Аҧсны Аҳәынҭқарра Ахада

 

Ахада Иаку ареспубликатә наплакы «Амшынеиқəафымцамч» Адиректор хада Аслан Басариа дидикылеит

04.12.2018

Ахада Иаку ареспубликатә наплакы «Амшынеиқəафымцамч» Адиректор хада Аслан Басариа дидикылеит

Ҧхынҷкəынмза 4 рзы Аҧсны Аҳəынҭқарра Ахада Рауль Ҳаџьымба Иаку ареспубликатә наплакы «Амшынеиқəафымцамч» Адиректор хада Аслан Басариа дызлахәыз аиҧылара мҩаҧигеит.

Аҳəынҭқарра Ахада дазҵааит Аҧсны Аҳəынҭқарра асоциалтә-економикатə ҿиара ацхрааразы аинвестициатə программа аҳəаақəа ирҭагӡаны, иара убас Иаку ареспубликатә наплакы «Афымцамч» ахарџьқəа рыла усурақəас имҩаҧгоу.

«Аслан Басариа Ахада имҩаҧгоу аусурақəа рзы адырра ииҭеит:

Ҳазҭагылоу аамҭазы аинвестициа аицҵалыҵ иартəоит 730 млн мааҭ. Аусмҩаҧгатəқəа зегьы нагӡоуп. 220-110 киловольт змоу аиҵастанциақəа 7 рыҟны амчратə мыругақәа ҧсахуп, аабатəи аиҵастанциаҟны – Гагра-1 шьаҭанкыла зегь ҧсахын, аиҵастанциа ҿыц ҳаргылеит ҳҳәар ауеит. Ҳазҭоу ашықəс азы аобиект ахархəарахь ирыҭан.

Аихшарҭатə каҭақәа ртәы ҳҳәозар, быжь-раионк рахьынтə хə-раионк рҿы сынтәатәи ашықəс аҧхьагьы аусмҩаҧгатəқəа зегьы нагӡан. Ашықəс нҵəаанӡа иҟаҵатәу - иаахəатəуп атехника ҷыда, аманипулиатор, иара убас УАЗ амашьына «Фермер».

Абарҭ апроцессқəа зегьы рымҩаҧысшьа иазкны ҳара иазҳархиеит ахəқəа, ацифрақəа, афотоматериалқəа ахьарбоу иҷыдоу акаталог. Аусурақəа зегьы ҳадаҳкылеит, афинанстə цхыраара ҟаҵоуп, зегь хархәара рыҭоуп. Жəаҳəарада, арҭқəа зегьы ҳусура ацхыраара ду анаҭоит, аха уи азхом.

Иаку анаплакы «Афымцамчы» аҩныҵҟа аусурақəа мҩаҧаҳгоит. Абри аамҭа иалагӡаны хə-хыбрак рҿы аусурақəа мҩаҧгоуп. Аиҵастанциақəа ртəы ҳҳəозар, урҭ рҿы иҧсахуп амчратə мыруга ахəҭа хада. Убри инаҷыданы еснагьтəи аусурақəа цоит, 2018-тəи ашықəс мацара ҳалацəажəозар, аиҵастанциақəа 41 рҟынтə, зымчхара ҳараку 18 трансформатор рҿыцуп. Еиҳа илаҟəу амчхара змоу атрансформаторқəа ракəзар, абри аамҭа аҩныҵҟала ирҿыцуп 137 трансформатор.

Аргылара ҿыцқəа ракəзар, аихшарҭатə каҭақəа рызҵаароуп ара ицәырҵуа, абри ашықəс жəамз рыҩныҵҟала еиуеиҧшым амчхарақәа змоу 100 км инарзынаҧшуа ацəаҳəа шьҭа рхы иадырхəоит ҳтəыла ауааҧсыра. Ишьақəыргылоуп 14 комплект атрансформатортə аиҵастанциақəеи атрансформатор ҿыцқəеи 14.

Амҩадуқəа ррыцқьаразы аусурақəа цоит. Иаҳхысыз ашықəс азы 800 км рҟынӡа еиуеиҧшым амчхара змаз ацəаҳəақəа рыҵаҟа аҭыҧқəа ҳрыцқьеит. Ҳазҭоу ашықəс азы 500 км ицо ацәаҳәоуп ҳазҿу. Ацәаҳәа хадаҟны ацəаҳəақəа реиҧшьыга рматурақəа рыхəҭа дук ҧсахуп, урҭ аиҟəыҭхагақəеи ацəаҳəақəа рыхəҭаки роуп. Звольт ҳараку ацəаҳəақəа рышьаҟақәа рыхәҭак рҽеиуп. Амыругақəа ахьажәыз азы, ак рыгӡамкәа иҟоуп ҳазҳəаӡом. Ҳарҭ еснагь арҭ аусурақəа ҳзымҩаҧгаӡом, избанзар усҟан ҳабонентцəа рхы иадырхəо афымца аанаҳкылароуп. Уи азы араионқəа жəпакы афымца рымаҳхыр акәхоит, убри аҟынтə заа ашьыжь, мамзаргьы еиҳа ихьшәаны, ҵхыбжьонны имҩаҧаҳгоит урҭ аусурақəа. Иахьынӡаҳалшоз ала аӡын ҳҽазыҟаҳҵеит, афымцасистемаҿы иҟоу аҭагылазаашьа уадаҩ ҳасаб азуны».

 

Аслан Басариа иара убас аҭак ҟаиҵеит Ахада акриптоферм афымцамчсистема ианаҭо анырра иазкыз изҵаара.

«Акаҭақәа реидара шмыцхәугьы, ҳара ҳаҟны ицәырҵит лассы-лассы ажәытәтәи азауадқәа рыҟны иҟарҵо амаининг-фермақәа. Ари акаҭақәа, ацәаҳәа дуқәа, аиҵастанциақәа реидара иацырҵоит. Ихьшәашәарахар ахархәаҩ иҟынӡа афымцамч анагара уадаҩхар ҟалоит.

Иҟашәҵаз анапынҵақәа рҳәаа иҭагӡаны ҳгәыҕуеит, аусурагьы мҩаҧысуеит уи азы, анормативтә документ цәырҵып ҳәа, уи ари аусхк ҳәаақәнаҵоит, алшарагьы ҳнаҭоит, раҧхьа иргыланы, ахархәаҩ иҟынӡа анагаразы, аӡын иҩны алашареи аҧхарреи имазарц азы», - иҳәеит Аслан Басариа.

Ахада адҵа ҟаиҵеит анаплакқәа ирзоужьу амчхарақәа хықәкыла рхархәара ахылаҧшра арҕәҕәаразы.

Ахада иара убас далацәажәеит афымцамч ахархәара аусхк аҟны афымцамч ахарџьҧсақәа ршәараҟны иҟоу ауадаҩрақәа.

Аслан Басариа аҳәынҭқарра Ахада абри аҭагылазаашьазы изҵаара аҭак абас иҟаиҵеит: «Рыцҳарас иҟалаз, ҳнормативтә база еилаганы, абонентцәа зегьы закәанла аҧхьаӡага амыруга шрымазаракәугьы, аҧсҭазаараҟны ус иҟаӡам. Аха абри инаваргыланы, иазгәаҭазарц сҭахуп, есышықәса аҭагылазаашьа шеиҕьхо. Ҳазҭоу ашықәс азы 10 мыз рыҩныҵҟала иҳаҩсыз ашықәс аасҭа 7% рыла аизҳара ыҟоуп абри аганахьала. Ари аиуристтәи ауааҧсыратәи хаҿқәа рыҟноуп. Аха раионқәак рыҟны еиҳа еицәахеит. Лассы-лассы уи еиҳа зҭагылазаашьа еиҕьу араионқәа Аҟәа, Гагра араион, Гәдоуҭа араионқәа рыҟныоуп. Аиуристтә хаҿқәа рыҟны иубартә иацырҵеит. Урҭ рыҟны аизҳара 20% иреиҳахеит. Иаҳа имариахеит аиуристтә хаҿқәа ргәаҭара, афымца рымхразы асистема армчра. Убри аан ауаҩытәҩсатә хаҿқәа афымца рымхразы атехникатә лшарақәа ҳамаӡам ари ахарџьҧса дуқәа аҭахуп азы.

Ҳара ҳҿы атарифқәа рхахә ахьырзылымхуа ҳасаб азуны, уи ацхраара ҳаҿуп. Аха ари аҟаҵара акыр иаҳцәыуадаҩуп. Ҳгәы иаанагоит иааиуа ашықәс азы хықәкылатәи абиуџьет азкхоит ҳәа, уи аизгатәқәа ирыцхраауеит, раҧхьа иргыланы, ауааҧсыра фымцамчла реиқәыршәара ахаҭабзиарагьы еиҕьнатәуеит».                 

Аҳәынҭқарра Ахада иара убас иқәиргылеит Егры Афымцамч станциаҟны аҭагылазаашьа ахылаҧшра арҕәҕәара азҵаара.

 


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT