Ахада Гәдоуҭа араион ахь аусуратә ныҟәара мҩаҧигеит

Ахада Гәдоуҭа араион ахь аусуратә ныҟәара мҩаҧигеит

Ҧхынгәымза 19 рзы Аҧсны Аҳәынҭқарра Ахада Рауль Ҳаџьымба Гәдоуҭа араион ахь аусуратә ныҟәара мҩаҧигеит.
Гәдоуҭа имҩаҧысит Асоциалтә-економикатә ҿиара ацхрааразы аинвестициатә программа ахарџь ала иаахәаз араион автобусқәа фба аҭара. Уи аҧхьа араион иаҭан абарҭ иреиҧшу хә-втобуск.
Араион аҟны атранспорттә ҭагылазаашьа зеиҧшроу атәы далацәажәеит Гәдоуҭа араион  администрациа Ахада Руслан Ладариа:

«Араионтә автобусқәа шьҭа жәашықәсоуп аус руеижьҭеи, урҭ ҧсахтәын. Иахьа араион иаҭан ашколтә автобусқәа хҧеи, ақыҭатә автобусқәа хҧеи. Ҳара ари ахҭыс даара ҳаигәырӷьеит, еиҳаракгьы, иҧсахтәын иажәхьаз ашколтә автобусқәа, рныҟәгаразы имаҷымкәа аҧара аҭахын. Араион аҟны 20 қыҭа ыҟоуп, атранспорт ҿыц аҭахны иҟан. Атранспорт макьана еихшаӡам, изҭахқәоу рацәаҩуп, аха еиҳа изыхәҭоу ирыҭахоит».

Аҧсны Аҵареи аҭҵаарадырреи рминистр Адгәыр Какоба иазгәеиҭеит автопарк ахарҭәаарала араион ашколқәа рытранспорттә уадаҩра шыӡбахо:
«Хымҧада, автобусқәа рхыҧхьаӡара атәылаҿы иҟоу ашколқәа зегьы рыцыҧхьаӡа рымазартә еиҧш иҟаӡам. Аха иҳауз атранспорт ҿыц маҷк иадамхаргьы, иҟоу ауадаҩра аӡбоит, аҵаҩцәеи арҵаҩцәеи рҭагылазаашьа еиҕьнатәуеит. Арҭ автобусқәа ҳашколқәа ацхыраара ду рынаҭоит, еуеиҧшым аусмҩаҧгатәқәа раан рхы иадырхәоит, аспорттә еицлабрақәа, мамзаргьы ареспубликатә маҭәартә олимпиадақәа ракәзааит, ашколхәыҷқәа ақалақьқәеи араионқәеи рахь ргара ауадаҩрақәа ацын».

Аҳәынҭқарра Ахада Гәдоуҭа иҟазаара иалагӡаны дахәаҧшит март 4 амҩаду  аҿы ацҳа арҿыцразы аусурақәа ахьцо аҭыҧ, уи мҩаҧысуеит ареспубликатә биуџьет ахарџь ала. 
Аҭыҧантәи анхаҩы Заур Ҳаразиа иҳәеит аӡхыҵра ҟалацыҧхьаӡа иажәхьаз ацҳа аӡы ацарҭа шашәаҳауа, уи иахҟьаны аӡы хыҵны ааигәа-сигәа иҟоу аҩнқәа ишрыҩналоз:
«Аӡы метрак аҟынӡа ихалон, 100 ҭӡык инарзынаҧшуа аҧхасҭа рнаҭон. Уажәшьҭа иҳамоуп ацҳа ҿыц, ари апроблемагьы ӡбоуп». 
Аҳәынҭқаарратә наплакы «Аҧсныҟәарахьчара» аиҳабы ихаҭыҧуаҩ Алиас Сангәлиа имҩаҧгоу аусурақәа рзы адырра ҟаиҵеит:
«Ара ацҳа ҿыц ҟаҵоуп, ажәытәтәи ашәарҭара ацын, аӡцарҭа иаҧырхаган, убри аҟынтә ацҳа ҿыц аҟаҵаразы аҭахуп ҳәа иӡбан. Аҭӡы ҵаргәа ҩаган, аӡымҩасырҭа ырҭбаан».
Аҳәынҭқарра Ахада еиликааит Гәдоуҭатәи ахҧатәи абжьаратәи ашколи Лыхнытәи абжьаратәи ашколи рҟны арҿыцратә усурақәа шцо. Шьаҭанкылатәи аусурақәа цоит Асоциалтә-економикатә ҿиаразы аинвестициатә программа инақәыршәаны.
Ахҧатәи абжьаратә школ 600-ҩык аҵаҩцәа акуеит.  Шьаҭанкылатәи аусура хацыркын 2017 шықәса рзы. Еиҭашьақәыргылан ахыбра хада, иацҵан афасад, аӡаанкыларҭа, амцарцәаратә сигнализациа агәылган. Ихадароу аусқәа хыркәшоуп. 
Лыхнытәи абжьаратәи ашкол 800-ҩык ахәыҷқәа акуеит. Аусурақәа ирылаган 2017 шықәса рзы. Ахыбра ажәӡан, аҭыӡқәа рӷәӷәан, аихагыла-бжьаратә усқәа ҟаҵан. Ҳазҭагылоу аамҭазы акоммуникациақәа аусура иаларгоуп, амцарцәаратә система шьақәыргылоуп, иаанхаз  адгьылҵакыра аиҿкааразы имҩаҧгатәу аусқәа роуп. Аҵарашықәс алагамҭазы ахыбра ахархәарахь ирыҭахоит. 
Ахада аусуратә ныҟәара аихшьала азиуит:

«Амҩақәеи ацҳеи ирыдҳәалаз аусқәа нагӡоуп, ари акраҵанакуеит ааигәара инхо ауаа рзы. Есышықәса ицәырҵуан аӡхыҵра иадҳәалаз ауадҩра. Иахьа ари азҵаара ӡбоуп. Ашколқәа ракәзар, агәахәара унаҭоит ас еиҧш иҟоу ашколқәа ахьҳамоу. Зегьы ирыцку, дара ҭәызароуп. Ахәыҷқәа дасу рышколқәа рахь ирхынҳәтәуп. Сгәы иаанагоит, Лыхны еиҭашьақәыргылоу ашкол аҭаацәа ахәыҷқәа ақыҭахь рырхынҳәразы алшара рнаҭоит».

3.JPG

2.JPG

4 _3-я школа.JPG

5 лыхненская.JPG

7.JPG


Возврат к списку