Ахада ихаҭыԥуаҩ конкур азы «Аԥсны ахраҿа» захьӡыз иаарту аицлабра далахәын.

Рашәарамза 24 рзы Аԥсны Аҳәынҭқарра Ахада ихаҭыԥуаҩ Витали Габниа даҭааит Москва ақалақь аҟны имҩаԥысуаз конкур азы «Аԥсны ахраҿа» захьӡыз иаарту аицлабра.

«Аҽыбӷаҟазаратә спорт иамаз аклассикатә форма ацәыӡхьеит азуҳәар алшоит. Ашьацқьа злоу аҽқәа реицлабрақәа иаҳа аԥыжәара роуа иалагеит. Аха аконкур азы Урыстәылатәи Афедерациа иеизгоу акоманда азыҟаҵаҩ еиҳабы Харлам Симониа ибзоурала, ҳара ҳпозициақәа мырӡкәа ҳаауеит, Ацентртә Урыстәылан аицлабрақәа мҩаԥаҳгоит. «Аԥсны ахраҿа» захьӡу иахьатәи аамҭазы имҩаԥырго аицлабра Аԥсны аҽыбӷаҟазаратә спорт аклассикатә хкқәа еиқәнархоит, уи адагьы, Урыстәылеи ҳареи ҳаизыҟазаашьақәа даҽа хырхарҭа ҿыцк ала рырҿиара иацхраауеит. Ари аиндаҭлара аҽыбӷаҟазаратә спорт аҟны еицырдыруа, хьӡы змоу хҭысны иҟалеит», - иҳәеит Ахада ихаҭыԥуаҩ.

Витали Габниа иара убасгьы иазгәеиҭеит ҳҳәынҭқарра жәларбжьаратәи иҵоуроу ахыԥша ашьҭыхреи арӷәӷәареи рзы ари аицлабра аҵак ду шамоу. Конкур азы Урыстәылатәи Афедерациа иеизгоу акоманда азыҟаҵаҩ еиҳабы, конкур азы жәларбжьаратәи акласс аспорт азҟаза, СССР зҽаԥсазтәыз аспортсмен Харлам Симониа Аԥсны Аҳәынҭқарра Ахада иҭабуп ҳәа иеиҳәеит арҭ аицлабрақәа ирзыҟаиҵо афинанстә цхырааразы, иагьазгәеиҭеит аспортсменцәеи ахәаԥшцәеи азҿлымҳара ду шарҭо.

Ари аиндаҭлара Аԥсны Аҳәынҭқарра Ахада, Урыстәылатәи Афедерациаҟны иҟоу Аԥсны Аҳәынҭқарра Ацҳаражәҳәарҭа, аҽтәы-спорттә клуб «Пегас», Москватәи аԥсуа диаспора рыцхыраарала имҩаԥган.


Возврат к списку