Аҧсны Аҳәынҭқарра Ахада

 

Дмитри Шамба: «Ҳара Аконституциатә реформақәа рымҩаҧгаразы ҳазнылаз амҩа ҳацәхьаҵӡам»

31.07.2015

Жәлар Реизараҟны Ахада Имчнаӡа змоу Дмитри Шамба Аҧсны Аҳәынҭқарра Аконституциа арҽеиразы «Аҧсны Жәлар Реизара ахыҧхьаӡаратә еилазааразы» Аконституциатә закәан ахьрыдрымкалаз инамаданы иҟаиҵаз ахҳәаа.


Иацы Жәлар Реизара асессиа аилатәараҟны адепутатцәа рыбжьқәа реиҳарак змоуз Аҧсны Аҳәынҭқарра Аконституциа арҽеиразы Аконституциатә закәан апроект Аконституциатә реформазы Акомиссиа иазнархиеит насгьы уи Ахада иҟны иқәыргылан.

Ари аконституциатә рҽеира адкылара иалнаршон Аҧсны алхратә система аиҭакра, амажоритартә алхратә системаҟнытә иеилаҧсоу асистемахь аиасра.
 
Алхратә система ҳазҭагылоу аамҭазы ҳтәыла аҳәынҭқарратә шьақәгылашьа иузаҟәымҭхо иахәҭакны иалоуп, акрызҵазкуа демократиатә формоуп. 

Алхратә система аиҕьтәра – иааиҧмырҟьаӡакәа имҩаҧысуа процессуп. Аҳәынҭқаррақәа зегьы лҵшәа бзиала аус зуа, ажәлар ринтересқәа ирықәныҟәо амчхара ашьақәыргылара алзыршо, иреиҕьу алхратә сситема алхра иашьҭоуп. Аҧсынтәылагьы убри амҩа иқәуп.

Алхратә система аҧсахра атәы ҳҳәоит ҳара 10 шықәса раахыс, 2007 шықәсазы Ахада   С. Багаҧшь Апарламент ашҟа ацҳамҭа ҟаҵаны адепутатцәа рышҟа иеилаҧсоу асистемахь аиасразы ааҧхьара ҟаиҵеит.
 
Иарбоу аконституциатә ҧсахрақәа атәыла иеиуеиҧшым аполитикатә мчқәа алархәны алацәажәара мҩаҧысит, аӡәгьы даҿамгылаӡеит алхратә система аиҭакра.  

Аконституциатә закәан апроект иахьалацәажәоз Аҳәынҭқарратә ргыларазы апарламенттә еилакы аилатәара иалахәыз адепутатцәа зегьы еицҿакны ирыдгылеит аконституциатә еиҭакрақәа.

Аха убри аан, иацы Жәлар Реизара асессиа аилатәараҟны адепутатцәа маҷҩымкәа  алхратә система аҧсахра иаҿагылеит, егьырҭ  аконституциатә еиҭакрақәа ишырзыҟаз аадмырҧшӡеит абжьыҭара рҽаламырхәӡакәа.  

Убас шакәугьы, ҳара Аконституциатә реформақәа рымҩаҧгаразы ҳазнылаз амҩа ҳацәхьаҵӡам, Аҧсны аполитикатә система аиҕьтәра апроцесс аанаҳкылаӡом, иацаҳҵоит.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT