Аҧсны Аҳәынҭқарра Ахада

 

Аҧсны Аҳәынҭқарра Абираҟ Амш азы адныҳәалара

23.07.2019

Аҧсны Аҳәынҭқарра Абираҟ Амш азы адныҳәалара


Ҧхынгәымза 23 рзы Аҧсны Аҳәынҭқарра Ахада Рауль Ҳаџьымба Аҧсны жәлар ирыдиныҳәалеит Аҧсны Аҳәынҭқарра Абираҟ Амш.

 ***
Акыр иаҧсоу ҳауаажәлар!

Гәык-ҧсыкала ишәыдысныҳәалоит ихьыҧшым ҳтәыла аҭоурых аҿы шьардаӡа зҵазкуа ахҭыс– Аҧсны Аҳәынҭқарра Абираҟ Амш! Ари ҳмилаҭ-хақәиҭратә қәҧараҿы аҭыҧ ҷыда аанызкыло, ҧсра зқәым символуп. Шәышықәсала Аҧсны ахьӡ-аҧша мырӡкәа иаазгоз ҳажәлари зыхьӡ нагаз ҳаҧсуа ҳәынҭқарцәеи ҳџьынџь ашәарҭа ианҭагылоз, иара убас аҭынч аамҭазы еиҭнырыҧсахлон ҩашьара зқәымыз, игәазырҳагаз, ҳдоуҳаи, ҳгәымшәареи, ҳаӡәкреи зныҧшуаз, еиуеиҧшым аепохақәа ирҟазшьарбагаз Аҧсуа бираҟқәа. Урҭ зегьы ирыман рхылҵшьҭра ҷыда, ҵакыла, мҽхакыла ибеиан, иаадырҧшуан ҳажәлар рхыҧша шыҕәҕәаз.

Иахьа Аҧсны иахашәыршәыруа Абираҟ рылиааит ҳажәлар рполитикатә гәышьҭыҵра зырцәқәырҧаз, «Аидгылара» хацзыркыз 80-тәи ашықәсқәа. 1992 шықәса ҧхынгәымза 23 рзы ҳтәылаҟны ауаажәларра-политикатә ҭагылазаашьа акырӡа ишыуадаҩызгьы, иналукааша ҳҧыза Владислав Арӡынба хантәаҩра ззиуаз Аҧсны Иреиҳаӡоу Асовет ишьақәнарҕәҕәеит Аҧсны Аҳәынҭқарра Абираҟи Агерби. Хара ихәыцуаз, зыхшыҩ ҵарыз Владислав ду еиликаауан ҳҳәынҭқарра атрибут хадақәа Анцәа игәаҧхарала иаҳзаатыз алшара инақәыршәаны иҳадҳамкылар, нас уи еиҧш аҭагылазаашьа зынӡаск иҟамларгьы шалшоз.

Ари Аҧсны асуверенитет аиҭашьақәыргыларазы раҧхьатәи ашьаҿа ҕәҕәақәа ируакын. Аҧсны Абираҟ автор, иналукааша аҧсуа сахьаҭыхҩы, амилаҭ-хақәиҭратә қәҧара аҧхьагылаҩцәа ируаӡәку Валери Гамгьиа иусумҭа нагӡоуп ҟазара ҳаракыла. Уи ианыҧшит иҧшьоу ахақәиҭразы зхы иамеигӡоз абиҧарақәа разхьрақәа, ргәыҕра лашақәа, нхыҵи-аахыҵи рдоуҳатә еигәныҩра ду.

Аҧсны жәлар Рџьынџьтәылатә еибашьраан Мраҭашәаратәи Мрагыларатәи афронтқәа рҿы ақырҭуа агрессорцәа хацәынмырха ирҿагылаз ҳаибашьцәа хьӡырҳәагақәа жәылара ицон Аҧсны Аҳәынҭқарра Абираҟ иаҵагыланы. Урҭ ҭоуба руан уи аҿаҧхьа ишьамхнышланы. Уи ырҧсаҳәоуп наунагӡа зыҧсадгьыл зхы ақәызҵаз аҵеира ршьала.

Нагӡара ақәзааит Аҧсны Аҳәынҭқарра абираҟ! Ишәҭыкакаҷлааит 1200 шықәса раахыс адунеи ахсаалаҿы ҩашьара зқәым зхатә ҭыҧ аанызкыло ихьыҧшым Аҧсны Аҳәынҭқарра!


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT