Аҧсны Аҳәынҭқарра Ахада

 

Ахада Аҧсны жәлар рахь иҟаиҵаз ааҧхьара

21.05.2019

Лаҵарамза 21 рзы Ахада Рауль Ҳаџьымба Аҧсны жәлар ааҧхьара ҟаиҵеит.

   ***

Ҳаҭыр зқәу ҳауаажәлар!

Ишыжәбо еиҧш, аоппозициатә мчқәа иқәдыргыло изакәандароу азҵаарақәа ирыхҟьаны, ҳтәылаҿы аҭагылазаашьа акыр иуадаҩхеит.

Шәызегь шәышҟа ааҧхьара ҟасҵоит иаашәырҧшырц аҟәыҕара, ачҳара. Аҧсны анапхгара, хаҭала сара, Аконституциа агарант иаҳасабала, иалҳаршароуп ҳауаажәлар рҭынчра, рзинқәа рыхьчара, ҳреспубликаҿы аҭышәынтәалара аиқәырхара.

Арҭ амшқәа рзы уаҩы ибартә иҟоуп аоппозициатә мчқәа адепутат Аслан Бжьаниа игәабзиареи имҩаҧысраны иҟоу ахада иалхрақәа рыҟны иалахәреи гәырҩас иҟаҵаны, уи мзызс рхы иархәаны, аус аҟны ирҭахыҵәҟьоу – иаамҭаӡамкәа ахада иҧхьатәара гәҭакы хаданы ишрымоу аадырҧшит.

Сара уажәаҧхьа исҳәахьеит адепутати уи ицхырааҩцәеи ргәабзиара гәцаракра ду аҭаны ахылаҧшра шаҭоу. Урыстәылатәи ҳколлегацәеи ҳзинхьчаратә усбарҭақәеи инҭырҳәыцааны аусҭҵаара мҩаҧыргоит.

Ишыжәдыруеиҧш, рыгәҭакқәа рынагӡаразы аоппозициа Аҧсны Жәлар Реизара - Апарламент ахыбра аҿаҧхьа ҿҳәарада амитинг, изиным акциақәа рымҩаҧгара иақәыркит: Бзыҧи Тамшьи рыбжьара автотрасса хада аанкылара, Аҟәа ақ. аҟны атроллеибустә нхамҩеи автобустә парки русура мчыла аанкылара, иара убас атәылаҟны иҭышәынтәалам аҭагылазаашьа аҧҵара зыхҟьо егьырҭ аусқәа.

Абри зегьы акурорттә аамҭа алагамҭазы имҩаҧысуеит. Ас еиҧш аҭагылазаашьа аруадаҩра аҧсшьаҩцәа аӡәырҩы аара иахьнархәыр алшоит.

Сара сықәгылараҟны исҳәахьеит алхрақәа ҭынч, Аҧсны Аҳәынҭқарра Аконституциала иазҧҵәоу аҿҳәара инақәыршәаны рымҩаҧгара иамоу аҵак ду атәы. Убас шакәугьы, аоппозициа амчқәа рхымҩаҧгашьала ауаажәларра-политикатә ҭагылазаашьа аибарххарахь инаргарц иаҿуп. Аҵыхәтәантәи аамҭазы иаҳбо ахҭысқәа амчра агара аҽазышәара атәоуп ирҳәо, аоппозициа аҧхьагылаҩцәа адемократиатә гәҭакы бзиақәа ирықәныҟәошәа шырҳәогьы.

Аҧсны аиҳабыра амчқәа ҳтәылаҟны аҭышәынтәалареи аҭынчреи реиламгаразы, ҳҳәынҭқарра аконституциатә ҵасқәа шьақәызҟьо апровокациатә усқәа раҧырҟәҟәааразы иаҭаху ауснагӡатәқәа зегьы мҩаҧыргоит. Абарҭ амшқәа рзы изныкымкәа Ашәарҭадаратә Хеилак иҟалаз аҭагылазаашьа хьанҭа амҩа иаша ақәҵара алацәажәаразы аилатәарақәа мҩаҧнагахьеит.

Аҳәара ҟасҵоит апровокациақәа шәыҽрылашәымгалан, ачҳареи агәаҽанызаареи шәымаз! Ҳтәылаҟны аҭынчра аиқәырхара шҳалшо агәра згоит.

Сара издыруеит, шәҟәыҕара, шәеилкаара ирыбзоураны имҩаҧысуа ахҭысқәа ииашаны шәышрызнеиуа! Ҳаҧсадгьыл аҿы ицәырҵуа ауаажәларратә-политикатә проблемақәа зегьы ӡбахароуп зинтә мҩала, ҭынч мҩала, жәлар рџьабаала иалыршоу аиааирақәа, ҳсуверенитет реиқәырхаразы!

 

 


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT