Аҧсны Аҳәынҭқарра Ахада

 

Витали Габниа Урыстәылатәи Афедерациа Стильрацәалатәи карате афедерациа Ахада Рамиль Габбасов диҧылеит

29.06.2017

Витали Габниа Урыстәылатәи Афедерациа Стильрацәалатәи карате афедерациа Ахада Рамиль Габбасов диҧылеит

Рашәарамза 28 рзы Аҧсны Аҳәынҭқарра Ахада ихаҭыҧуаҩ Витали Габниа Урыстәылатәи Афедерациа Стильрацәалатәи карате афедерациа Ахада Рамиль Габбасов диҧылеит.

Рамиль Габбасов иазгәеиҭеит дара реиҿкаара уажәааигәа Аҧсны иаҧҵаз Стильрацәалатәи карате афедерациа ганрацәала ацхраареи адгылареи ишазхиоу.

Урыстәылатәи Афедерациа Стильрацәалатәи карате афедерациа Ахада актәи ихаҭыҧуаҩ Артур Аветисиан иацҵо, иҳәеит аусура ахаҭабзиара ҩаӡара ҳаракызарц анормативтә база ашьақәыргылара шаҭаху.

«Азакәанҧҵаратә база аганахьала ҳшәыцхраар ҳалшоит. Шәара ишәылшоит аспорт азы урыстәылатәи азакәан шьаҭас иаҭаны Аҧсны ианаало азакәан аҧҵара. Уи аҟны иазгәаҭатәуп аҳәынҭқарратә спорттә усбарҭа иаиураны иҟоу азинмчқәа. Урҭ анцәырҵлак ашьҭахь ауп аккредитациаҟаҵара аналыршахо, иеиуеиҧшым аспорт хкқәа аназхаҵахо, абиуџьетгьы анышьақәгыло», - иҳәеит иара.

Ахада ихаҭыҧуаҩ Витали Габниа инаҵшьны иазгәеиҭеит, Аҧсны аспорт аҵак ду шамоу. «Аспорт ҳара ҳзы символра ауеит. Иуадаҩыз аибашьрашьҭахьтәи ашықәсқәа рзгьы аспорт аҟноуп аихьӡара ҳаракқәа ҷыдала иахьааҳарҧшуаз. Убри азоуп еиҳаракгьы ҳара аҧсуа бираҟ ҳаҵагыланы жәларбжьаратәи аицлабрақәа рыҟны ҳақәгылара зызҳәоу», - иҳәеит Витали Габниа.

Урыстәылатәи Афедерациа Стильрацәалатәи карате афедерациа анапхгара излаанацҳауа ала, Жәларбжьаратәи Стильрацәалатәи карате афедерациа аҧҵара азгәаҭаны иҟоуп. «Ҳгәы иаанагоит Аҧснытәи аган азинмчнаӡа змоу лахәыланы иҟалап ҳәа», - рҳәеит урыстәылатәи ахаҭарнакцәа. Дара ражәақәа рыла, Урыстәыла имҩаҧысуа аицлабрақәа рыҟны аҧсуа спортсменцәа рбираҟ иаҵагыланы иқәгыларац азы ҧынгыла ҳәа акгьы ыҟам.

«Ҳара иаарту аицлабрақәа мҩаҧаҳгар ҳалшоит, усҟан аҧсуа бираҟ акнаҳара аӡәгьы дзаҿагылом. Жәларбжьаратәи аицлабрақәа рахь шәкомандақәа рынашьҭразы есқьынгьы анапхгаҩцәа алкааны рацәажәара аҭаххоит», - иазгәеиҭеит Урыстәылатәи Афедерациа Стильрацәалатәи карате афедерациа Ахада.

Ари аиҧылара далахәын Аҧсны Аҳәынҭқарра Стильрацәалатәи карате афедерациа Ахада Ахра Абыхәба. Урыстәылатәи аколлегацәеи Аҧснытәи агани иеицышьақәдыргылеит ҧхьаҟатәи русура аплан, иалацәажәеит аҧсуа еиҿкаара аилазаашьа. Иӡбан нанҳәамзазы стильрацәалатәи карате азы ҩ-турнирк рымҩаҧгара.

Урыстәылатәи аган ааҧхьарала стильрацәалатәи карате Аҧснытәи ахаҭарнакцәа Москваҟа идәықәҵахоит иапониатәи азҟазацәа рырбаратә қәгыларақәа рахь.

Аҧсны Аҳәынҭқарра Стильрацәалатәи карате афедерациа аҧҵан рашәарамза 12, 2017 шықәсазы.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT