11.01.2019
Аԥсны Аҳәынҭқарра Ахада Рауль Ҳаџьымба Венесуелаҟа иусратә ныҟәарақәа раан Боливариантәи Ареспублика Ахада Николас Мадуро диԥылеит.
Николас Мадуро Рауль Ҳаџьымба аԥсшәа иеиҳәеит, иҭабуп ҳәагьы ахиҳәааит ивизити аинаугурациа иазкыз ацеремониа ихы ахьалаирхәызи рзы.
Ахада иазгәеиҭеит, Аԥсны Аҳәынҭқарра аҵак ду шанаҭо Аԥсни Венесуелеи ирыбжьарҵаз аҳәынҭқаррабжьаратә еизыҟазаашьақәа .
«Аԥсны аҵак ду анаҭоит Боливариантәи Ареспублика Венесуелеи ҳареи иҳабжьоу аҳәынҭқаррабжьаратә еизыҟазаашьақәа. Ҳара ҳтәылақәа ирыбжьоу аиқәшаҳаҭрақәа рынагӡареи ҳаимадарақәа реизырҳареи аҭахны иҳаҧхьаӡоит»,-иҳәеит Рауль Ҳаџьымба.
Николас Мадуро ишьақәирӷәӷәеит Аԥсны Ахьыԥшымра азхаҵаразы аӡбамҭеи Аԥсни Венесуелеи ирыбжьарҵаз аҳәынҭқаррабжьаратә еиқәшаҳаҭрақәа рынагӡареи адгылара шриҭо атәы.
Ажьырныҳәамза 10- 11 рзы имҩаԥысит Аԥсны Аҳәынҭқарра Ахада Венесуелаҟа ивизит. Ажьырныҳәамза 10 рзы Николас Мадуро иҟаиҵаз ааԥхьарала, Рауль Ҳаџьымба Венесуела Ахада имаҵура аанкылара иазкыз аусмҩаԥгатә далахәын.