Аҧсны Аҳәынҭқарра Ахада

 

Ахада Ареспубликатә политикатә партиа "Аҧсны жәлар ракзаара афорум" аизараҟны иқәгылара

19.12.2018

Ахада Ареспубликатә политикатә партиа "Аҧсны жәлар ракзаара афорум" аизараҟны иқәгылара

Ҧхынҷкәынмза 19 рзы Аҧсны Аҳәынҭқарра Ахада Рауль Ҳаџьымба Ареспубликатә политикатә партиа "Аҧсны жәлар ракзаара афорум" аизараҟны дықәгылеит.

Абзеира шәықәзааит, ҳаҭыр зқәу аиҳабацәа, аиҵбацәа, ҳауаажәлар зегьы, ҳҩызцәа!

Иахьатәи ҳаизара ду иалахәуп даара аџьабаа збахьоу, Ҳаҧсадгьыл алахьынҵа, ҧхьаҟатәи ҳусқәа хьаас измоу аиҳабацәа, Афорум аветеранцәа, аибашьцәа. Ара иҟоуп иара убас аиҳабацәа зықәгәыҕуа аҿар, уаҵәы аҳәынҭқарра аҧеиҧш знапы ианаҳҵаша абиҧара ҿыц рхаҭарнакцәа. Афорум ҿыц ицәырҵыз партиам, иамоуп аҧышәа, ақәра, аҳаҭыр, убри азоуп иара аизара дуқәа рышҟагьы ауаа агәыҕра рыманы изымҩахыҵуа.

Ибзианы издыруеит шәызегь гәҭыхас ишшәымоу ихадароу акы: зықьҩыла аҵеира рхы зқәырҵаз ахьыҧшымра аиқәырхара, ауаа реидкылара, аизыразра, аилибакаара, аҳәынҭқарра амчхара ҕәҕәахартә аусеицура.

Иҳалшо ала, ҳаргьы убри ауп ҳазҿыз аҵыхәтәантәи ашықәсқәа рзы. Иҟоуп ҳзыхьӡаз, ҳазхьымӡаз, адәныҟатәи афакторқәа ирыхҟьаз. Аха ҽнакгьы ҳгәы рҭынчны ҳтәамызт. Ирацәан ахҭысқәа. Ҳтәылагьы рылахәын ҳакәша-мыкәша ицоз апроцессқәа. Иҳаҧшаауан амҩақәа ҳҳәынҭқарра амчхара зырҕәҕәаша, ҳарҿагылан политикала, дипломатиала Аҧсынтәыла ҵызшәаауаз амчрақәа.

Имариамызт   профессионалла иазыҟаҵоу ауаа рыҧшаара, аиаша ҳҳәозар, уи аҟара иҕәҕәам ҳкадртә резервқәа, избанзар аибашьра ашьҭахь урҭ системала разыҟаҵара иахьынӡахәҭоу ахылаҧшра амамызт. Иаалырҟьаны анапхгаратә кадрқәа рцәыргара залшом, ианыҟам иахәҭоу абаза. Ҳаҧхьаҟагьы ари зегь реиҳа иактуалтәу проблеманы ҳҿаҧхьа иқәгылоуп.

Аха иҟоу рахьтә иреиҕьу ҳрышьҭан. Анс ҳҳәа, арс ҳҳәа, адунеиаҿ имҩаҧысуа акризис аӡыблара ҳҽамҭақәа, алшарақәа ҳаҧшаауан ҳреспублика аекономикатә лшарақәа реиҕьтәразы, ҳзықәгәыҕуа ҳарратә структурақәа реиқәырхаразы, ҳҳәаақәа рырҕәҕәаразы, ҳанхаҩыжәлар рыбзазашьа, ишырҳәо еиҧш, рӡы-рымца, рфымца, рымҩа, рыбзазашьа маҷк иаҳзеиҕьтәуазар ҳәа. Аиашазы, избарц зҭахыу, лабҿаба ибартә иҟоуп ишыҟоу апрогресс, аизҳара.

Сгәы иаанагоит, ҳаҧхьаҟатәи ҳусқәагьы акырӡа иманшәалахап ҳәа, иаҳзалыршар аизыразра, аҳәоуеиқәшәара. Ахатәы интерес аганахь инышьҭаҵаны, аҳәынҭқарратә интерес аҧхьа иҳаргылар, досу хаҭала илшо ҟаиҵар уи аргылараҿы, хымҧада инагӡахоит ҳагәҭакы. Убрахь иҳархароуп амилаҭ рымч-рылша, рхәыцра, рҽазышәарақәа зегьы! Убасҟаноуп ианыҟало аҿиара, аизҳара, шәаргьы ҳаргьы ҳазхыццакуа алҵшәа! 


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT