Аҧсны Аҳәынҭқарра Ахада

 

Витали Габниа Аҧсны иҟоу карате асекциақәа дырҧылеит

12.06.2017

Витали Габниа Аҧсны иҟоу карате асекциақәа дырҧылеит

Рашәара 12 рзы имҩаҧысит Аҧсны Аҳәынҭқарра Ахада ихаҭыҧуаҩ Витали Габниеи Аҧсны иҟоу карате асекциақәа рхаҭарнакцәеи реиҧылара, уи аан Аҧсны Аҳәынҭқарра Стильрацәалатәи карате афедерациа аҧҵан.

Ахада ихаҭыҧуаҩ дазааҭгылеит Қырҭтәыла иаанарҧшуа аҿагылара иахҟьаны Урыстәылатәи аолимпиатә комитет адгыларала имҩаҧысуа жәларбжьаратәи аицлабрақәа рҟынтәи аҧсуа спортсменцәа аналырхуа ахҭысқәа шмаҷым. Убри инамаданы, ари апроблема аҧыхра азҵаара ҵарны иқәгылоуп.

«Урыстәыла Аҧсны ахьыҧшымра азханаҵеит, ҳара иҳабжьаҳҵахьеит «Аиҩызареи астратегиатә усеицуреи рзы» захьӡу аиқәшаҳаҭра арҿиаразы 80 инарзынаҧшуа аиқәшаҳаҭрақәа. Абри зегьы ҳасаб азуа, ҳара иаҳзеилкаауам, ҳагәгьы иалоуп абас еиҧш аиҧҟьарақәа анҳазцәырырго. Урҭ унарыдыххыланы иузыӡбаӡом, асистематә знеишьа аҭахуп. Ари аҩыза аҭагылазаашьа мзызс иаиуит Аолимпиатә комитет иахьҳәынҭқарратә еиҿкаарам. Уи, ишыжәдыруа еиҧш, уаажәларратә еиҿкаароуп. Убри азы ҳаизыҟазаашьақәа харҭәаатәуп, шьаҿа-шьаҿала ирҭбаатәуп», - иҳәеит Витали Габниа.

Ахада ихаҭыҧуаҩ иара убас иазгәеиҭеит убри инадҳәаланы ҳтәылаҿы ишаҧҵаз Аиқәҧаратә ҟазарақәа рфедерациа, уи иалоуп аиқәҧара ахкқәа зегьы.

«Анаҩсан, Афедерациа аиҳабы иаҳасаб ала, сара Урыстәылатәи Афедерациа саҭааит, снапгьы аҵазҩит Урыстәыла Аиқәҧаратә ҟазарақәа рхеилак ацхантәаҩы Сергеи Кириенкои сареи иҳабжьаҳҵаз аиқәшаҳаҭра. Убри ашьҭахь аҳәоуеиқәымшәара ҳәа акгьы ҳабжьамлеит», - иҳәеит иара.

Иахьатәи аиҧылараҟны ирыдыркылеит зыӡбахә ҳәаз асхемала Аҧсны Аҳәынҭқарра карате асекциақәа зегьы злало Стильрацәалатәи карате афедерациа аҧҵазарц аӡбамҭа.

Витали Габниа излазгәеиҭаз ала, урыстәылатәи аколлегацәеи дареи, егьырҭ СНГ атәылақәеи, аиқәшаҳаҭра рнапы анаҵарыҩлак ашьҭахь, карате иалахәу ҳаспортсменцәа алшара роуеит Аҧсны абираҟ иаҵагыланы жәларбжьаратәи аицлабрақәа рыҽрылархәра.

Аҧсны Карате афедерациа Ахадас дшьақәырҕәҕәан Ахра Абыхәба.

Иара агәрагара ааирҧшит Афедерациа аҧҵара ари аспорт хкы аҿиара анырра бзиа шанаҭо. Ахада ихаҭыҧуаҩ иҭабуп ҳәа иеиҳәеит иҟаиҵо адгыларазы.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT