Ахада ихаҭыԥуаҩ Аԥсны Аҳәынҭқарра Атәылахьчара аминистрра арратә мазара аҭаразы аофициалтә церемониаҟны дықәгылеит.

Цәыббрамза 21 рзы Аԥсны Аҳәынҭқарра Ахада ихаҭыԥуаҩ Витали Габниа Урыстәылатәи Афедерациа Атәылахьчара аминистрра арратә мазара Аԥсны Аҳәынҭқарра Атәылахьчара аминистрра аҭаразы аофициалтә церемониаҟны дықәгылеит.

***

Мшыбзиақәа, ҳаҭыр зқәу аҩызцәа! Бзиала шәаабеит ҳәа шәасҳәоит аофицерцәа, асолдаҭцәа, акурсантцәа.

Иарбан тәылазаалак шьаҿа-шьаҿалатәи аҿиара уасхырс иазышьҭоуп уи ашәарҭадара, аҳәаахьчара аҭышәынтәалара, атәылауаа рҭынч ҧсҭазаара.

Аиҩызареи астратегиатә усеицуреи рзы аиқәшаҭра хада ас еиԥш аҭагылазаашьақәа раԥҵара ҳалнаршоит. Аԥсни Урыстәылеи иеицырзеиԥшу азҵаатәқәа рыӡбаразы азинтә шьаҭа еиҳа-еиҳа арӷәӷәара ҳаҿуп. Иахьа аҳәынҭқаррабжьаратә еиқәшаҳаҭрақәа 23 ҳабжьаҳҵахьеит. 2014 шықәса абҵарамза 24 рызтәи аиқәшаҳаҭра анагӡаразы Урыстәылатәи Афедерациа Аԥсны Аҳәынҭқарра ианаҭоит атехникеи абџьари. Ҳарбџьармчқәа рырӷәӷәара аус аҿы уи даара иҳацхраауеит.

Аԥсны Аҳәынҭқарреи Қырҭтәыла Ареспубликеи Егры аӡиас иеиҿагылоу ҩ-ганк ҳәаас ирымоуп. Уи мап узацәкуам.

Аԥсны Урыстәылатәи Афедерациа зыгәра аго, иадгыло ҩызоуп. Аԥсуа жәлар ахә ҳаракны иашьоит Урыстәыла ҳшәарҭадара азҵаараҿы адгылара ахьҳанаҭо, ҳекономикатә ҭагылазаашьа аиӷьтәразы ацхыраара ахьаҳзыҟанаҵо.

Шәареи ҳареи лахьынҵак ауп иҳамоу, ҳагәҭакқәеи ҳгәаҳәарақәеи еиԥшуп. Иҭабуп ҳәа шәасҳәоит уи азы.     


Возврат к списку