Аҧсны Аҳәынҭқарра Ахада

 

Витали Габниа Аҳәынҭқарратә ахьчаратә маҵзура 25 шықәса ахыҵра иазкыз агәырҕьаратә еилатәараҟны дықәгылеит

15.06.2017

Витали Габниа Аҳәынҭқарратә ахьчаратә маҵзура 25 шықәса ахыҵра иазкыз агәырҕьаратә еилатәараҟны дықәгылеит

Рашәара 15 рзы Аҧсны Аҳәынҭқарра Ахада ихаҭыҧуаҩ Витали Габниа Аҳәынҭқарратә ахьчаратә маҵзура 25 шықәса ахыҵра иазкыз агәырҕьаратә еилатәараҟны даҧхьеит Ахада Рауль Ҳаџьымба иааишьҭыз адныҳәаларатә шәҟәы.

Ахада ихьӡала адныҳәаларатә шәҟәы даҧхьаанӡа, Витали Габниа Аҳәынҭқарратә ахьчаратә маҵзура аусзуҩцәа аныҳәамш рыдиныҳәалеит, иагьазгәеиҭеит амаҵура дуқәа ирхагылоу ауаа рыхьчара амаҵзура Асовет еидгыла аан ишцәырҵыз, аха усҟан иқәгылаз адҵақәа даҽа ҵакык шрымаз.

«Усҟантәи аамҭазы аӡәгьы ихахьы изаагомызт иреиҳаӡоу амаҵурақәа ирхагылоу ауаа рыҧсҭазаарақәа ашәарҭара иҭагылар рылшоит ҳәа, иҟамызт атәыла аҩнуҵҟа ма анҭыҵынтә напхгара зауаз ауаажәларратә еилаҩеиласрақәа, ақәгыларақәа. Ицәырҵуаз ашәарҭарақәа даҽа хырхарҭақәак ракәын ирымаз. Аҳәынҭқарратә ахьчаратә маҵзура адҵақәа иарбанзаалак даҽа усбарҭақәак рҿаҧхьа иузықәыргылом. Ари амаҵзурахьы ирыдыркылароуп зыламыс цқьоу, зхы пату ақәызҵо рыдагьы, знапхгара зымҭиуа арҧарацәа.

Сара иахьатәи аныҳәазы исҳәар сҭахуп шәареи ҳареи азеиҧш ус змоу командак шҳаку. Еиҳабысгьы иҳамоу Ахада иоуп. Еиҧҟьарак ҳауазар, раҧхьаӡа иргыланы, ҳҳәынҭқарра иахагылоу иоуп уи авба зырҭо. Убри азы, ҳара зегьы иҷыдоу аҭакҧхықәра ҳадуп», - иҳәеит Ахада ихаҭыҧуаҩ.

***

Аҳәынҭқарра Ахада иадныҳәаларатә шәҟәы

Аҳәынҭқарратә ахьчаратә маҵзура аусзуҩцәеи аветеранцәеи ирыдысныҳәалоит ари аусбарҭа 25 шықәса ахыҵра.

Ахада ишәарҭадара амаҵзура аструктура аҧҵан иуадаҩыз аибашьра ашықәсқәа рзы, атәылеи уи анапхгареи, раҧхьатәи Ахада В.Г. Арӡынба аҧхьа днаргыланы, ашәарҭа ду ианҭагылаз аамҭазы.

Аҳәынҭқарратә ахьчаратә маҵзура аколлектив аҳәынҭқарра анапхгареи егьырҭ ирыхьчо ауааи ршәарҭадара ахылаҧшра аус аҟны иаанарҧшуеит аҭакҧхықәра ду, азыҟаҵара ҳаракы, ахамеигӡара.

Аҳәынҭқарратә ахьчаратә маҵзура аилазаашьаҟны аҵыхәтәантәи 25 шықәса ирҭагӡаны акыр аҧсахрақәа ҟалеит. Иахьатәи аамҭазы ҳара иҳамоуп ишақәнагоу ишьақәгылоу, зус бзианы издыруа, зтәыла иаҵеи иашақәоу ауаа злоу аструктура. Ҳара уалҧшьас иҳадуп Аҧсныжәлар Рџьынџьтәылатә еибашьраан Ҳаҧсадгьыл ахақәиҭреи ахьыҧшымреи зхы ақәызҵаз ари аусбарҭа аусзуҩцәа ргәалашәара акамыршәра. Имаҷҩым урҭ рахьтә аибашьра ашьҭахьгьы руалҧшьақәа рынагӡараан иҭахаз.

Ари аныҳәамш азы иҭабуп ҳәа шәасҳәар сҭахуп, Оҭар Нури-иҧа, Аҳәынҭқарратә ахьчаратә маҵзура аусзуҩцәа, аветеранцәа, ҧсыцқьарала, ламысла, ҧсахрада инашәыгӡо шәусуразы. Ишәзеиҕьасшьоит агәабзиара, аҭынчра, аманшәалара, аҭакҧхықәра зду имариам шәус аҟны ақәҿиарақәа.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT