Ахада асоветтә ар Афганистан алгара иазкны имҩаҧысыз аныҳәатә еилатәара далахәын

Ахада асоветтә ар Афганистан алгара иазкны имҩаҧысыз аныҳәатә еилатәара далахәын

Аҧсны Аҳәынҭқарра Ахада Рауль Ҳаџьымба Атәылахьчара аминистрраҟны асоветтә ар Афганистан алгара иазкны имҩаҧысыз аныҳәатә еилатәара далахәын.

Аҳәынҭқарра Ахада 1992-1993шш. Аҧсны Аџьынџьтәылатә еибашьраан Аҧсны Аҳәынҭқарраҟнытә Афганистан аибашьра иалахәыз рҧышәа иамаз аҵакы згәеиҭеит.   

«Аибашьра алагамҭазы Афганистан зхызгаз арҧарцәа рыла ишьақәгылан аҕа иҿагылаз архәҭақәа  акыр. Ашьҭахь урҭ ҳархәҭақәа реиҿкаараҟынгьы активла иалахәын. Ирымаз аибашьратә ҧышәа хықәкыла рхы иадырхәон Қырҭтәыла аганахьала иаауаз ажәылара аанкыларазы Аҧсны жәлар рықәҧараҟны, иргаз аиааираҟны.   

Иахьа Атәылахьчара аминистрра аилазаараҟны зусура иацызҵаз зегьы гәык-ҧсыкала ишәзеиҕьасшьар сҭахуп агәабзиара, агәамч, ақәҿиарақәа.   

Сара иҟасҵаз адҵала Аминистрцәа реилазаараҟны иаздырхиараны иҟоуп аибашьцәа –афганцәа рзы ҧарала ацхыраара ашәагааи уи азоужьразы аҧҟареи ирызку ақёәҵара апроект. Уи инақәыршәаны, аибашьцәа-афганцәа ҧарала ацхыраара рыҭалахоит ҧхынгәымза акы инаркны х-нызқь мааҭ рҟынӡа. Абри ауп макьана аҳәынҭқарра иалшо. Аҧхьаҟа иааиуа ашықәс азы ари ҳтәыла абиуџьет аҟны иарбахоит. Сгәы иаанагоит ари азҵаара еиҳа еиҕьны аӡбара аҭахуп ҳәа», - иҳәеит Ахада.

Аныҳәатә еилатәараҟны «Аиааиразы» аиубилеитә медальқәа  ранашьан Афганистан аибашьцәа-аветеранцәа, иара убас 1992-1993шш. Аҧсны Аџьынџьтәылатә еибашьра аветеранцәа. 

1992-1993шш. Аҧсны Аџьынџьтәылатә еибашьраҟны аиааира агараҿы алагаламҭазы «Аиааиразы» амедаль ранашьоуп:  


Бганба Мурман Иасон-иҧа;
Воуба Нугзар Шьаликәа -иҧа;
Гарбузов Олег Евгени-иҧа;
Гәарамиа Даур Николаи-иҧа;
Голордава Мераб Шьоҭа-иҧа;
Дочиа Геннади Кәырҕа-иҧа;
Ҧачлиа Валери Григори-иҧа;
Ҧачлиа Омари Сеуарна-иҧа;
Харчлаа Гизо Владимир-иҧа;
Хаҳәбиа Гәури Баграт-иҧа;
Шьакаиа Рома Ушьангьи-иҧа;
Шьанаа Бондо Кондрат-иҧа;
Шарабиӡе Дырмит Леуан-иҧа.
--

 


Возврат к списку