Аҧсны Аҳәынҭқарра Ахада

 

Атәылахьчара актәи аминистр, Леон иорден занашьоу, Аҧсны Афырхаҵа Владимир Аршба диижьҭеи 60 шықәса аҵра иазкыз аныҳәатә еизара иалахәыз рахь Ахада иажәа

30.05.2019

***

Ҳаҭыр зқәу​ ҳауаажәлар, ҳаҭыр зқәу аветеранцәа! 

Владимир Гьаргь-иҧа Аршба иналукааша арратә ҧызак, стратегк,​ ҳтәыла ахьчаҩцәа реидкылара, профессионалла разыҟаҵара зылшоз командирк иаҳасабала, дцәырҵит иаҳа Аҧсны данаҭахыз, уи амчхара анырҕәҕәатәыз аамҭазы. 

Ҳҳәынҭқарра ҭоурыхла иамаз ахьыҧшымра Абираҟ шьҭыхны, Аҧсны жәлар Рфорум «Аидгылара» ихацнаркхьаз жәлары зегь​ рықәҧара иацызҵаз, иҳаразкыз ҳнапхгаҩ ҕьеҩ, ҳаҧхьагылаҩ ду Владислав Арӡынба 80- тәи ашықәсқәа рынҵәамҭазы иҽазикит усҟан зыда ҧсыхәа ыҟамыз аҩныҵҟатәи архәҭақәа рполк аиҿкаара. Ишыжәдыруа еиҧш, уи аҭоурых аҿы иаанхеит хьӡи-ҧшеи згым​ «Аҧсуа гвардиа» ҳәа.

​Асеиҧш иҟоу амчратә структура ыҟамызҭгьы Аҧсны ашьапы ианықәгылоз аамҭазы,​ акыр иуадаҩхон Аҧсны Раҧхьатәи Апарламент иаднакылоз азакәанқәеи ақәҵарақәеи рыхьчара. Имариахомызт усҟантәи аамҭазы ҳтәыла азинқәа рыҿаҟәара иашьҭаз, ҳреспублика ашьапы иқәызҟьоз ақырҭуа национал-шовинистцәа рполитика-бааҧсы аҿагылара. Убри аҟнытә аҩныҵҟатәи архәҭақәа рполк аҕа иҟар хызҽуаз кәалӡык иаҩызахеит ҳаҧсадгьыл азы, ҳажәлар рзы. 

Амилаҭтә интересқәеи Аҧсны ашәарҭадареи рыхьчараҿы зҵакы ҕәҕәаз арратә еиҿкаарақәа реидкылараҿы ароль ду назыгӡоз, Владислав Арӡынба иарҕьажәҩаны ивагылаз арратә напхгаҩцәа ракәны ицәырҵуеит 80-тәи ашықәсқәа рынҵәамҭазы Владимир Аршба, Сергеи Дбар, Гиви Агрба, Мушьни Хәарҵкьиа, насгьы иахьа Аҧсны атәылахьчара аминистрра напхгара азҭо Мираб Қьышьмариа уҳәа гәыҧҩык аибашьцәа нагақәа, архәҭақәа рнапхгаҩцәа.​

Владимир Аршба даӡрыжәхьан Афганистантәи аибашьра амцеилашыра. 40-тәи ар рыҩныҵҟа артиллериатә полк абатареиаҿы аҧшыхәратә гәыҧ деиҳабын. Иара убас напхгара аиҭон аҧшыхәратә батареиа. Ианаршьахьан​ арратә ҳамҭақәа, иааирҧшхьаз агәымшәаразы. Иоухьан ахәра хьанҭақәа. 

Ақырҭуа агрессорцәа Аҧсны ианақәла раҧхьатәи амшқәа инадыркны, Агәыӡератәи абаталион аиҳабыс иҟаз Владимир Аршба тәамҩахә ҟамҵа, напы аиркуеит Аҟәа ақалақь ахыхьчаратә позициақәа рырҕәҕәара. 1992 ш. нанҳәа мзазы ддәықәырҵоит Тҟәарчалҟа Мрагыларатәи афронт аиҿкааразы. Хара имгакәа, Атәылахьчара Аҳәынҭкарратә Хеилак Ахада​ Владислав Арӡынба иқәҵарала, имаз апрофессионалтә ҧышәа ҳасаб азуны, Владимир Аршба​ дҟарҵоит Аҧсны Ар Рыдҵаҟаҵаҩыс, ашьҭахь - атәылахьчара аминистрс. Активла далахәын Аҧсны ар реиҿкаара, иналукааша ар рҧыза Султан Сосналиеви иареи аус​ еицадырулоит атәылахьчара аминистрра аилазаара, уи аиҿкаашьа.​ Владимир Аршба дыруаӡәкуп Гагратәи ажәыларатә операциа аҧшьгаҩцәа, насгьы​ амҩаҧгаҩцәа, аҳҭны-қалақь​ Аҟәа ахақәиҭтәразы ажәылара хадақәа реиҿкааҩцәа. Иџьабаа ҕәҕәа рыдуп аибашьра ашьҭахь Кәыдры аҩхааҿы, насгьы Гал араионаҿы антитеррористтә операциақәа рымҩаҧгара. 

​ Аибашьра ашьҭахь аинрал-леитенант Владимир Гьаргь-иҧа истратегиатә ҟыбаҩ, иеиҿкааратә ҟазшьа еилыхха иааҧшит Аҧсны Ар Рыштаб хада аиҳабыс , Атәылахьчара Аминистр актәи ихаҭыҧуаҩс аус аниуаз аамҭақәа рзы.

Илшамҭа дуқәа рзы уи ианашьоуп Леон иорден, насгьы – «Аҧсны Афырхаҵа» ҳәа ахьӡ ҳаракы. Ҳара иаҳуалҧшьоуп Владимир Аршба иеиҧш иҟоу аибашьцәа, акомандирцәа хьӡырҳәагақәа, арратә абиҧара ҿыц рааӡаҩцәа наунагӡа рыхьӡ акамыршәра, рнысымҩа ҿырҧшыгак еиҧш аӡыргара. Уи дыҟан, дагьаанхоит Аҧсны аҳәынҭқарра ахьыҧшымразы, уи атәылахьчаратә лшара аизырҳаразы зхы иамеигӡоз, профессионалк иаҳасабала здырреи, зҧышәеи раарҧшышьа иақәшәоз арратә ҧхьагылаҩны, аибашьцәа еиҿамсқәа мҩақәызҵоз, урҭ ирыхӡыӡаауаз, иҧшьоу​ Аиааира хацәынмырха​ азықәҧараҿы хьаҵрак ҟазымҵоз​ Аҧсны дапатриот дуны. Ҳхырхәоит аҧсуа инрал-нага, Аҧсны Афырхаҵа игәалашәара лаша аҿаҧхьа!



Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT