Ахада Ашәарҭадара Ахеилак аилатәара мҩаҧигеит

Лаҵарамза 17 рзы Аҧсны Аҳәынҭқарра Ахада Рауль Ҳаџьымба Ашәарҭадара Ахеилак аилатәара мҩаҧигеит. Аилатәараҟны изаамҭанытәиу ахада иалхрақәа рыламҭалазы иҟоу ауаажәларра-политикатә ҭагылазаашьа иалацәажәан.

«Апарламент адепутат Аслан Бжьаниеи ҩыџьа ицхырааҩцәеи ргәабзиаразы иҵабыргу аинформациа аҟамзаара ауаажәларраҟны аҭагылазаашьа аруадаҩуеит. Ҳтәылауаа џьоукы, Тамшь ақыҭаҟны аизараҿы еиҧш рцәажәарақәа аҭышәнымтәаларатә ҟазшьа рымоуп. Абри инамаданы знапы иану ҳусбарҭақәа уснагӡатәны рҿаҧхьа иқәгылоуп – хара имгакәа аусҭҵаараҟынӡатәи агәаҭарақәа рҳәаақәа ирҭагӡаны иҟоу аинформациа аизгареи аихшьала аҟаҵареи», - иазгәеиҭеит Ахада.

Рауль Ҳаџьымба Ашәарҭадара Ахеилак алахәцәа адырра риҭеит Урыстәылатәи Афедерациа амчратә еилазаарақәеи Ашәарҭадара Ахеилаки рнапхгаҩцәақәак ҭелла дышрацәажәаз. Урҭ Аҧсны Аҳәынҭқарра азинхьчаратә усбарҭақәа иақәнагоу аоперативтәи азинтәи цхыраара рырҭоит.

«Ари аҭагылазаашьаҟны аҳақьымтә мҳәа-мырзареи адиагноз алаҳәара алмыршареи рахь ахгарақәа ҟамлароуп ҳәа исыҧхьаӡоит», - иазгәеиҭеит Ахада.

Апрокурор хада Ашәарҭадара Ахеилак адырра риҭеит лаҵарамза 20 ашәахьа инаркны Урыстәылатәи Афедерациаҟны урыстәылатәи аколлегацәа аус рыцура иалаго агәыҧ шаҧҵоу, арҭ агәаҭарақәа раан ироуа аинформациа хара имгакәа ауаажәларра ишрызнагахо.


Возврат к списку