Аҧсны Аҳәынҭқарра Ахада

 

Ахада ауаажәларра рҧылараҟны иқәгылара

20.05.2019

Ахада ауаажәларра рҧылараҟны иқәгылара

Лаҵарамза 20 рзы Аҧсны Аҳәынҭқарра Ахада Рауль Ҳаџьымба ауаажәларра реизараҟны дықәгылеит, ауаажәларра-политикатә ҭагылазаашьа далацәажәеит.
***
Адепутат Бжьаниа игәамбзиара инадҳәаланы иҟалаз аҭагылазаашьазы. Иазгәасҭарц сҭахуп, ас еиҧш ахҭысқәа рыҿиара, раҧхьа иргыланы, иара аиҳабыра рхаҭа ишырзеиҕьым. Даҽазныкгьы исҳәоит, аоппозициа мамзаргьы уи ахаҭарнакцәақәак ааҟәымҵӡакәа аиҳабыра ирыдырҳәалоит арҭ апроцессқәа. Сара аҽыриашара салагом, ус акәӡам ҳәагьы агәра шәыргарагьы сгәы иҭаӡам. Уи азы иақәнагоу аусбарҭақәа ыҟоуп. Џьара аӡәы информациак имазар, арҭ аилазаарақәа рыҟны инеироуп, иҟоу шыҟоу ирҳәароуп. Убасҟан ауп апрокуратура аусбарҭақәа рганахьала ани ма ари аӡәы далкааны изы иҟарҵаз атәы аҳәара аныҟало.
Иџьаушьартәгьы иҟоуп, иахьа аҩыза Бжьаниа аоппозициаҟнытә ихадароу хаҿык иаҳасабала иӡбахә рҳәо иахьалагаз. Сара уи илшарақәа ларҟәны ихцәажәара хықәкыс исымаӡам, аха иазгәасҭарц сҭахуп, ҩымз раҧхьа еидҵоу аппозициатә мчқәа рахьтә аҧхьагылара зырҭо изы азҵаара шцәырҵыз. Ҳара ибзианы иаҳдыруеит апарламент аҩныҵҟа депутатцәақәак рыбжьарагьы, аоппозициатә мчқәа рыҩныҵҟагьы имҩаҧысуаз аиҧыларақәа ртәы. Ауаажәларра иузырцәыҵәахӡом имҩаҧысуаз ахҭысқәа, аидысларақәагьы налаҵаны. Сгәы иаанагоит, ара итәоу реиҳараҩык ари бзианы ирдыруеит ҳәа.
Иахьатәи ахшыҩрҵаҩцәа, даҽакала урҭ исызрызҳәом, аҵыхәтәанынӡа иаартны Бжьаниа икандидатура иаҿагыланы, даҽа кандидатурак иҧшаара иаҿын .Уи шәареи ҳареи иҳамдыруеи? Ауаажәларра ибзианы ирдыруеит ари апроцесс аҿы Бжьаниа ихаҭыҧан ауаа ҿыцқәа рықәыргылара иақәкны ишрымаз, рыжәлақәагьы рҳәеит. Урҭ ажәлақәа дара рыжәлантәқәа рҟынгьы ирылацәажәахьан. Аха анс акәу арс акәу, изыхҟьазаалак, арҭ ауаа ишырҭахыз еиҧш аусқәа рзеиҿымкааит.
Бжьаниа ичымазара атәы ҳҳәозар, раҧхьатәи амшқәа инадыркны, еидҵоу аоппозициатә мчқәа имҩаҧыргаз раҧхьатәи апресс-конференциа аан аиҿагыларатә ҟазшьа змаз аинформациа рыларҳәеит. Акымкәа аверсиақәа ааргеит усҟан, апневмониа инаркны ахәшә иҭара аҟынӡа. Убри аангьы Урыстәылатәи Афедерациа Агәабзиарахьчара аминистрраҟнытә иҟаҵаз адҵаалара анаҩс аҭак аашьҭын, 2011 ш. абҵара 21 аҟн. Урыстәылатәи Афедерациа атәылауаа ргәабзиара ахьчара ашьаҭақәа рзы Афедералтә Закәан ахәҭаҷ 13 аҧҟарақәа рыла «атәылауаҩ амедицинатә цхырааразы идҵаалара, игәабзиара аҭагылазаашьеи адиагнози, ичымазара аилкаареи ихәышәтәреи рымҩаҧгараан ироуз егьырҭ адыррақәа аҳақьымтә мырзарахь иҧхьаӡоуп» ҳәа. Абри абзац аҟны иҳәоуп Бжьаниа иганахьала амедицинатә ҟазшьа змаз ачымазара аилкаара шымҩаҧгаз, аха уи адиагноз азы ҳара еилкаа ҳамаӡам. Иара атәылауаҩ ма закәанла иара ихаҭарнаку ауаҩы дақәшаҳаҭхаанӡа арҭ адыррақәа рырзара ҟалаӡом, иара убас иара абри азакәан ахәҭаҷ 4 инақәыршәаны арҭ адыррақәа рыҭара ҟалоит азинхьчаратә еилазаарақәа иҟарҵо азыҳәарала. Рыцҳарас иҟалаз, иахьа уажәраанӡа иҟаҵәҟьоу адиагноз аҵакы, хыхь ишысҳәаз еиҧш, еилкааӡам.
Аха иазгәаҭазарц сҭахуп, ахәышәтәырҭаҟны инеиз ачымазаҩ иганахьала акриминалтә гәҩарақәа аныҟоу ма ианаарҧшу, амедусзуҩцәа изықәнагоу азинхьчаратә еилазаарақәа адырра рырҭароуп абри ахаҿы иганахьала хархәара змаз аусхкқәа инарымаданы. Ара ас еиҧш ҟамлаӡеит. Сара Урыстәылатәи Афедерациа азинхьчаратә еилазаарақәа рнапхгаҩцәа аӡәырҩы срацәажәеит. Урҭ ари аҩыза аинформациа рымаӡам. Аҧсны Агәабзиарахьчара аминистрра, апрокуратура хада, егьырҭ ҳзинхьчаратә еилазаарақәа хәыц-хәыц аинформациа аизгара иаҿуп. Бжьаниа ахәшә ширҭаз атәы зҳәаз ауаа аӡәа-аӡәала ирызҵааразы Апрокуратура хадахьы инаҧхьан, аха џьоукы аҭагылазаашьа аруадаҩреи ари аус акәша-мыкәша маӡа алацәажәареи иаҳа ишеиҕьаршьо убартә иҟоуп.
Ҳара ҳганахьала имҩаҧаҳгон, иагьымҩаҧаҳгоит Урыстәылатәи Афедерациа азинхьчаратә еилазаарақәа рхаҭарнакцәа аӡәырҩы рыҿцәажәарақәа. Изныкымкәа азинхьчаратә еилазаарақәа алархәны Ашәарҭадара Ахеилак аилатәарақәа мҩаҧаҳгахьеит. Иазгәаҳҭеит Агәабзиарахьчара аминистрреи Апрокуратура хадеи имҩаҧыргараны иҟоу ауснагӡатәқәа. Аҭагылазаашьа ишақәнагаз ала аусура мҩаҧаҳгомызт ҳәа ирҳәо мцуп. Уи ҟаҳҵон ҳара ҳәынҭқарратә ҵасла, аҕьал-пал ацымкәа.
Ари афакт ала Аҧсны Аҳәынҭқарра Апрокуратура хада рколлегацәеи дареи еидгыланы агәаҭарақәа мҩаҧыргоит ари аус аҟны аҵабырг ашьақәыргыларазы. Аҧсны Апрокуратура аусзуҩцәа Москва рколлегацәеи дареи еидгыланы аусура мҩаҧыргоит.
Иацы Бжьаниа иҭаацәараҟнытә раҧхьатәи аинформациа ҳауит ахәшәтәра апроцесс аруадаҩуеит ҳәа апневмониа. Логикала уазнеир, азҵаара цәырҵуеит, Бжьаниа апневмониа ихьаанӡа чымазарас имааз ҳәа, ахәшәтәырҭаҟны дназгеи аханатә ҳәа. Дара ирымоу адыррақәа рыла, Бжьаниа раҧхьа ахәшә ирҭеит, анаҩс апневмониагьы изацлеит ҳәа. Ус анакәха ачымазара амҩаҧысшьеи уи алҵшәақәеи зынӡа даҽакала иҟалон. Иорганизм аҟны иҟоу зыӡбахә рҳәо амаҭәашьарқәа рыла аҭагылазаашьа даҽакызаарын. Уи атәы аҳақьымцәеи азинхьчаратә усбарҭақәеи ирҳәап.
Иҟоу аинформациа ала, Бжьаниа аҵыхәтәаны Аҧсныҟа даанӡеи Москва ақ. 12-тәи ахәшәтәырҭаҟны днанагаанӡеи аамҭак Урыстәыла дыҟан, ахьҭа илаланы дахьыҟаз азы, игәамбзиара иахҟьаны. Уи атәы бзианы ирдыруеит Аҧсны Агәабзиарахьчара аминистрра аҳақьымцәа.
Аплазмаферез атәы ҳҳәозар, Бжьаниа ихәшәтәраҟны рхы иадырхәоз, иҭынхацәа ишырҳәо ала, ари аиҧш аметод рхы иадырхәоит ашьа арыцқьараан, иҕәҕәоу ареспиратортәи авирустәи инфекциақәа раан, иара убас уи хархәара арҭоит ашҳам ахарахара аан. Уи ара рхы изадырхәаз сара исзыӡбом. Амедикцәа ыҟоуп, дара ирҳәааит.
Ауаажәларра ирылаҳәоу Бжьаниа иорганизм иалоу аметалл хьанҭақәа рымҽхак азы Германиантә иаагоу арбагақәа ртәы. Иазгәасҭарц сҭахуп ауаҩы иорганизм аҟны Менделеев итаблица зегьы шыҟоу. Аеколого-медицинатә нормақәа инарықәыршәаны, иҟоуп аҿыҧшыгатә тестқәа ҳәа изышьҭоуи ашьеи ачхәреи ирылазар зықәнагоу артути егьырҭ аметалл хьанҭақәеи рнормақәеи. Германиантәи иаагоу аинформациа иаҳәоит арҭ амаҭәашьарқәа аорганизм аҟны ишааҧшыз атәы, аха џьаргьы иҳәаӡам уи иҧсҭазааразы ишәарҭоуп ҳәа. Урыстәылатәи Афедерациаҟны иҟоу аеколого-медицинатә нормақәа рырбагақәа еиҳа иеиҵоуп анемец клиникаҟнытә иааз анормақәа ирҿырҧшны.
Адепутат Бжьаниа ихьыз анаҩс аҵыхәтәантәи ахҭысқәеи быжь дула иго аҳәамҭақәеи рзы. Азҵаарақәа рацәоуп. Раҧхьа иргыланы, иахьагьы иҟаҵәҟьоу адиагноз ҳаздырӡом. Сгәы иаанагоит азҵаарақәа зегьы рҭакқәа ҳауп ҳәа.
Аҵыхәтәантәи амшқәа рзы активла аконституциатә реформақәа шаҭаху атәы рҳәоит. Абыжьқәа гоит апарламентаризм ахь аиасразы. Ҳазҭагылоу аамҭазы ҳҳәынҭқарразы аӡбамҭақәа лассы рыдкылара акраҵанакуеит. Убри аҟнытә апарламенттә формахь аиасра алацәажәара заацәоуп.
Иҟоу ауадаҩрақәа раангьы  ишаҳҭаху еиҧш иалымҵуазаргьы, шьаҿа-шьаҿала акәзаргьы, ҳара ҳтәыла иҿиалартә иҟаҳҵароуп. Изқәыркыз аҭагылазаашьа аруадаҩра абзиа ахылҵӡом. Абас еиҧш ала акы ҳаӡбоит ҳәа иаҿу ишәасҳарц исҭаху абри ауп, ҳажәлар, ҳҳәынҭқарра ашәарҭара иҭашәмыргылан. Ҳалшарақәа раамҭа маҷӡоуп, иҳалшо зегьы ҟаҳҵароуп ацивилизациатә уаажәларраны ҳанхарц азы. Бжьаниа итәы акәзар, саргьы, зегьы шәеиҧш, ари ауаҩ игәы бзиахар сҭахуп, ихьӡ алахәаахәҭразы рхы иадмырхәарц.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT