Аҧсны Аҳәынҭқарра Ахада

 

Ахада тҟәарчалаа рықалақь амш рыдиныҳәалеит

09.04.2019

Мшаҧымза 9 рзы Аҧсны Аҳәынҭқарра Ахада Рауль Ҳаџьымба тҟәарчалаа рықалақь амш рыдиныҳәалеит.

Адныҳәалараҟны, ҷыдала, иҳәоуп:

«Акыр иаҧсоу Тҟәарчалаа!

Гәык-ҧсыкала ишәыдысныҳәалоит итрадициатәу Тҟәарчал ақалақь Амшныҳәа! Ҳауаажәлар ибзианы ирдыруеит ҳақалақь-фырхаҵа аҭоурыхи, уи знысыз иуадаҩу амҩеи, Аҧсны ахақәиҭреи ахьыҧшымреи рзықәҧара аус аҿы тҟәарчалаа иаадырҧшыз агәымшәареи ртәы! Хашҭра ақәым 1989 шықәсазтәи ақырҭуа-аҧсуа еиҿагылара аан Тҟәарчалаа рыҷкәынцәа рхымҩаҧгашьа ҕьеҩ!

Аҧсны Аџьынџьтәылатә еибашьраан амацәаз иҭакыз, аблокада иацыз амлакреи-ахьҭакреи зхызгаз, аха ақырҭуа агрессиа аҿаҧхьа шьаҿакгьы ихьамҵыз Тҟәарчал ауааҧсыра ирылшеит ҳтәыла зегьы азы астратегиатә ҵакы ҷыда змаз аплацдарм аиҿкаара. Ақалақь ахьчаҩцәа – хьӡырҳәагақәа рымчала иаҧҵаз Тҟәарчалтәи аполк архәҭақәа рылахәын Мрагыларатәи афронт еиуеиҧшым ажәыларатә операциақәа. Рыхьӡ кашәара ақәымзааит зыҧсадгьыл зхы ақәызҵаз тҟәарчалаа рҵеицәа – еиҿамсқәа!

Иахьа Тҟәарчал ақалақьи Тҟәарчал араиони рҭагылазаашьа маҷ-маҷ аиҕьхара иаҿуп. Ахаҿра рҿыцуп ақалақь ацентр, ирыгу-ирыбзоу ҟаҵахоит Тҟәарчалтәи ахәышәтәырҭа, аџьармыкьа, егьырҭ асоциалтә обиектқәа. Хҭыс дуны иҟалеит ақалақь агәҭаны Аҧсны Аҳәынҭқарра Актәи Ахада Владислав Арӡынба ибаҟа ахьаартхаз, агәцаракра ҷыда ахьаиуз уи ихьӡ зху амҩаду. Инагӡахоит Бедиатәи амҩа аиҭашьақәыргылара иазку апроект. Аҧсны анапхгара ирылшо зегьы ҟарҵалоит тҟәарчалаа рыбзазашьа шьаҭанкыла аиҕьтәразы.

Ишәзеиҕьасшьоит агәамч ҕәҕәа, агәалаҟара бзиа, аманшәалара, ҧхьаҟатәи аихьӡара ҿыцқәа».


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT