11.01.2019
Аҧсны Аҳәынҭқарра Ахада Рауль Ҳаџьымба Боливариантәи Ареспублика Венесуела Ахада Николас Мадуро инапынҵақәа раанкылара иазку аусмҩаҧгатә иҽалаирхәит.
Николас Мадуро инапынҵақәа раанкылара иазку аусмҩаҧгатә иаҭааит иара убас Алада Уаҧстәыла Ареспублика Ахада Анатоли Бибилов, Афедерациа Ахеилак Ахантәаҩы Илиас Умаханов напхгара ззиуа Урыстәылатәи Афедерациа аделегациа, Никарагуа Ахада Даниель Ортега, Куба Аҳәынҭсовети Аминистрцәа Рхеилаки Рхантәаҩы Мигель Диас-Канель, Боливиа Ахада Ево Моралес, Сальвадор Ахада Санчес Серен, Ҭырқәтәыла Ахада Ихаҭыҧуаҩ Фуаҭ Октаи. Венесуела Ахада имаҵура аанкылара иазкыз аныҳәатә церемониа иалахәын 90 инареиҳаны атәым ҳәынҭқаррақәа рыҟнытә аделегациақәа.
Ҭоубауреи амаҵура аанкылареи ирызкыз аныҳәатә церемониа ахыркәшамҭазы имҩаҧысит Арратә парад.
Рауль Ҳаџьымба Николас Мадуро иҟаиҵаз ааԥхьарала Боливариантәи Ареспублика Венесуела усуратә визитла дыҟоуп.