10.01.2019
Каракас аҳаиртә баӷәазаҿы имҩаԥысит арратә ҟарул злахәыз аофициалтә церемониа.
Аҳәынҭқарра Ахада аҩымҭа аанижьит ҳаҭыр зқәу асасцәа рышәҟәаҿы.
Рауль Ҳаџьымба венесуелатәи аҳаиртә баӷәазаҿы официалла Аҧснытәи асасцәа рҧылара иазкыз ацеремониахь инеиз ажурналистцәа рызҵаарақәа рҭакқәа ҟаиҵеит.
«Венесула аҳәынҭқарреи ҳареи аизыҟазаашьа бзиақәа ҳабжьоуп. Аԥхьаҟагьы еиуеиԥшым ахырхарҭақәа рыла аҳәынҭқаррабжьаратә усураҟны ҳаимадара аҽарӷәӷәоит ҳәа сгәы иаанагоит », - иазгәеиҭеит, ҷыдала, Ахада.
Боливариантәи Ареспублика Венесуела Ахада Николас Мадуро иҟаиҵаз ааԥхьарала Рауль Ҳаџьымба Венесуела Ахада инапынҵақәа раанкылара иазку аусмҩаҧгатә иҽалаирхәуеит.
Авизит аҳәаа иҭагӡаны имҩаԥысуеит Рауль Ҳаџьымбеи Николас Мадурои реиҿцәажәара. Аҳәынҭқаррақәа рхадацәа азааҭгылоит аԥсны-венесуелатәи аизыҟазаашьақәа рҭагылазаашьеи аԥхьаҟатәи рыҿиареи.