Ахада аҧсуа диаспора ахаҭарнакцәа рхәыҷқәа дырҧылеит

Ахада аҧсуа диаспора ахаҭарнакцәа рхәыҷқәа дырҧылеит


Ҧхынгәымза 9 рзы Аҧсны Аҳәынҭқарра Ахада Рауль Ҳаџьымба Аҧсны Аҳәынҭқарра абаразы иааз аҧсуа диаспора ахаҭарнакцәа рхәыҷқәа дырҧылеит.

Аҳәынҭқарра Ахада аиҧылара иалахәыз аҧсшәа реиҳәеит, иагьазгәеиҭеит ахәыҷқәа Аҧсны рыҟазаара ҳтәылазы узыргәырҕьо хҭысны ишыҟалаз.

«Шәара ара, Аҧсны шәыҟазаара узыргәырҕьаша хҭысуп. Ас еиҧш иҵегьы ҳаҧхьаҟа ашьаҿақәа ҟаҵалатәуп. Иҕәҕәахалароуп, аҧхьаҟа ҳаиашьаратә еимадарақәа ирыцлароуп, аҿар рылахәзароуп абарҭ реиҧш иҟоу апроектқәа. Аҧсны шәыҟазаара аамҭа шышәхыжәгаз, ижәбаз, ишәаҳаз иахышәҳәаауа саҳарц сҭахуп», - иҳәеит Ахада.

Ахәыҷқәа Аҧсныҟа раара иацу ацәаныррақәа, ирбаз, аамҭа шырхыргаз атәы иалацәажәеит.

Ердем Ҳалуашь иҭабуп ҳәа реиҳәеит рҭоурыхтә Ҧсадгьыл абаразы алшара рызҭаз аиҿкааҩцәа:

«Ҳара еиуеиҧшым аҭыҧқәа ҳбеит, шамахамзар Аҧсны зегьы ҳалсны иаҳбеит. Иаҳбаз атәы ҳҭаацәа, ҳҭынхацәа, ҳҩызцәа рзеиҭаҳәара ҳаҿуп. Сгәы иҭоу зегьы сҿы исзарҳәом, аха гәыкала исҳәоит, ара имҩаҧысуаз зегьы даара ҳаргәырҕьеит».

Оикиу Аҭрышба иара убас аиҧылара иалахәыз иралҳәеит илбаз илнаҭаз агәалаҟазаара, дзызхәыцуаз, лгәы иҭоу атәы:

«Иҭабуп идуӡӡаны ҳәа расҳәарц сҭахуп абас еиҧш аҭагылазаашьа ҳзаҧызҵаз, ҳ-Аҧсадгьыл ҳбартә алшара ҳазҭаз. Ҳгәырҕьара ҳәаак амаӡам, иаҳҳәаша акыр ирацәоуп, аҩызцәа ҿыцқәа ҳауит, иаҳбаз, иҳаҳаз рацәоуп».

Иосиф Архага иҳәеит иҭоурыхтә Ҧсадгьыл ахь ахынҳәра шиҭаху, Аҧсныҟа аҵаразы аара игәы шаҳәо атәы. 

«Сгәы иаанагоит ари апроект иалахәыз ахәыҷқәа рхьышьҭрақәа рахь ахынҳәразы раҧхьатәи ашьаҿа ҟарҵеит ҳәа. Рҭоурыхтә Ҧсадгьыл рбартә еиҧш алшара рымоуп. Ирбеит ихьыҧшым, зхы иақәиҭу Аҧсны, ари хҭыс дууп», - иазгәеиҭеит Арепатриациазы аминистр Беслан Дбар.

Аделегациа иалахәыз рнапхгаҩцәа руаӡәк Шамиль Ешба иҳәеит ахәыҷқәа Аҧсны ирбаз гәахәара дула ишрыдыркылаз атәы:

«Ахәыҷқәа Аҧсны даара иргәаҧхеит. Рыҩныҟақәа рахь аҭел иасуан, рҭаацәа ирарҳәон ари атәыла даара ишыргәаҧхаз, рҭаацәагьы хымҧада арахь шәаароуп ҳәа рарҳәон. Аусура ду мҩаҧган, апроект ахылаҧшра ду аҭан. Иҭабуп ҳәа расҳәоит аиҿкаара иалахәыз зегьы».

Аиҧылара ахыркәшамҭаз агәалашаәаратә ҳамҭақәа реимдара мҩаҧысит.
1 (4).JPG1 (1).JPG


Возврат к списку