Аҧсны Аҳәынҭқарра Ахада

 

Владимир Занҭариа Аҧсны Ахада ихьӡала ашкол аушьҭымҭацәа дрыдныҳәалеит

29.06.2017

Владимир Занҭариа Аҧсны Ахада ихьӡала ашкол аушьҭымҭацәа дрыдныҳәалеит

Рашәарамза 28 рзы акультуреи, аҵарадырреи, аҵараиуреи рзы Аҧсны Ахада Иабжьгаҩ Владимир Занҭариа Р. Гәымба Аҧснытәи аҳәынҭқарратә филармониаҟны имҩаҧысуаз аныҳәатә хәылҧазы аҟны аҳәынҭқарра Ахада ихьӡала ашкол аушьҭымҭацәа дрыдныҳәалеит.

Владимир Занҭариа иқәгылараҟны иазгәеиҭеит аҿар еиуеиҧшым аҟәшақәа рыҟны ирымоу аихьӡарақәа:

«Ҳаҭыр зқәу ашкол аушьҭымҭацәа, аҭаацәа, арҵаҩцәа!

Ари амш ныҳәамшуп згәы хыҭхыҭуа иазыҧшыз аушьҭымҭацәа рзеиҧш аҭаацәеи арҵаҩцәеи рызгьы. Ашкол ҧсҭазаара иадҳәалоу ахҭысқәа, афестивальқәа, аолимпиадақәа, - рышьҭахьҟа инхаз хашҭра зқәым ахәыҷра, ақәыҧшра анаҩс аҧсҭазаара ду амҩа ианылоит.

Уажәы акрызҵазкуа даҽа шьаҿа ҕәҕәак ҟарҵароуп аҧсҭазаараҿы еиҳагьы ҭакҧхықәра зцу амҩа ианыларц азы. Иалышәхароуп азанааҭ, иреиҳау аҵараиурҭақәа рыҟны аҵара шәалагоит. Агәра ганы сыҟоуп қәҿиарала ари амҩа шәшаныло.

Ари ҳара агәра ҳнаргоит ҳаушьҭымҭацәа рҵараҿы ирымоу алҵшәақәа. Аҧснытәи аушьҭымҭацәа аихьӡара бзиақәа рыманы аҳәаанырцәтәи аҵараиурҭақәа ирылгоит, Аҧсныҟа ихынҳәуеит азыҟаҵара бзиа змоу специалистцәаны.

Аҳәынҭқарра Ахада ихьӡала гәык-ҧсыкала ишәыдысныҳәалоит ари амш, шәаҧхьаҟатәи шәыҧсҭазаараҟны ишәзеиҕьасшьоит аманшәалара, аихьӡара ҿыцқәа!

Сара шәыгәра згоит, агәра згоит ауаҩра, ааӡара змоу, адыррақәа ҵаулақәа зауыз, ҳҳәынҭқарра аргылараҿы ҵәатәы шьаҟаны иаҵагыло абиҧараны шәышгыло. Ҳара адунеи зегьы иаҳарбоит ҳҿар иахьакәызаалак, аҵараҿы, аспорт аҿы, аҟазараҿы, акультураҿы аҟыбаҩ шрымоу. Ари, ҳәарада, ҭакҧхықәрала зус иазнеиуа ҳарҵаҩцәа русурагьы иалҵшәоуп.

Акыр иаҧсоу аушьҭымҭацәа! Гәык-ҧсыкала ишәзеиҕьасшьоит аманшәалара. Мҩамш!»


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT