Аҧсны Аҳәынҭқарра Ахада

 

Аҧсны Аҳәынҭқарра Ахада Ипресс-маҵзура аҳәамҭа

11.07.2017

Аҧсны Аҳәынҭқарра Ахада Ипресс-маҵзура аҳәамҭа

Мышқәак раҧхьа Гагра имҩаҧысуаз аибашьра аветеранцәа реизарақәа руак аҟны рыӡбахә ҳәан ауаажәларраҿы агәынамӡарақәа цәырызгаз аҳәамҭақәа. Ҷыдала иааугозар, урҭ иахьатәи ҳцивилизациаҟны иреицәаӡоу цәырҵраны иҧхьаӡоу – амилаҭеилыхра – шьаҭас ирыҭаны иаарҧшын. Ас еиҧш иҟоу арыцҳара аҳәынҭқарра аидеологиа аҳасабала тәылақәак рҟны иахьышьақәгылаз иахырҟьаны, урҭ реилаҳареи ажәларқәа ахлымӡаах рҭаргылареи рахь икылнагеит. Иаҳгәалаҳаршәап 20-тәи ашәышықәсазы иҟалаз миллионҩыла акгьы зхарамыз ауаа рҭахара лҵшәас изауз Аҩбатәи Адунеитә еибашьра. Уи зыхҟьаз мзыз хаданы иҟан амилаҭеилыхра шьаҭас измаз афиурер иидеологиа. Ари зегьы ахькылнагаз ҳара ибзиаӡаны иаҳдыруеит. Аха ас еиҧш аҧышәа бааҧс ҳасаб амҭакәа, уи аидеологиа цәаҧҽыга бираҟҵас ишьҭыхны, ақырҭуа напхгара ҳмилаҭ шьаҭанкыла иқәнахырц аӡбеит 20-тәи ашәышықәса анҵәамҭазы. Милаҭ рацәала иеилоу ахааназ милаҭеилых змамыз, адинхаҵаратә чҳара згымыз Аҧсны жәлар рфырхаҵареи рыҕәҕәареи ирыбзоураны ҳаҧсадгьыл аҭагылазаашьа аҽаҧсахит.

Апатриотизми амилаҭеилыхреи ирыҵаркуа акоуп ҳәа аҧхьаӡара гха дуӡӡоуп. Арҭ аилкаарақәа акыр иеицәыхароуп. Актәи иаанаго – аҧсадгьыл абзиабароуп, аҩбатәи – егьырҭ зегьы рцәымҕра. Милаҭрацәала иеилоу ҳажәлар аилыхразы аҽазышәарақәа ҳаҕацәа еигәырҕьоит. Аҧсны – ҳара ҳзеиҧш ҩноуп, ҳбаагәароуп, ҳхәышҭаароуп. Уи ҩныҵҟала аӡәгьы аҧхасҭа азиур ҳуам.

Ҳара ҳазхыҽхәаша ҳамоуп, адунеи иаҳарбаша рацәоуп. Ҳажәлар знысыз аҭоурыхтә мҩа дууп, уи акыр имариамызт. Аха ҳара ҳхәыҷқәа рҧеиҧш лаша ҧхьаҟа ҳагон, Ҳаҧсадгьыл абзиабара амч ҳанаҭон. Иахьагьы ҳаҧсҭазаара ауадаҩрақәа ацуп. Аха ацәымҕрала ҳҽеиқәнаҳхыр, акгьы ҳазмыргылакәа, ахықә ахь ҳнанагоит. Уи аҩыза аӡәгьы иалиршараны дыҟаӡам. 


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT