Аҧсны Аҳәынҭқарра Ахада

 

Ахада Баграт Хәытабеи Валери Аршбеи идикылеит

16.03.2019

Хәажәкырамза 15 рзы Аҧсны Аҳәынҭқарра Ахада Рауль Ҳаџьымба идикылеит Абаҩрҵәыратә культуреи аспорти рзы аҳәынҭқарратә еилакы ахантәаҩы Баграт Хәытабеи Амилаҭтә олимпиатә еилакы ахада Валери Аршбеи Шьамтәылатәи Арабтә Республикаҟны рыҟазаара аихшьалақәа инарымаданы.

Шьамтәылатәи Арабтә Республикаҟны иаҵаҩын Аҧсны Амилаҭтә олимпиатә еилаки Шьамтәылатәи Аолимпиатә еилаки рыбжьара аилибакаареи аусеицуреи рзы Амеморандум.

Ахада ари ахҭыс аҳәынҭқарразы иамоу аҵакы ахә ҳаракны ишьеит.

«Шьамтәылатәи Арабтә Республикеи Аҧсны Аҳәынҭқарреи рыбжьара иаҵаҩу Аиқәшаҳаҭрақәа ҳара ҳзы акыр рыҵаркуеит. Урҭ ҩныҵҟала ихарҭәаалатәуп. Ари аполитикеи аекономикеи рыдагьы, егьырҭ аусхкқәагьы ирыдҳәалоуп. Аспорт арҿиара – ихадоу ахырхарҭақәа ируакуп, уи абиҧара ҿыцқәеи ауаажәларра зегьи ргәабзиара ацхраара иазкуп.

Аҧсни Шьамтәылеи р-Олимпиатә еилакқәа рыбжьара изҵаҩу аиқәшаҳаҭра ҳҳәынҭқарразы акраҵанакуеит. Сгәы иаанагоит иҳамоу алшарақәа ҳазхазҵаз аҳәынҭқаррақәа еиуеиҧшым ахырхарҭақәа рыла еиҳа гәацҧыҳәарала аус рыцуразы ҵаҵҕәы бзиақәоуп», – иазгәеиҭеит аҳәынҭқарра Ахада.

Баграт Хәытаба далацәажәеит изҵаҩу адокументқәа иазҧхьагәарҭо аусеицуразы аусхк хадақәа:

«Шьамтәылатәи Арабтә Республикеи Аҧсны Аҳәынҭқарреи рыбжьара аспорти аолимпиатә ҵысреи русхк аҟны аусеицуразы иҟашәҵаз анапынҵа нагӡоуп. Шьамтәылатәи Аилаки Аҧсны Аилаки русеицуразы Амеморандум анапаҵаҩра ҳара Шьамтәылатәи Арабтә Республикеи Аҧсны Аҳәынҭқарреи рыдгьылҵакыраҟны аҧышәеимдара, аспорттә усмҩаҧгатәқәа реиҿкаара ҳалнаршоит. Ари ҳара ҳзы акраҵанакуеит. Убри аан Аҧсны аспортсменцәа руаӡәк зхы иақәиҭу ақәҧаразы Ачемпионат иалархәразы азыҳәара ҟаҵоуп. Уи мҩаҧысуеит цәыббрамзазы Казахсҭан, мшаҧымза анҵәамҭазы – Китаи имҩаҧысраны иҟоуп Азиа Ачемпионат аҟны».

 A65A4636.JPG


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT