Аҷыдалкаатә ҭагылазаашьақәа рзы аминистрра адныҳәалара

Аҧсны Аҳәынҭқарра Ахада Рауль Ҳаџьымба Аҷыдалкаатә ҭагылазаашьақәа рзы аминистр Лев Кәыҵниа идиныҳәалеит Аҷыдалкаатә ҭагылазаашьақәа рзы аминистрра амш.

Адныҳәалараҟны, ҷыдала, иҳәоуп:

«Гәык-ҧсыкала ишәыдысныҳәалоит Аҧсны Аҳәынҭқарра Аҷыдалкаатә ҭагылазаашьақәа рзы аминистрра 13 шықәса ахыҵра амш.

«Арҭ ашықәсқәа рыла иаҧҵоуп ҳаҧсадгьыл ауааҧсыра ршәарҭадара алзыршо еиҿкаау, узықәгәыҕыртә иҟоу асистема.

Аҧсны Аҷыдалкаатәи ҭагылазаашьақәа рзы аминистрра атәылаҿы алҵшәа бзиақәа змоу аҳәынҭқарратә маҵзурақәа иреиуоуп иахьа. Аҷыдалкаатәи ҭагылазаашьақәа рзы аминистрра аспециалистцәа рнапы иану имариам аҳасабтәқәа рыӡбараан иаадырҧшуа апрофессионализм, агәымшәара, ахамеигӡара ирыбзоуроуп рмаҵзура зыҧсахаз аҳаҭырқәҵара.

Аҭагылазаашьа схы иархәаны, иҭабуп ҳәа шәасҳәар сҭахуп фырхаҵарыла, занааҭдыррала, хачҳарала инашәыгӡо шәмаҵзуразы. Ишәзеиҕьасшьарц сҭахуп Шәаргьы, шәколлективгьы, иара убас Аҧсны Аҳәынҭқарра Аҷыдалкаатәи ҭагылазаашьақәа рзы аминистрра аветеранцәа агәабзиара, агәамч, аманшәалара, ҳтәыла ахьӡала шәнапы злашәкуа аусқәа зегьы рыҟны аихьӡарақәа».

 


Возврат к списку