Аҧсны Аҳәынҭқарра Ахада

 

Ахада аилацәажәара мҩаԥигеит Аԥсны Аҳәынҭқарра азеиԥшуаажәларратә тәылауаҩшәҟәқәеи анхаразы азини ирыдҳәалоу азҵаатәқәа ирызкны

29.01.2019

Ажьырныҳәамза 29 рзы Аԥсны Аҳәынҭқарра Ахада Рауль Ҳаџьымба аилацәажәара мҩаԥигеит Аԥсны Аҳәынҭқарра азеиԥшуаажәларратә тәылауаҩшәҟәқәеи анхаразы азини ирыдҳәалоу азҵаатәқәа ирызкны.

Аҩныҵҟатәи аусқәа рминистрра атәылауаҩшәҟәтәы усбарҭа аиҳабы Едуард Манаргиа аилацәажәара иалахәыз иреиҳәеит ҳазҭагылоу аамҭазы ауааҧсыра ишрыҭоу зынӡа 99 345 ауаажәларратә тәылауаҩшәҟәы, 9 550 –рыҭара ишазыхиоу, 10 220 - аус адулара шымҩаҧысуа.

Едуард Манаргиа иара убас, Аҳәынҭқарра Ахада адырра ииҭеит раионцыҧхьаӡа шаҟа цыра рырҭахьоу, рыҭара иазхиоу, зеиқәыршәара мҩаҧысуа адокументқәа, иара убас анхаразы азин рыҭаразы адокумент иазку аинформациазы.

Ахада Аҩныҵҟатәи аусқәа рминистрра атәылауаҩшәҟәтәы усбарҭа адҵа аиҭеит араионқәеи ақалақьқәеи русбарҭақәа рхадацәа еиқәыршәоу атәылауаҩшәҟәқәа зымгац атәылауаа рсиа рыҭазарц, иара убас атәылауаҩшәҟәы ҽыцқәа риоуразы адокументқәа алазымҵац рзы аҭыԥантәи администрациақәа абри апроцесс ацхыраара арҭарц азы.

Аҳәынҭқарра Ахада инаҵшьны иазгәеиҭеит, иазԥхьагәаҭоу Аԥсны Аҳәынҭқарра Ахада иалхрақәа инарымаданы, Аҩныҵҟатәи аусқәа рминистрра атәылауаҩшәҟәтәы усбарҭаҟнытә ирҿыцу аинформациа ианаамҭоу Алхырҭатә комиссиа хадахь анашьҭра шаҭаху атәы.

Аҩныҵҟатәи аусқәа рминистр Гарри Аршба иазгәеиҭеит аусбарҭа шазхиоу араионқәеи ақыҭақәеи радминистрациақәа атәылауаҩшәҟәқәа рыҭара апроцесс арласра, ианаҭахха, атәылауаҩшәҟәтәы усбарҭа аусзуҩцәа атәылауаа рышҟа рцарагьы налаҵаны.

Ахада идҵала, Адәныҟатәи аусқәа рминистрреи араионқәа радминистрациақәа рхадацәеи еиҭадырҿыцуеит атәылауаҩшәҟәқәа рыԥсахразы атәылауаа радԥхьаларазы аинформациатә усура.

Ақалақьқәеи араионқәеи рхадацәа мчыбжьык иалагӡаны, Аԥсны Аҳәынҭқарра атәылауаҩшәқәа рыԥсахразы аусурақәа рылҵшәазы аҳасабырба ҟарҵараны иҟоуп.

 



Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT