Аҧсны Аҳәынҭқарра Ахада

 

Ахада зхы иақәиҭу ақәҧаразы Урыстәылатәи Афедерациа еизгоу аолимпиатә команда алахәцәа идикылеит

01.04.2019

Ахада зхы иақәиҭу ақәҧаразы Урыстәылатәи Афедерациа еизгоу аолимпиатә команда алахәцәа идикылеит

Хәажәкырамза 31 рзы Аҧсны Аҳәынҭқарра Ахада Рауль Ҳаџьымба зхы иақәиҭу ақәҧаразы Урыстәылатәи Афедерациа  еизгоу аолимпиатә команда алахәцәа идикылеит.

Ахада асасцәа аҧсшәа реиҳәеит.

"Аҧсны шәахьызбаз  сара сзы гәахәароуп. Гәахәароуп ҳара ҳзы аспортсменцәа рыбжьара аимадара ахьыҿио, иахьеизҳауа.  Ҳара ҳзы акраҵанакуеит Аҧсны  аӡбахә ахьырдыруа аспорт ахырхарҭалагьы. Ҳаспортсментцәа аӡәырҩы адунеи аҿы ибзианы еицырдыруеит, еиуеиҧшым аспорт хкқәа рҿы рхы бзианы иаадырҧшуеит. Аҧсны ижәытәӡатәиу аспорт аҧсҭазаара амоуп, ҳара абри аусхк аҟны ҳусеицура иацаҳҵалар, иҳарӷәӷәалар ҳҭахуп. 
Ҳарҭ ҳолимпиатә еилакы атәыла анҭыҵтәи аизыҟазаашьақәа рышьақәыргылара иашьҭоуп, еиуеиҧшым аиқәшаҳаҭрақәа ирыҵаҩуп. Гәыҩбарада ҳаимадарақәа реизырҳара аҭахуп ҳәа исыҧхьаӡоит", - иҳәеит Ахада.
Зхы иақәиҭу ақәҧаразы Урыстәыла зҽаҧсазтәыз азыҟаҵаҩ, Аҩада Уаҧстәыла - Аланиа,  зхы иақәиҭу ақәҧаразы азыҟаҵаҩ хада Марик Тедеев Ахада иҟаиҵаз адкыларазы иҭабуп ҳәа иеиҳәеит. 


"Ҳара Аҧсны Аҳәынҭқарра Аолимпиатә еилакы даара иаҳҭахны аус ацаҳуеит. Иаҳҭахуп Аҧсны шықәсык ахьтә знык иадамхаргьы, зхы иақәиҭу ақәҧаразы Урыстәыла  амилаҭтә команда аизгара. Ара алшарақәа зегьы ыҟоуп ахәмаррақәа рымҩаҧгаразы. Ус еиҧш аҭагылазаашьа ҟалар, даара ибзиан. Аҧснытәи аспортсменцәа изныкымкәа зыӡбахә ҳәоу аспорт хкаҿы ирымоу аҩаӡара ҳаракы аадырҧшхьеит. Ҳарҭ агәра ҳгоит еизҳауа аҿар аҟыбаҩ шрымоу, урҭ рыҿиара аус ҳхы алаҳархәырц  ҳҭахуп", - иҳәеит Марик Тедеев.

Аҳәынҭқарра Ахада ари ажәалагала адгылара аиҭеит. Амилаҭ Олимпиатә еилакы Ахада Валери Аршба иазгәеиҭеит, Аҧснытәи Олимпиатә еилакы Урыстәылатәи  Олимпиатә еиҿкаара излалшо ала аимадара арӷәӷәара ишацхраауа. 
Абаҩрҵәыреи аспорти рзы Аҳәынҭқарратә еилакы ахантәаҩы Баграт Хәытаба, асасцәа ирзеиҭеиҳәеит ҳтәылаҿы аспорт ахырхарҭала  иҟоу аиҭакрақәа ртәы. 
"Зхы иақәиҭу ақәҧаразы Урыстәылатәи аизга – адунеи аҿы зегь реиҳа иӷәӷәоу командоуп. Имҩаҧысраны иҟоу Европатәи Ачемпионати Адунеизегьтәи Ачемпионати рҿы шәара ҳшәыдгылоит, шәеихьӡарақәа ҳреигәырӷьоит. 
Абаҩрҵәыреи аспорти русхк аҿиараҟны ауаа рхыҧхьаӡара аганахьала аиҭакра дуқәа ҳамоуп, иара убас аспорттә инфраструктура аҿиара аус аҟынгьы. Аҧсны абаҩрҵәыреи аспорт хкқәеи рганахь ала, иазгәаҭоу аплан инақәыршәаны апрограмма аҿиара аус адаҳулоит. Ҳәарада, Аҧсны аспорт аҿиара иацхраауеит еицаҳзеиҧшу аспорттә усмҩаҧгатәқәа", - иҳәеит Баграт Хәытаба. 

 1.jpg



Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT