Аҧсны Аҳәынҭқарра Ахада

 

Ареспублика Сальвадор Ахада Санчес Серен иҧылара

11.01.2019

Ареспублика Сальвадор Ахада Санчес Серен иҧылара

Аҧсны Аҳәынҭқарра Ахада Рауль Ҳаџьымба Боливариантәи Ареспублика Венесуела визит ҳасабла иҟазаараан Ареспублика Сальвадор Ахада Санчес Серени иареи еиҧылеит.

Рауль Ҳаџьымба иазгәеиҭеит Сальвадор аҳәынҭқарра Ахадеи иареи реиҧылара аҵак ду.


«Ҳаиҧылара аҵак ду амоуп ҳәа иҳаҧхьаӡоит. Аҧсны адунеи аҟны еиуеиҧшым атәылақәа рыбжьара аиҩызара ашьақәыргылара иашьҭоуп. Ҳара гәахәарыла иҳадаҳкылоит Венесуелеи Никарагуеи инарываргыланы, Ареспублика Сальвадори ҳареи ҳабжьарагьы аизыҟазаашьа бзиақәа шьақәгылар»,- иҳәеит Ахада. 

Санчес Серен иазгәеиҭеит Аҧсни Сальвадори рыжәларқәа ахьыҧшымразы имҩаҧыргоз ақәҧараҟны ишеиҧшу.

«Ҳаргьы шәара шәеиҧш ахақәиҭразы ақәҧара мҩаҧаҳгон, уи агарагьы ҳалшеит. Аҧсны Аҳәынҭқарра аделегациа рбара сеигәырҕьоит. Сгәы иаанагоит ҳаимадарақәа аҧхьаҟа ирыцҵахап ҳәа», - иҳәеит Сальвадор Ахада. 

Рауль Ҳаџьымба Санчес Серен ҳамҭас ииҭеит Аҧсны Аиааиреи Аҧсны Аҳәынҭқарра Ахьыҧшымреи 25-шықәса рхыҵра ахьӡала иҭыжьу Амилаҭтә банк аиубилеитә монета. Сальвадор Ахада Ареспублика Сальвадор азы Ахьыҧшымра амш акрызҵазкуа ҳәынҭқарратә ныҳәаны излаҟоу ала, иазгәеиҭеит ари аҳамҭа асимволтә ҵакы.
Рауль Ҳаџьымба иара убас Сальвадор Ахада Аҧсныҟа ааҧхьара ииҭеит.

Рауль Ҳаџьымба Николас Мадуро иҟаиҵаз ааԥхьарала Боливариантәи Ареспублика Венесуела усуратә визитла дыҟоуп. 



Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org