Аҧсны Аҳәынҭқарра Ахада

 

Ахада Виолетта Маанҧҳа дидикылеит

26.03.2019

Ахада Виолетта Маанҧҳа дидикылеит

 Хәажәкырамза 26  рзы Аҧсны Аҳәынҭқарра Ахада Рауль Ҳаџьымба Аҧсны Жәлар рартист Виолетта Маанҧҳа лиубилеитә мшы лыдиныҳәалеит. 
Аҳәынҭқарра Ахада инаҵшьны иазгәеиҭеит Аҧсны Аҳәынҭқарра аҟазареи акультуреи рыҿиараҿы Виолетта Маанҧҳа иналыгӡо ароль. 

«Шәара шәыҧсадгьыл аҟнеиҧш, уи анҭыҵгьы ибзианы шәырдыруеит. Даара бзиа шәырбоит, шәырҿиаратә мҩа ахә ҳаракны иршьоит ахәаҧшҩцәа. Акыр шықәса атеатр абзиабаҩцәа алшара рымазааит Шәарҭ асценаҿы шәбаразы, шәацәажәаразы, иҿырҧшыгоуп шәҧышәеи шәҟәыҕареи. Ишәзеиӷьасшьоит агәабзиара, агәамч, аихьӡарақәа шәнапы злаку аусқәа зегьы рыҟны»,- иҳәеит Ахада.

Виолетта Маанҧҳа, Аҳәынҭқарра Ахада ҭабуп ҳәа иалҳәеит иҟаиҵаз адныҳәаларазы.

«Иҭабуп ҳәа шәасҳәоит исышәҭаз ааҧхьареи азҿлымҳареи рзы. Асценахь санцәырҵ аҧхьатәи амш  инаркны исылшоз зегь ҟасҵон, избанзар гәыла-ҧсыла исныруан аҟазарахь исымаз абзиабара.  Сыжәлар рзы ихәарҭаз акы сзыҟаҵазар, сара сзы уи зегь иреиҳау ҳамҭоуп. Еимгеимцарак иадамхаргьы ҳажәлар рыҧсҭазаара гәырӷьарак сзалагалазар, суал насыгӡеит ҳәа сыҧхьаӡоит. Сара даара исҭахуп сыҧсҭазаара зегьы ззыскыз атеатр, ауадаҩрақәа ириааины ҧхьаҟа ицаларц», - лҳәеит Виолетта Маанҧҳа. 

Аҧсуа ҳәынҭқарратә драматә театр Адиректор хада  Нодар Ҷанба адныҳәаларақәа ирыцҵаны иҳәеит: 
 
«Сара ибзианы исгәалашәоит, Шәара шәызлахәыз аспектакльқәа рыпремиерақәа рахь абилеҭқәа раахәара уахьӡаӡомызт. Схаҿы исзаагомызт театрк аҿы аусеицура ҳалагоит ҳәа. Анцәа иџьысшьоит Шәара ҳатеатр аҟны аус ахьыжәуа. Аҿар рзы шәҿырҧшыгоуп, ари даара акраҵанакуеит».

Аҭҵаарадырреи, акультуреи, аҵареи рзы Ахада Иабжьгаҩ Владимир Занҭариа иаҵшьны иҳәеит Виолетта Маан аҧсуа театр аҿиараҟны ллагаламҭа шырацәоу. Акультуреи аҭоурых-культуратә ҭынха ахьчареи рминистр Ельвира Арсалиа иазгәалҭеит Виолетта Маан лиубилеи азгәаҭара аҳәаақәа ирҭагӡаны ишеиҿкаахо ари арыцхә иазку атеатртә усмҩаҧгатәқәа.  



Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT