәаза «Аҟәа», Аҧсны Аҳәынҭқарра аҳаиртә наӡааӡара ирыҭазааит жәларбжьаратәи ҧшь-нбанктәи акод «URAS». 

3. Аҧсны Аҳәынҭқарра Адәныҟатәи аусқәа рминистрреи Аҧсны Аҳәынҭқарра атранспорт азы Аҳәынҭқарратә усбарҭеи ишьақәыргылоу аҧҟарала дара ирыҵанакуа алшарақәа инарықәыршәаны азинмчызмоу Урыстәылатәи Афедерациа аҳәынҭқарратә усбарҭақәа адырра рырҭааит В.Г. Арӡынба ихьӡ зху жәларбжьаратәи аҳаиртә баӷәаза «Аҟәа», Аҧсны Аҳәынҭқарра аҳаиртә наӡааӡара жәларбжьаратәи ҧшь-нбанктәи акод  «URAS» шрыҭоу Абри Ақәҵара ап.1 инықәныҟәаны, анаҩс Урыстәылатәи Афедерациа Аҳаирнавигациатә информациа Аизга (AIP) алагаларазы.        

 Абри Ақәҵара анагӡара ахылаҧшра анапы ианҵазааит Аҧсны Аҳәынҭқарра Адәныҟатәи аусқәа рминистрреи Аҧсны Аҳәынҭқарра атранспорт азы Аҳәынҭқарратә усбарҭеи».

АА Атәылахьчара аминистрра Арра-ҳаиртә мчқәа рыдҵаҟаҵаҩ Адгәыр Гәымба иҳәеит ари ахырхарҭала Аҧсны Аҳәынҭқарра атәылахьчаратә усбарҭа заа ишазыҟанаҵахьоу акадр ҿыцқәа, урҭ иахьанатә специалист ҳасабла авиациатә усхк аҟны аусура ишазхиоу.

«Иаҳхаҳмыршҭыроуп иҳаҩсыз ашықәсқәа рызгьы иҟаҵаз шырацәоу. Иахьатәи аусмҩаҧгатәқәа – урҭ ашықәсқәа раан иҟаҵаз ашьаҿақәа ирылҵшәоуп. Уи  атуристцәагьы аинвесторцәагьы радҧхьалара алзыршо аимадарақәа рызҵаара ауп.    Аҳаиртә баҕәаза аус ауеит авиациатә усура ахырхарҭала мацара акәымкәа, иавиациатәым аусура аганахьалагьы. Ари ҳтәыла абиуџьеттә лшарақәаны иҟалоит. Насгьы ари макьана раҧхьатәи шьаҿақәоуп», - иҳәеит Ахада.

Атранспорт азы Аҳәынҭқарратә усбарҭа атәылауаҩратә авиациа аҳәынҭқарратә ҳәаақәҵара аҟәша аиҳабы Заур Ешба аилатәара иалахәыз адырра риҭеит Аҳаиртә баҕәазақәа шышьақәгылоу авиациатәи, даҽакала иаҳҳәозар, апассаџьырцәа рыдкылареи рымҩангареи иазку, егьи, иавиациатәыми, уи иаҵанакуеит апассаџьырцәа  ирҧылои инаскьазгои  ахаҿқәа ирызку акоммерциатә маҵзура. Адунеитә ҧышәаҟны аҳаиртә баҕәазақәа иавиациатәым русура 1,5-2-нтә еиҳаны ахашәала аанагоит,   авиациатә аасҭа. 

Аминистрцәа реилазаара иара убас иаднакылеит Аҧсны Аҳәынҭқарра аҳаиртә наӡааӡареи, авиациеи рхархәареи В.Г. Арӡынба ихьӡ зху жәларбжьаратәи аҳаиртә баӷәаза «Аҟәа» аусура алыршаразы аусмҩаҧгатәқәа рымҩаҧгареи русхк аҟни анорматив-зинтә актқәа разырхиаразы Адҵа. 

Аминистрцәа реилазаара аилатәараҟны иахәаҧшит, иагьрыдкылеит Аҧсны Аҳәынҭқарра аҩныҵҟатәи аусқәа русбарҭақәа рматериалтә-техникатә еиқәыршәара, русзуҩцәа руалафахәқәа, рсоциалтә хәдықәҵарақәа аамҭа-аамҭала реизырҳара иазку ахарџьқәа афинансқәа реицзаужьразы Аҧсны Аҳәынҭқарреи Урыстәылатәи Афедерациеи рыбжьара Аиқәшаҳаҭразы ақәҵара.

Иара убас ирыдыркылеит Аҧсны Аҳәынҭқарра амилаҭтә парк «Кәыдрытәи аҩхаа» напхгараҭаразы ақәҵара. Абасала, Аҧсны Аҳәынҭқарра адгьылҵакыра 27% иаиуеит ҷыдала ихьчоу адгьылҵакыра астатус. Ари рбага ҳаракуп ҳәа азгәеиҭеит Аекологиа Аинститут адиректор Роман Дбар.

 Ахада имҩаҧгоу аусуразы зегьы иҭабуп реиҳәеит, аилатәараҟны изхәаҧшу азҵаарақәа Аҧсны Аҳәынҭқарра абиуџьеттә лшарақәеи ахьӡи анырра бзиа шрырҭо азгәаҭаны. 

 1 (6).JPG

1.jpg


1 (7).JPG


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT