Аҧсны Аҳәынҭқарра Ахада

 

Витали Габниа Аҧсны Аҳәынҭқарра Ахада Рауль Ҳаџьымба ихьӡала адныҳәалартә шәҟәы даҧхьеит Москватәи Аҧсуа Диаспора 60 – шықәсахыҵра азгәаҭараан.

25.03.2018

Витали Габниа Аҧсны Аҳәынҭқарра Ахада Рауль Ҳаџьымба ихьӡала адныҳәалартә шәҟәы даҧхьеит Москватәи Аҧсуа Диаспора 60 – шықәсахыҵра азгәаҭараан.


Хәажәкырамза 25 рзы Аҧсны Аҳәынҭқарра Ахада Витали Габниа Аҧсны Аҳәынҭқарра Ахада Рауль Ҳаџьымба ихьӡала адныҳәалартә шәҟәы даҧхьеит Москватәи Аҧсуа Диаспора 60 – шықәсахыҵра азгәаҭараан. 
***
Ҳаҭыр зқәу Беслан Родион-иҧа!
Ҳаҭыр зқәу ҳџьынџьуаа–
Москватәи Аҧсуа Диаспора ахаҭарнакцәа!

Аиашьа ибзиабарала, гәазыҳәара дула ишәыдысныҳәалар сҭахуп акрызҵазкуа ахҭыс – ихьыҧшым ҳҳәынҭқарра аҿиара, уи аихьӡарақәа, зеиҧш ыҟам аҭоурыхтә ҭынхеи атрадициатә культуреи раларҵәараҿы злагаламҭа дуу аҧсуа уаажәларра аҧҵара 60-шықәсахыҵра.

Москва аҧсуа диаспора ашьақәгылареи аусуреи рышьаҭақәа иҳаҩсыз ашәышықәса 20-30-тәи ашықәсқәа ирыдҳәалоуп. Уи ашықәсқәа акрызҵазкуа ахҭысқәа рыла ибеиоуп. Рыцҳарас иҟалаз, урҭ Сталин ихаантәи аполитикатә репрессиақәеи егьырҭ адраматә хынҭаҩынҭарақәеи рыла ирхәашьуп. Убас шакәугьы, 50-тәи ашықәсқәа аҩбатәи рызбжа инаркны аҧсуа еидгылара аиҭеира иалагеит. Абри аамҭа аҩныҵҟала москватәи ҳџьынџьуаа Аҧсны жәларбжьаратәи аҳаҭыр ашьҭыхразы, урыстәыла-аҧснытәи адипломатиатә, аекономикатә, аҭҵаарадырра-ҵараиуратә, акультуратә еимадарақәа рырҕәҕәаразы иҟарҵаз маҷӡам.

Ҳара ахә ҳаракны иаҳшьоит аҧсуа уаажәларра ашьаҭаркыҩцәа москватәи аҧсуа диаспора аидкылараҿы рлагаламҭа, урҭ рааҧсара, рҧышәа, рдыррақәа. Иара убас гәахәарыла иазгәаҳҭар ҳҭахуп абаҩхатәра змоу ҳҿар ганрацәала иеибарку русура алҵшәақәа, Аҧсны Аҳәынҭқарра иахаҭарнакцәаны иқәгыло Москвеиҧш, иеиуеиҧшым жәларбжьаратәи аҩаӡарақәа рылагьы. Акрызҵазкуа аҭыҧ аанырккылоит аҧсуа диаспора аҧсҭазаараҟны астудентцәа, аҿарацәа, аспирантурақәа, аординатурақәа, иара убас иеиуеиҧшым аҩаӡарақәа змоу аҵараиурҭақәа рыҟны зыквалификациа аизырҳара иаҿу аспециалистцәа.

Зҭакҧхықәра ҳараку амиссиа нанагӡеит Москватәи Аҧсуа диаспора 1992-1993 шш. раан. Аибашьра аҧхьатәи амшқәа инадыркны Москва иҟоу аҧсуа уаажәларра амчала иаҧҵан иеиуеипшым ахырхарҭақәа рыла аусура мҩаҧызгоз Аҧсны ацхрааразы аштаб. Адиаспора хылаҧшра рырҭон ахҵәацәа, москватәи ахәышәтәырҭақәа рыҟны ареабилитациа иахысуаз ахәцәа. Аштаб иалшаз рацәоуп ақырҭуа информациа-пропагандатә система аҿагыларазы.
Иахьа Москватәи Аҧсуа Диаспора аҭагылазаашьақәа аҧнаҵоит ҳџьынџьуаа амилаҭтә традициақәа, адоуҳатә мазарақәа, ахатәы бызшәеи акультуреи радҧхьаларазы, гәацҧыҳәарала ҳҳәынҭқарра аҧсҭазаара аганқәа зегьы ирылахәуп.

Сгәы иаанагоит, Москватәи ауаажәларра иааиҧмырҟьаӡакәа имҩаҧнаго аусура аихьӡара ҿыцқәа шаиуа, аиҭеира амҩа иану ҳҳәынҭқарра аҿиараҟны даҽа лагаламҭак аҳасабала ацхраара шалшо.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org