Рауль Ҳаџьымбеи Владимир Путини реиԥылара аихшьалақәа рзы Ахада Ипресс-маӡаныҟәгаҩ иҟалҵаз абрифинг

Рауль Ҳаџьымбеи Владимир Путини реиԥылара аихшьалақәа рзы Ахада Ипресс-маӡаныҟәгаҩ иҟалҵаз абрифинг

Нанҳәамза 9 рзы Ахада Ипресс-маӡаныҟәгаҩ Наала Аҩӡԥҳа иҟалҵаз абрифинг аҟны нанҳәамза 8 рзы имҩаԥысыз Аԥсны Аҳәынҭқарра Ахада Рауль Ҳаџьымбеи Урыстәылатәи Афедерациа Ахада Владимир Путини реиԥылара аихшьала хадақәа дырзааҭгылеит.

***

Ҳаҭыр зқәу сколлегацәа, ишыжәдыруа еиԥш, иацы Аԥсны Аҳәынҭқарра Ахада Рауль Ҳаџьымбеи Урыстәылатәи Афедерациа Ахада Владимир Путини реиԥылара мҩаԥысит.

Арҭ аиҿцәарақәа раан аҧсуа ган Аинвестициатә агентра имҩаҧнаго апрограмма аусура ацҵаразы ажәалагала ҟанаҵеит. Иахьатәи аамҭазы урыстәылатәи абанкқәа хҧа ркредитқәа рыбзоурала ҳҳәынҭқарраҟны жә-проектк рынагӡара иаҿуп. Урҭ ақыҭанхамҩеи, афатә аалыҵи, атуристтә усхки рхырхарҭақәа ирыдҳәалоуп. Ари апрограмма ҳекономика аҿиара акыр иацхраауеит.

Аиҧылараан убасгьы иалацәажәеит Аинвестициатә агентрала акредитқәа рыҭара 3 млрд мааҭк рҟынӡа арҭбаара шалшо, акредиттә зыҧҵәагьы 9% рҟынӡа ишылаҟәхо.

Аурыс ган ари азҵаара аӡбара иақәнагоу аусбарҭақәа рҟны алагарп иазыхиоуп.

Иара убас иалацәажәеит Аҧсны Амилаҭтә банк альготатә проценттә зыҧҵәала акредит адгалара алыршара азҵаара. Уи абзоурала Аҧсны Абанк акапитал миллиард мааҭк рҟынӡа ишьҭыҵыр ауан. Ари азы ҳажәалагала рыдыркылеит. Урыстәылатәи Афедерациа Аиҳабыра уи азҵаара аус адырулараны иҟоуп.

Убасгьы иалацәажеит ақыҭанхамҩатә аалыҵ аҧсуа-аурыс ҳәаа ахыгараан иақәырҵо аҳазалхратә ахә азҵаара. Иахьазы уи адолларқәа рыла ирыҧхьаӡоит. Аха наҟ-наҟ аурыс мааҭқәа рыла ишьақәдыргыларазы азҵаара шьҭаҳхит. Владимир Путин аиҧылара цонаҵы уи аӡбаразы изықәнагоу аусбарҭақәа адҵақәа риҭеит.

Иарбанзаалак аалыҵ адоллар ала аҳазалхратә ахә анақәырҵо, иҭышәынтәалам, избанзар адоллар акурс аҽанаҧсахуа, аалыҵ ахәгьы аҽаҧсахуеит. Нас уи Урыстәыла ианнеиуа, ахә ҳаракхоит, иаазхәогьы маҷхоит.

Аҧсуа қыҭанхамҩатә аалыҵқәа аҳазалхратә документқәа рзеиқәыршәареи урҭ рфитосанитартә гәаҭареи Аҧсны имҩаҧысларц азҵаара иалацәажәеит. Уи нарҵауланы иҭҵаатәуп. Урыстәылатәи Афедерациа Ахада адҵа риҭеит ари азҵаара иаарласны ирыӡбарц.

Аҧсны анҭыҵ ирго ақыҭанхамҩатә аалыҵ Урыстәылатәи Афедерациа аҳазалхраҿы ианнеиуа, еиҭа агәаҭара иахысроуп. Уи акыр аамҭа агоит, нас атемпературатә ҭагылазаашьа аҽаҧсахуеит, уи азы аалыҵгьы бжьысуеит, иара убас ахәгьы ианыруеит.

Аҧсны иахьаҵанакуа аидарақәа рхаҭабзиара шьақәдырҕәҕәозҭгьы, еиҳа ирласны Урыстәылатәи аахәаҩ иҟынӡа инеиуан.

Иара убасгьы иалацәажәон ҳтәыла ақыҭанхамҩатә техникала аиқәыршәара азҵаара. Иаҭаху атехникатә хархәагақәа рсиа уаанӡа ишьақәыргыланы, Урыстәылатәи Афедерациа Аиҳабыра ақәшаҳаҭхахьан.

Аԥсны Аҳәынҭқарреи Урыстәылатәи Афедерациеи р-Хадацәа реиԥылара аихшьалақәа абарҭ роуп.


Возврат к списку