Аҧсны Аҳәынҭқарра Ахада

 

Ахада усуратә визитла Очамчыреи Тҟәарчали рраионқәа дырҭааит

05.12.2018

Ахада усуратә визитла Очамчыреи Тҟәарчали рраионқәа дырҭааит

Ԥхынҷкәынмза 5 рзы  Аҧсны Аҳәынҭқарра Ахада Рауль Ҳаџьымба усуратә визитла Очамчыреи Тҟәарчали рраионқәа дырҭааит.

Ахада Очамчыра ахәыҷбахҷа дыргылараны иахьыҟоу аҭыԥ дахәаԥшит. Аҳәынҭқарратә еилакы «Аԥсныргылара» Адиректор хада Ҭемыр Тҟьебучаа  Ахада изеиҭеиҳәеит аргыларатә усурақәа ахьынӡанеихьо атәы.

«Ашколқәранӡатәи аҵаратә усбарҭа аргылара иалагеит иаҳхысыз ашықәс рашәарамзазы.  Ара игылан ажәытә хыбра, уи ықәганы  аҿыц аргылара нап  аҳаркит. Ҳазҭагылоу аамҭазы амонолиттә усурақәеи ахыбреи хыркәшоуп.  Иара убас ихиоуп аҳауарыцқьагеи аҩныҵҟатәи афымцацәаҳәақәеи. Аобиект аргылара иадҳәалоу аусурақәа рхыркәшара ҿҳәарас иамоуп 2019 ш. актәи ашықәсбжа анҵәамҭа. Иазгәаҭоуп иазырбоу аамҭазы ахыбра ахархәарахь ирыҭахароуп ҳәа.  Ахәыҷбаҳча 80-100-ҩык рҭыԥ амоуп.  Уа иҟалоит ахәыҷқәа ахьыхәмаруа ашҭа,  иара убас аҩныҵҟа иақәнагахаша зегьы», -иҳәеит Ҭемыр Тҟьебучаа.

  Шьаҭанкылатәи аргылара аусбарҭа аиҳабы Игор Амқәаб иазгәеиҭеит, ахыбра аҿы иадҳәалаз аусурақәа рҟны ахархәара шамоу ҩынтә рыла  еиҵаны афымцамчы збылуа ҳаамҭа иақәшәо аматериалқәа.

Ахада иара убас дрыхәаԥшит автомашьынамҩаҿы  «Тҟәарчал-Бедиа» аусрақәа шцо.

 Аҳәынҭқарратә еилакы «Аԥсныргылара» Адиректор хада Ҭемыр Тҟьебучаа Ахада изеиҭеиҳәеит аобиект аҟны аусурақәа шымҩаԥысуа атәы:

 «Иаҳхысыз ашықәс азы аинвестпрограмма инақәыршәаны аусурақәа наҳагӡеит. Хә-участокк рҿы аҵыргәатә ҭыӡқәа хәба ҟаҳҵеит. Ҳазҭагылоу аамҭазы ацҳақәа ԥшьба рыргылара ҳаҿуп, ҩба ҳрылгарц егьҳагым. Ԥшь-цҳак рыргыларазы афинанстә цхыраара ҟаҵоуп ареспубликатә биуџьет аҟынтә», - иҳәеит  Ҭемыр Тҟьебучаа.

Аҳәынҭқарратә еилакы «Аҧсныавтомҩа» анапхгаҩы Борис Ачба иҳәеит, ари аҭыԥ аҿы амҩатә усурақәа шаанкылоу, избанзар аспециалистцәа ирбеит  ацҳақәа штәаз: « Амҩа аура 11 км бжаки ыҟоуп. Аусурақәа ирылаган 2017ш. аха иаанаҳкылар акәхеит, ацҳақәа ахьылаҟәуаз иахҟьаны.  Атәыла анапхгара ацҳақәа ԥшьба рыргылара ахы иаднаҵеит, уи анаҩс аусура иацҵахеит.  Аҳауатә ҭагылазаашьа иахҟьаны акаҭран ақәырҭәара иааиуа ашықәс актәи аквартал ахь ииаҳгоит.  Ԥшь-километрак акаҭран ықәырҭәатәны иаанхеит. Анхацәа аӡымҩангагақәа ҽеим рҳәеит, урҭ ҳрыхәаԥшуеит, иҳаԥсахуеит. Аамҭа ыҟоуп, уигь ҳалагоит».

 Ахада иара убас даҭааит Тҟәарчалтәи араионтә хәышәтәырҭа хада аргылара ахьымҩаҧысуа. Ара аусурақәа нарыгӡоит Аԥсны Аҳәынҭқарра асоциалтә-економикатә ҿиара аинвестициатә программа аҳәаақәа ирҭагӡаны.

Аҳәынҭқарратә еилакы «Аҧсныргылара»  Адиректор хада Ҭемыр Тҟьебучаа Ахада изеиҭеиҳәеит аргыларатә усурақәа шцо.   Уажәазы аобиект иазхаша акафель, ахаҳәцәы аахәоуп. Аԥенџьырқәа рҭаргылара, 55 цыра амцаҽацәыхьчаратә ашәқәа рҿацара ҳаҿуп. Афымцамчы иадҳәалоу аусрақәа цоит, ахыб ақәҵоуп.  Анџьныртә усурақәа, шамахамзар, ихыркәшоуп. Иааиуа ашықәс азы ҷыдала аобиект аҿы аус адулара ҳалагоит».

 Тҟәарчалтәи араионтә хәышәтәырҭа аҳақьым хада Лали Гаргәылиа ахәышәтәырҭа ашьақәгылашьа дазааҭгылеит: «Ахәышәтәырҭа каруаҭ ҭыԥқәа 49 амоуп, аҿкычымазара аҟәшаҿы 15 каруаҭ ҭыԥ ыҟоуп.  Ара аус рулоит атерапевттә, аԥҟарҭатә, акушер-гинекологиатә, апедиатриатә ҟәшақәа. Иара убас иҟалоит амбулаториа-поликлиникатә маҵзура назыгӡо аполиклиника. Аиҭашьақәыргыларатә усурақәа рнаҩс алшара бзиақәа ҟалоит, усҟан еиуеиԥшым ахырхарҭақәа рыла аспециалистцәа хымԥада еиҳа ирацәаҩхоит. Иара убас, ахәышәтәырҭа ҳаамҭа иақәшәо амыругақәа рыла еиқәыршәахоит».    

.Аҳәынҭқарра Ахада  ахыбрақәа рыргыларазы имҩаԥысуа аусурақәа ахәшьара риҭеит.

«Аусурақәа рцашьа бзиоуп. Зегь реиҳа ихадароу, иазԥхьагәаҭоу афинанстә цхыраара аиуроуп. Иарбоу аҿҳәара иақәыршәаны аусурақәа шхыркәшахо убартә иҟоуп.  Раԥхьа иргыланы, амҩа, Тҟәарчали Бедиеи , егьырҭ араионқәеи ақыҭақәеи еимаздо.  Аибашьраан ари амҩа    азҵаарақәа жәпакы аӡбон.  Иахьа ҳҿаԥхьа иқәгылоуп аҭынч ԥсҭазаараҿы иӡбатәу азҵаарақәа. Ауаа ақалақь ахь ргәы рҭынчны иаароуп, ицароуп. Ахәышәтәырҭа азҵаара акәзар, планла ишарбоу еиԥш аусурақәа цоит, аҿҳәара иақәыршәангьы ихыркәшахоит», - иҳәеит Ахада.

Аҳәынҭқарра Ахада иазгәеиҭеит, Тҟәарчалтәи аџьармыкьаҿы имҩаҧысуа аусурақәа рхыркәшаразы ахарџьҧсақәа шырзыԥшаахо.

2.JPG

3.JPG

4.JPG 

 

 

 


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT