Аҧсны Аҳәынҭқарра Ахада

 

Ахада Аҧсны Аҭҵаарадыррақәа ракадемиа Ахада Зураб Џьапуа дидикылеит

26.07.2019

Ахада Аҧсны Аҭҵаарадыррақәа ракадемиа Ахада Зураб Џьапуа дидикылеит

Ҧхынгәымза 26 рзы Аҧсны Аҳәынҭқарра Ахада Рауль Ҳаџьымба Аҧсны Аҭҵаарадыррақәа ракадемиа Ахада Зураб Џьапуа дидикылеит.

Зураб Џьапуа Ахада адырра ииҭеит ашәҟәҭыжьра аус аҟны имҩаҧгоу аусура атәы. Еиҳа аҵакы змоу ҭыжьымҭоуп ҳәа иазгәеиҭеит аҧсуа жәлар рҵасқәеи ркультуреи иадҳәалоу, аматериал аизгаразы ицхыраагӡа дуны иҟало ашәҟәы «Азҵааранҵа». Иара убас иҭыжьуп еицырдыруа аҵарауаҩ А. Колаковски ишәҟәы «Абаза материалқәа», Аҧсны Аҭҵаарадыррақәа ракадемиа ашәҟәы «Вестник». Иҳәеит Аҧсны Аҭҵаарадыррақәа ракадемиаҟны ишымҩаҧысыз академикцәеи акорреспондентцәа ҿыцқәеи ралхрақәа.

«Сара Киргизиа сыҟан аепос иазку адунеизегьтәи асимпозиум аҟны, уантәи иаазгаз аинформациа зегьы ҳакадемикцәа ирысҭеит. Иара 23 тәыла рхаҭарнакцәа алахәын. Сара ара ицәырызгаз сусумҭа «Нарҭтәи аепос» атема иазкын».

Зураб Џьапуа иара убас далацәажәеит 2020 шықәсазтәи абиуџьет: 
«Иаҳхысыз ашықәс азы иӡбан Аҭҵаарадыррақәа ракадемиа аҵарауаа руалафахәқәа усҟан иахьынӡауаз ашьҭыхра. Иахьа даҽа проблемак ыҟоуп, Аҧсны Аҭҵаарадыррақәа ракадемиеи ҳинститутқәеи рыҟны иҟоуп ҳусураҿы зыда ҧсыхәа ҳамам, атехникатә персонал. Уанӡа, егьырҭ ауалафахәқәа рышьҭыхра анымҩаҧысуаз ари азҵаара аӡбаразы алшара ыҟамызт, уажәы Академиа апрезидиум абри ажәалагала ахәаҧшразы аҳәара ҟанаҵоит. Ҳара иақәнагоу адокумент азҳархиахьеит.

Иҟоуп иара убас аҵарауаа рыҩаӡара иадҳәалоу азҵаарагьы. Иахьа здиссертациа зыхьчо аҵарауаа ироуа зынӡа имаҷуп. Иахьынӡазалшо ишьҭыхзар ҳҭахын. Абас аҳәара ҟарҵоит адиректорцәа».

Аҳәынҭқарра Ахада арҭ азҵаарақәа ҳрыхәаҧшуеит ҳәа аҭак ҟаиҵеит.

«Ашәҟәҭыжьра атәы ҳҳәозар, уи акраҵанакуеит, иҭыҵа ашәҟәқәа ахархәарагьы рымазароуп. Ҳҭоурых ҳдыруазароуп, зҭоурых ззымдыруа ҧеиҧш имаӡам. Аус здаҳулаша азҵаарақәагьы ыҟоуп, Аҧсны Аҭҵаарадыррақәа ракадемиа аекономика аҿиара азҵаарақәа иҵегьы зҿлымҳара анаҭалароуп.

Ауалафахәқәа рышьҭыхразы усҟан иҳалшоз зегьы ҟаҳҵеит. Аха аҳәынҭқарра алшарақәа есышықәса иазҳалароуп. Атехникатә персонали, акандидатцәеи, адокторцәеи руалафахәқәа рышьҭыхра азҵаара излауала хымҧада ҳахәаҧшуеит».

A65A5800.JPG



 


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT