Урыстәылатәи Афедерациа Ацҳаражәҳәарҭаҟны имҩаҧысит Аџьынџьтәылатә еибашьра ду аҟны Аиааира амш инамаданы адкылара

Лаҵарамза 8 рзы Аҧсны Аҳәынҭқарра Ахада Рауль Ҳаџьымба Аџьынџьтәылатә еибашьра ду аҟны Аиааира амш иазкны имҩаҧысыз адкылара далахәын.


Аҷыдалкаатәи Азинмчызмоуи Урыстәыла Ацҳаражәҳәаҩ Алексеи Двинианин аветеранцәеи аусмҩаҧгатә ахь иааз асасцәа зегьи иааиуа Аиааира Амш ныҳәа рыдиныҳәалеит.
 
«Есышықәса арҭ ааҧын мшқәа рзы Урыстәылатәи Афедерациа аҭоурых аҟны зегь реиҳа зҵазкуа аныҳәа ду – Аиааира Амш ҳабацәа, ҳабдуцәа, урҭ рабацәа рфырхаҵара ду иамшны, аибашьраҟнытә изыхнымҳәыз рзы алахьеиқәра иамшны иазгәаҳҭоит. Шеи-шықәса ҳара гәадурала, ҳгәы ҧшаауа иаҳгәалаҳаршәоит аиааира ҳзаазгаз хьӡи-ҧшеи згым абиҧара, зегьы уалны иагьҳадуп асолдаҭцәеи урҭ аамҭа хьанҭақәа рхаан атыл аҟны аџьа збози реиҷаҳара, рхылаҧшра. Ҳара ибзианы иаҳдыруеит Аиааира аагара иацыз ацәыӡқәа, иаҳхашҭраны иҟаӡам миллионҩыла иҭахаз, аҧхасҭа ҕәҕәа зауз, ихыбгалаз аҭаацәарақәеи имиз ахәыҷқәеи ртәы. Иаҳгәалашәоит иҧыххаа иқәҵаз ақалақьқәеи ақыҭақәеи, афашисттә тәра иҭадыргыларазы иахырцаз ртәы. Акгьы ҳхамышҭӡеит, аӡәгьы даҳхамышҭӡеит», – иазгәеиҭеит Алексеи Двинианин.
 
Ахада Аџьынџьтәылатә еибашьра ду аҟны Аиааира иамоу аҵак ду азгәаҭо, аветеранцәа иҭабуп ҳәа реиҳәеит:
 
 «Аибашьраҟны Аиааира агара алыршахеит афырхацәеи, аҧсадгьыл ахьчаҩцәеи, хамеигӡаралатәи, жәларызегьтәи ақәҧареи ирыбзоураны. СССР егьырҭ ажәларқәа инарываргыланы усҟан Аҧсадгьыл ахьчаразы игылеит Аҧсны аҵеицәагьы. 55 нызқьҩык инареиҳаны Аџьынџьтәылатә аибашьра афронтқәа рахь ицеит. Урҭ рахьтә 17,5 нызқьҩык ҭахеит. Аҧсны иалҵыз арҧарцәеи аҭыҧҳацәеи рахьтә 22-ҩык Асовет Еидгыла Афырхаҵа ҳәа ахьӡ ҳаракы ранашьоуп. Абџьаршьҭыхла ари Аиааира зчаҧаз аибашьцәа, ашьҭахь атәыла аиҭашьақәыргылара напы адыркит.
 
Иага ихьанҭазаргьы ари азхәыцра, есышықәса урҭ ашықәсқәа рзы аҧсадгьыл ахьчаразы ақәҧара иалахәыз аветеранцәа рхыҧхьаӡара иагхо иаауеит. Аҳәынҭқарра иалшо зегьы ҟанаҵароуп аветеранцәа хылаҧшра шрымоу агәра ргаларц азы.
 
Акыр иаҳзаҧсоу аветеранцәа, иҭабуп ҳәа шәасҳәарц сҭахуп, агәабзиара, агәамч, ақәра нҵыра ду шәоуааит».
 
 Аџьынџьтәылатә еибашьра ду аветеранцәа Рреспубликатә хеилак Ахантәаҩы Алексеи Шониа адунеи ажәларқәа зегьы ирзеиҕьеишьеит аизҳазыҕьареи аҭынчреи:
 
 «Аибашьра ианалага ашьҭахь, Егри Ҧсоуи рыбжьара Аҧсны иалҵыз аӡәырҩы рхы иамеигӡакәа афашистцәа ирҿагылеит. Ахақәиҭра зхы ақәызҵаз ахаангьы хашҭшьа рықәым, Анцәа еигумырхан урҭ рҭаацәарақәеи дареи. Иҭабуп ҳазгәалашәо, ҳаҭыр ҳақәҵаны иҳазныҟәо. Иҟазааит есқьынгьы аҭынчра ҳадгьыл аҿы».

A65A1349.JPG
A65A1050.jpg
 


Возврат к списку