Аҧсны Аҳәынҭқарра Ахада

 

Витали Габниа: Акомандирцәа роуп аибашьцәа аҳамҭа рыҭаразы рықәыргылара зылшо

06.08.2015

Аибашьра аамҭазтәи акомандирцәа, Аҧсны Атәылахьчара аминистрра анапхгара, аҳәынҭқарратә ҳамҭақәа рзы акомиссиақәа аибашьра иалахәыз аҳамҭақәа ранашьара иазкыз азҵаарақәа ирылацәажәеит.

“Акомандир заҵәык иоуп аибашьҩы аҳамҭа иҭаразы иқәыргылара зылшо” - иҳәеит атәыла ахада ихаҭыҧуаҩы, аҳәынҭқарратә ҳамҭақәа рзы акомиссиа ахантәаҩы Витали Габниа аҧшьаша нанҳәа 6 рзы 1992-93 шықәсқәа раантәи акомандирцәеи Аҧсны Атәылахьчара аминистрра анапхгареи реизараҟны.

Уи иажәақәа рыла, ҳазҭагылоу аамҭазы аҳәынҭқарратә ҳамҭақәа рыҭара акырӡа иеицакны имҩаҧысуеит.

"Иарбанзаалак қәнагак, ҧҟарак ыҟаӡам абри азҵаараҟны. Уи занашьахараны иҟоу дааиуеит, аҳамҭанашьаратә бҕьыц аашьҭыхны ихы дахцәажәоит, дышфырхаҵоу иҳәоит, хәҩык ицеибашьуаз уи рнапы аҵарыҩуеит. Аибашьра иалахәызҵәҟьа, атыл аҟны иҟазгьы налаҵаны, 8 инадыркны 12 нызқь рҟынӡа шракәу аадыруеит, иахьа урҭ рхыҧхьаӡара 18 600 нызқь рҟынӡа ҟалеит, уа иалоуп ҩымчыбжьа ма ҩымш аибашьра иалахәызгьы, сгәы иаанагоит арҭ абҕьыцқәа аҵазҩыша цәырҵуеит ҳәа” – иазгәеиҭеит Габниа. Уи ишиҳәаз ала, аринахыс аибашьцәа аҳамҭақәа ранашьахоит аибашьра иалахәыз ахәҭа зегьы аныҟала.

"Ашықәс ҿыц ааиаанӡа архәҭақәа зегьы бригадала иеихаҳшоит, иаҳарбоит асиа, аграфик, иара убас иалкаау ротақәакгьы. Акомандир знык мацара Ахада Иусбарҭаҟни Атәылахьчара аинистрреи рыҟны ишьҭоу аҳамҭа анашьаразы арзаҳалқәа ықәиргылоит аибашьцәа зегьы алархәны, АИХ ишраҳауа аҳамҭа анашьара зыхәҭоу ифырхаҵарақәа ртәы иҳәоит даҧхьаны", — иаҵшьны иазгәеиҭеит В. Габниа.

Аҳамҭақәа ранашьаразы аҧҟара ҿыцқәа рылаҳәара ашьҭахь урҭ рықәыргыларазы арзаҳалқәа жәпакы шьҭахьҟа иган, иҳәеит Габниа.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT