Аҧсны Аҳәынҭқарра Ахада

 

Имҩаҧысит Ахада хантәаҩра ззиуаз акурорттә аамҭа иазкыз Аминистрцәа реилазаара аилацәажәара

17.05.2019

Имҩаҧысит Ахада хантәаҩра ззиуаз акурорттә аамҭа иазкыз Аминистрцәа реилазаара аилацәажәара

Лаҵарамза 17 рзы имҩаҧысит акурорттә аамҭа иазкыз Аминистрцәа реилазаара аилацәажәара. Аилатәара хантәаҩра азиуан Аҧсны Ахада.

Акурортқәеи атуризми рминистр Авҭандил Гарцкиа аилацәажәара иалахәыз адырра риҭеит аусбарҭа имҩаҧнаго аусмҩаҧгатәқәа рзы:

«Аминистрра ишьақәыргылоу аплан инақәыршәаны аус ауеит. Иазгәасҭарц сҭахуп ҳазҭоу ашықәс хәажәкырамзазы Москва жәларбжьаратәи ацәыргақәҵаҟны аиқәшаҳаҭра ҳабжьаҵара хықәкыс изманы ҳаҭӡы абаразы инеиз ара ишаҳҭаахьоу, аус ҳацура шырҭаху атәы. Ҳара урыстәылатәи атуристтә агентцәа злахәу аӡыргара-информациатә турқәа рымҩаҧгара иахьагьы ҳаҿуп. Сынтәатәи ашықәс жьҭаарамзазы имҩаҧаҳгараны ҳаҟоуп сибратәи аҭыжьымҭақәа жәохә рыҟны аус зуа ажурналистцәа злахәхо апресс-тур.

Абри амчыбжь алагамҭазы имҩаҧысит урыстәылатәи аканалқәа рхаҭарнакцәа рҧылара. Ҳаиқәшаҳаҭны иҳаӡбеит 40 минуҭ ицо еиуеиҧшым атемақәа рыла 6 фильмк рҭыхра: акультура, аспорт, ақыҭа ҧсҭазаара, аетнографиа, амилаҭтә чыс уҳәа уб.егь. ирызкны. Арҭ аусмҩаҧгатәқәа хықәкыс ирымоуп ҳтәыла аӡыргара, уи иазку аинформациа рыларҵәара. Абарҭ амшқәа рзы аус ҳацызуа, «Библио-Глобус» акциақәа аазхәаз ҳпартниорцәа руаӡәык аҳәара ҟаиҵеит иааиҧмырҟьаӡакәа аус зуа дара рагентцәа рзы аӡыргаратә тур цәыббрамза анҵәамҭахьы аиагаразы, уажәы аусура ахьырацәоу, Аҧсны ахырхарҭала аҭирақәа бзианы иахьымҩаҧысуазы. Иара убас даҽа туроператор дуки ҳареи ҳаиқәшаҳаҭны ҭагалантәи амзақәа рзы атурқәа рымҩаҧгара ҳалагараны ҳаҟоуп.

Аҧхынтәи акурорттә аамҭазы атуристцәа еиҳарак амшын азы излаауа ала, изықәнагоу аусбарҭақәа аплиажтәи аекскурсиатәи туризм хкқәа ҷыдала хшыҩзышьҭра арҭароуп. Бжьаратәла 8 мшы ҧсшьара иаауа атурист 6 мыш аплиаж аҟны ихигоит, убри аҟнытә зҿлымҳара ду рыҭатәуп аплиаж, амшын аҧшаҳәа, апаркқәа, хымҧада, аекскурситә ныҟәарақәа.

Иазгәаҭатәуп, раҧхьаӡакәны аусура ишалагаз хәыда-ҧсада ацәаҳәа ласы, ари ацәаҳәала атуристтәцәа рызҵаарақәа рҭакқәа ҟарҵалоит Аминистрра аусзуҩцәа. Ари зыҟаҵаз ацәгьоурақәа рҿагыларазоуп аханатә, аха ҳара уи инацҵаны егьырҭ азҵаарақәа рҭакқәа рыҟаҵарагьы ҳазхиоуп. Иара убас акассақәа, аекскурсиамҩаҧгаҩцәа рыла аныҟәарақәа раан, аҳәааҟны ҳтуристтә обиектқәа ирызку аинформациа, зыҧшра зымуа аҭагылазаашьақәа рзы аҭелқәа зну акьыҧхьтә ҭыжьымҭақәа рыларҵәара ҳалагоит.

Ҳазҭагылоу аамҭазы ахыркәашарахь инеит аекскурсиамҩаҧгаҩцәа зхысуа аттестациақәа. Ари аусура аекскурсиатә маҵзурақәа рхаҭабзиара аиҕьтәра иазкуп».

Агәабзиарахьчара аминистр Ҭамаз Ҵахнакиа акурорттә аамҭа аламҭалазы имҩаҧгоу ауснагӡатәқәа ртәы далацәажәеит:

«Амедицинатә хылаҧшра аганахьала, ҳара ас еиҧш есышықәсатәи аусмҩаҧгатәқәа рымҩаҧгарызы аплан шьақәыргыланы иҳамоуп. Атуристцәа еиҳа иахьырацәоу Гагра араион аҟноуп, уантә иҳадҵаалогьы статистикала рхыҧхьаӡара еиҳауп. Аҧсшьара аамҭа ианасакьаҳәамҭоу уахыки-ҽнаки рыла идҵаало рхыҧхьаӡара 150 – ҩык рҟынӡа инаӡоит. Абри азы хырҧашьа змам ацхырааразы иара ахәшәтәырҭаҟны амаҵзура аусура ҳарҕәҕәоит. Иара убас урҭ ареспубликатә биуџьет ахарџьала ахәшәқәа, амедицинатә хархәагақәа рыла еиқәҳаршәоит, еиҳа иҳарҕәҕәоит афельдшертә ҳақьымтә бригадақәа. Ҳбиуџьет аҳәаақәа ирҭагӡаны араионтә хәшәтәырҭақәа еиқәҳаршәеит асанитартә транспорт ала, зыда ҧсыхәа ыҟам мыругала еибаҳҭеит, ари ацхыраразы хара ацара алнаршоит. Пицундатәи ахәшәтәырҭеи Цандрыҧшьтәи аполиклиникеи иара убас ацхыраара ласы аҟаҵара рылшоит. Графикла аҳақьымцәа дәықәаҳҵоит егьырҭ ахәшәтәырҭақәа рыҟнытә Гагратәи, Гәдоуҭатәи, иара убас еиҳа лассы-лассы иахьыдҵаало ахәшәтәырҭақәа рахь. Иҳаҩсыз ашықәс азы 8 000 – ҩык инареиҳаны атуристцәа хәыда-ҧсада амедицинатә цхыраара рыҭан».

Аҩныҵҟатәи аусқәа рминистр Гарри Аршба адырра ҟаиҵеит 2019 ш. акурорттә аамҭа аҩныҵҟала ашәарҭадареи ауаажәларратә леишәеи рышьақәыргылара иазку ауснагӡатәқәа рзы:

«Аминистраа иазнархиеит ацәгьоура аҿагылара, ашәарҭадара ашьақәыргылара, ауаажәларратә леишәа ахылаҧшра иазку 2019 ш. аҧхын-курорттә аамҭа аиҿкааратә, аоперативтә, апрофилактикатә усмҩаҧгатәқәа рыплан. Хырхарҭа хадақәаны иҟоуп:

- амчқәеи ахархәагақәеи рҭыҧ алхра, хаҭалатәи аилазаара аҷаҧшьара аграфик, апатрульмҩаҧгара амаршрутқәа рыплан инақәыршәаны, атәыла акурорттә раионқәа рыҟны ацәгьоура аҿагылара иазку аоперативтәи апрофилактикатәи усмҩаҧгатәқәа. Лаҵарамза акы инаркны Аҩныҵҟатәи аусқәа рминистрра хаҭалатәи аилазаара зегьы амаҵзура амҩаҧгара арежим ҕәҕәахьы ииагоуп. Изаамҭанытәиу аџьатә ҧсшьараҿы иҟоу амилициа аусзуҩцәа иазгәаҭоу аамҭазы аҧсшьараҟнытә ирхынҳәхоит;

- аҩныҵҟатәи аусқәа рыҟәшақәа зегьы рыҟны иазырхиоуп амаҵзура иахьахысуа аҭыҧқәа рҳәаа иҭагӡаны иаку аҭыҧ алхра апланқәа, апатруль-посттә нариадқәа ргыларҭа, рмаршрутқәа, дара-дара рыбжьареи аҷаҧшьаратә хәҭақәеи реимадара аиҿкаара, ишьақәыргылоуп Аҩныҵҟатәи аусқәа русбарҭақәеи Аҩныҵҟатәи аусқәа раппарат хадеи русзуҩцәа рганахьала апатруль-посттә маҵзура амҩаҧгашьа ахылаҧшразы аҧҟарақәа;

- абасала, атуристцәа массала изҭаауа акурорттә ҭыҧқәа робиектқәа зегьы, аекскурсиатә маршрутқәа рконтроль рхы иадырҵоит дасу изҵазкуа аҭыҧқәа рыҟны аҩныҵҟатәи аусқәа русбарҭақәа;

- Аҩныҵҟатәи аусқәа раппарат хадеи Аҩныҵҟатәи аусқәа араионтә усбарҭақәеи русзуҩцәа рымчқәа еибыҭаны акурорттә ҭыҧқәа рахь акриминалтә елементқәа реиҭаҵра зыруадаҩуа, уи алагьы урҭ имҩаҧыргар зуа ацәгьоурақәа еиҵазтәуа есқьынагьтәи ареидтә усмҩаҧгатәқәа еиҿкаахоит;

- хыҧхьаӡара рацәала атуристцәа хазхаҭалатәи асектор еиҳа еиҕьаршьоит. Ацуҭа амилициа рнапы иану аҭыҧ аҟны ҷыдала хылаҧшра азырулоит атуристцәа ахьаангыло аҭыҧ. Иеилкаауп, ари акатегориа иаҵанакуа амаҵзурақәа рбиуџьет шыҳаракым, аҧшәмацәа зегьы рыклиентцәа рмазара техникатә хархәагала ишақәнагоу хылаҧшра шырзамҭо, аха ари ҳазҭагылоу аамҭазы хымҧада иаҭаху уснагӡатәуп.

Амҩатә шәарҭадара азҵаараҟны иазгәаҭоуп ауснагӡатәқәа жәпакы:

- ареспубликатә трасса Ҧсоу-Егры аҟны иахьа аус зуа Амҩатә еиҭаҵра аҧҟарақәа реилагаразы автофиксациақәа инарываргыланы, аамҭа-аамҭала Аҳәынҭқарратә автоинспекциа Амҩатә патрультә маҵзурақәа рыстационартә постқәа «Ҧсоу», «Мысра», «Бамбора», «Ешыра», «Кәыдры» мыругала еиқәыршәатәуп Амҩатә еиҭаҵра аҧҟарақәа реилагара атәы зҳәо арбагақәа реизгареи аус рыдулареи рзы; Амҩатә еиҭаҵра аҧҟарақәа азгәазҭо акамерақәа рхыҧхьаӡара 15 цыра рҟынӡа ирыцҵатәуп;

Атәымтәылатә дыргақәа змоу атранспорттә хархәагақәа рганахьала амҩатә еиҭаҵра аҧҟарақәа реилагара аарҧшра мҩаҧгахароуп урҭ аилагарақәа автоматикатә фиксациа рзызуа ахархәагақәа рыла мацара, аласра арежим аконтроль азура ҟамлароуп аилагарақәа рышьақәыргыларазы амобилтә техникатә мыругақәа зхы иазырхәо еиҭаҵуа Амҩатә патрультә маҵзурақәа рыла.

 - раанкылара ҟамлароуп атәымтәылатә дыргақәа змоу атранспорттә хархәагақәа Амҩатә патрультә маҵзурақәа рыстационартә постқәа рынҭыҵ, убри инақәыршәаны мзызда ари автотранспорт хкы аанкыларагьы;

- уснагӡатәны иқәыргылоуп Аҳәынҭқарратә автоинспекциа алеишәатә контроль асистема арҕәҕәара».

Аилацәажәараан Ахада иазгәеиҭеит Аҳәынҭқарратә автоинспекциа атәымтәылатә дыргақәа змоу атранспорттә хархәагақәа аҧҟарақәа реилагара аныҟам раанымкыларазы ҿырҳәалатәи адҵақәа бааҧсны ишынагӡоу. Рауль Ҳаџьымба иаҵшьны иҳәеит абри инамаданы ҩрала адҵақәа шыҟаҵатәу.

Аҳәынҭқарра Ахада иазгәеиҭеит аҳәынҭқарратә ҳәаа иахысны иаауа афатә аалыҵ еиҳа ҷыдала аконтроль азура шаҭаху:

«Аҳазалхратә еилаки ари знапы иану егьырҭ аилазаарақәа зегьи иаауа аалыҵқәа ргәаҭара дырҕәҕәароуп».

Аилацәажәараан иара убас ишьҭыхын Пицунда автомҩақәа рырҽеира азҵаара. Аҳәынҭқарра Ахада иазгәеиҭеит амҩақәа рҭагылазаашьа аиҕьтәразы адҵақәа шыҟаҵоу.

Ахада Аҩныҵҟатәи аусқәа рминистрра анапы ианиҵеит атуристтә бизнес аҟны арахә изакәанымкәа рхархәара аанкыларазы аусура арҕәҕәара.

Атранспорт азы аҳәынҭқарратә усбарҭеи Ашәахтәқәеи аизгатәқәеи рзы аминистрреи ирыдҵоуп апассаџьырцәеи аидареи алицензиақәа рыла аҧсны-урыстәылатәи аҳәаа рахыгара ҕәҕәала хылаҧшра аҭара.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT