Аҧсны Аҳәынҭқарра Ахада

 

Ахада Урыстәыла Ашәҟәыҩҩцәа реидгыла аделегациа идикылеит

25.02.2019

Ахада Урыстәыла Ашәҟәыҩҩцәа реидгыла аделегациа идикылеит

Жәабранмза 25 рзы Аҧсны Аҳәынҭқарра Ахада Рауль Ҳаџьымба Урыстәыла Ашәҟәыҩҩцәа реидгыла аделегациа идикылеит.

Аҳәынҭқарра Ахада Аҧсни Урыстәылеи ашәҟәыҩҩцәа рыбжьара аимадара арӷәӷәара хықәкыс измоу, Урыстәыла Ашәҟәыҩҩцәа реидгыла  аделегациа иаланы иааз асасцәа аҧсшәа реиҳәеит. 
"Ҳарҭ жәытәаахыс ҭоурыхла ҳаимадоуп. Ҳарҭ ҳәынҭқаррак аҿы ҳанхон, ҳарҿиарагьы ҳәынҭқаррак аҟны имҩаҧысуан. Ҳәарада, ҳара ҳаизыҟазаашьақәа аҧхьаҟагьы аҿиара роуроуп. Сара иҭабуп ҳәа шәасҳәоит абас еиҧш иҟоу аҧшьгара шәыманы ҳтәыла шәахьаҭааз, иахьа ҳашәҟәыҩҩцәеи ҳпублицистцәеи шәахьрылагылоу. 
Шәара Аҧсны шәыҟазаара аҧсуа литература ашьаҭаркҩы Дырмит Гәлиа 145шықәса ихыҵра арыцхә иақәшәеит. Иахьа, аамҭа уадаҩ аан иара дызлагаз аус узықәгәыӷша анапқәа рҿы иҟоуп ҳҳәар ҳалшоит. 
Ҳара Аҧсни Урыстәылеи реизыҟазаашьақәа аҧхьаҟагьы иҿиалар ҳҭахуп. Гәык-ҧсыкала ишәзеиӷьасшьоит шәусураҿы ақәҿиарақәа», - иҳәеит Ахада.

Урыстәыла Ашәҟәыҩҩцәа реидгыла Ахантәаҩы Николаи Иванов Ахада иҭабуп ҳәа иеиҳәеит иҟаиҵаз адкыларазы.
«Урыстәыла Ашәҟәыҩҩцәа реидгылаҟны даара иаҳҭахуп зхатә стиль змоу, збызшәа ҧшӡоу Аҧсны ашәҟәыҩҩцәеи ҳареи ҳаимадарақәа еиҭашьақәыргылазарц.  Ҳара еилаҳкаауеит аамҭаказы ҳаимадарақәа шыҧсыҽыз, аха урҭ ырӡӡамызт. Уажәы Краснодартәи ашәҟәыҩҩцәа реиҿкаареи Аҧсны Ашәҟәыҩҩцәа реидгылеи русеицуразы аиқәшаҳаҭра иаҵаҩуп. Аус руеит Москвеи Аҟәеи реиҭагаҩцәа, ицәырҵит еиҭагоу ашәҟәқәа, уи ҳара агәахәара ҳнаҭоит. Ҟарачы-Черқьесиеи Аҧсни рышәҟәыҩҩцәа аимадара бзианы ирыбжьоуп», - иҳәеит Николаи Иванов.

Иаагозар, ирылацәажәараны иҟоуп аҧсуа шәҟәыҩҩцәа урыстәылазегьтәи ашәҟәыҩҩцәа реицлабрақәа, иара убас ашәҟәыҩҩцәа рсеминарқәа, алитературатә ҧхьарақәа рылархәразы алшарақәа.
Аҧсны Ашәҟәыҩҩцәа реидгыла Ахантәаҩы Вахтанг Аҧҳазоу иазгәеиҭеит Аҧсны ашәҟәыҩҩцәа аҵак ду шарҭо Урыстәыла ашәҟәыҩҩцәа рделегациа аара.

«Ҳәарада, ҳара Аҧсни Урыстәылеи рыбжьара алитературатә еимадарақәа реиҭашьақәыргылареи рыҿиареи аҭахуп ҳәа иҳаҧхьаӡоит. Аҧсуа шәҟәыҩҩцәа ахаангьы аурыс бызшәахь еиҭаргон раҧхьаӡа иргыланы. Аурыс бызшәахьтә егьырҭ абызшәақәа рахь. Ҳара ҳзы аурыс бызшәа есқьынгьы аҵак ду шамоу иаанхоит.

Иҟоуп хаҭалатәи аизыҟазаашьақәа, ҳара ари аимадара адгылара аҳҭар ҳҭахуп. Аҵыхәтәантәи ашықәсқәа рзы Урыстәыла Ашәҟәыҩҩцәа реидгыла арегионтә ҟәшақәеи ҳареи ҳабжьара аимадарақәа шьақәгылеит, раҧхьа иргыланы, Аҩадакавказтәи аиашьаратә республикақәеи, Краснодартәи атәылаҿацәтә еиҿкаареи ҳареи ҳабжьара.
Аҧхьаҟа иазҧхьагәаҭаны иҳамоуп Крыми егьырҭ арегионтә ҟәшақәеи ҳареи ҳабжьара аиқәшаҳаҭра ҳабжьаҵара. Урыстәыла ашәҟәыҩҩцәа реидгыла аделегациа аара хҭыс бзиоуп ҳәа иҳаҧхьаӡоит избанзар уи аусеицура атрадициақәа рырҿыцра атәы аҳәоит», - иҳәеит Вахтанг Аҧҳазоу.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT