Аҧсны Аҳәынҭқарра Ахада

 

Ахада ИАР Аколлективтә мчқәа абжьаҟазаратә операциа ианалагаз аахыс 25 шықәса аҵра инамаданы имҩаҧысыз аишәа гьежь аусура далахәын

28.06.2019

Ахада  ИАР Аколлективтә мчқәа абжьаҟазаратә операциа ианалагаз аахыс 25 шықәса аҵра инамаданы имҩаҧысыз аишәа гьежь аусура далахәын

Рашәарамза 28 рзы Аҧсны Аҳәынҭқарра Ахада Рауль Ҳаџьымба ИАР Аколлективтә мчқәа абжьаҟазаратә операциа ианалагаз аахыс 25 шықәса аҵра инамаданы имҩаҧысыз аишәа гьежь аусура далахәын.

Аҳәынҭқарра Ахада аишәа гьежь иалахәыз аҧсшәа раҳәо, иазгәеиҭеит аибашьра ашьҭахьтәи ашықәсқәа раан Урыстәылатәи Афедерациа абжьаҟазаратә мчқәа рмиссиа иамаз аҵак ду:

«Бзиала шәаабеит ҳәа шәасҳәоит. Абжьаҟазара атемеи урҭ ашықәсқәа раан иқәгылаз азҵаарақәа рыӡбареи ҳара ҳзы акраҵанакуеит. Мышқәак раҧхьа Абжьаҟазаҩ ибаҟа амҵан абжьаҟазаратә миссиа иацу аидара хьанҭа иаҵаз аибашьцәеи ҳареи Аҧсназы аҵак дуӡӡа змаз ари арыцхә еицазгәаҳҭеит. Урҭ ара рбара ҳара ҳзы есқьынгьы гәахәароуп, аҭынчразы аусеицура ҳазхиоуп. Дара ибзианы ирдыруеит аибашьра ашьҭахь Аҧсны аҭагылазаашьа ахьынӡауадаҩыз, Аҧсны ашьақәгылара аҭоурых.

Ҳара ибзиангьы иаҳгәалашәоит абжьаҟазара алыршаразы имҩаҧгаз аусура, Қырҭтәылеи Мраҭашәара атәылақәеи рыҟны ари апроцесс ишазыҟаз. Иаҳгәалашәоит даҽа хықәкқәак змаз тәылақәак рхаҭарнакцәа ари апроцесс аҽалагалара рыҽшазыршәоз. Урыстәыла ахаҭарнакцәеи ҳҳәынҭқарра Ахада Владислав Арӡынбеи ари аҭагылазаашьа аҿагылара шрылшаз. Амчқәа «ИАР атәылақәа рыбжьаҟазаратә мчқәа рконтингент» ҳәа шрыхьӡызгьы, ари аконтингент аиҳарак Урыстәыла арбџьар мчқәа рыла акәын ишышьақәгылаз. Абжьаҟазаратә операциа амҩаҧгараан иҭахеит 117-ҩык, ибзиангьы иаҳгәалашәоит Аҧсны азгьы Урыстәыла азгьы аҭагылазашьа акыр ишыуадаҩыз усҟан.

Ҳарҭ гәык-ҧсык ала иҭабуп ҳәа раҳҳәоит аруаа - аҭынчра ахьчаҩцәа, акомандаҟаҵаҩцәа инадыркны асолдаҭцәа рҟынӡа, аҭынчра ахьчара апроцесс иацхраауаз. Иҭахон, аха убри аан, Урыстәылеи ҳареи ҳаизыҟазаашьа арӷәӷәаразы, Аҧсынтәыла аиҭашьақәыргыларазы алшарақәа   аҧырҵон, анаҩс Урыстәылеи егьырҭ атәылақәеи иазхарҵаз тәыланы иҟаларц азы».

Аусмҩаҧгатә еиҿкаан Москва Аҩнаҟны аветеранцәа - аҭынчра аиқәырхаразы ИАР Аколлективтә мчқәа урыстәылатәи аконтингент ҧасатәи аруаа, Аҧсны Аҳәынҭқарра анапхгара, ИАР атәылақәа ринститут аҧшьгарала. Аишәа гьежь аусура иалахәын аветеранцәа, аҳәынҭқарратәи ауаажәларратәи усзуҩцәа, аҵарауаа, аекспертцәа, Аҧсны Аҳәынҭқарреи Урыстәылатәи Аҳәынҭқарреи рмассатә информациатә хархәагақәа русзуҩцәеи. 


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT