Аҧсны Аҳәынҭқарра Ахада

Аҧсны Аҳәынҭқарра Ахада Аслан Бжьаниа идҵала, Ахада ихаҭыҧуаҩ Бадра Гәынба аусуратә еилацәажәара мҩаҧигеит. Аилацәажәара азкын фымцала аиқәыршәареи изакәанымкәа акриптовалиута арҳара иаҿагыланы ақәҧареи ирызкыз азҵаатәқәа.

Аиҧылара алахәцәа азыӡырҩит Аҧсны афымцамч алшарақәеи уи ахархәара шымҩаԥысуеи ртәы иазкыз аԥыза-министр ихаҭыԥуаҩ, аекономика аминистр иҟалҵаз ажәахә. Ажәахә аҟны излазгәаҭоу ала, ҳазҭагылоу аамҭазы афымцамчы ахархәара арбагақәа идыртәоит 10млн. кВт/сааҭ, ас еиҧш иҟоу ахархәара анормақәа инарықәыршәаны, Урыстәылатәи Афедерациаҟынтә иаауа афымцамчы алшарақәа   ҳазҭоу ашықәс аӡынра-ааҧынтәи аамҭақәа реиԥш, ҭагалан-аӡынратәи аамҭақәа рызгьы иазымхар ҟалоит. Афымцамчы инамыцхәны ахархәара зыхҟьо амзыз хадақәа иреиуоуп акриптовалиута аиуразы изакәанымкәа аппаратқәа раҿакра ауп.

Ареспубликатә Еизаку Анаплакы "Амшынеиқәафымцамч" адиректор хада ин.н. Рамин Зингишвили Аҧсны араионқәа рҿы афымцамчы инамыцхәны ишныху атәы зҳәоз иажәахә ахцәажәараан Аҧыза-министр Алеқсандр Анқәаб аиҧылара иалахәыз азхьарԥшны далацәажәеит араионтә фымцацәаҳәақәа рыҟны шакәу акриптовалиута аиуразы аппаратқәеи амчхаратә трансформатқәеи ахьаҿаку. «Арадиоелектронтә хархәагақәа ирдыруеит араион аҿы ма ақалақьқәа рыҟны иҟоу аҭагылазаашьа, ибзиангьы ирдыруеит. Урҭ ишиашоу изакәанымкәа акриптовалиута арҳара иалахәуп ҳҳәаӡом, урҭ ишиашоу акәӡам ишалахәу. Ԥыҭрак ашьҭахь урҭ ишиашоу ишалахәу шьақәдырӷәӷәаргьы ҟалоит. Амшынеиқәафымцамч ада, Аҳәынҭстандарт ада акгьы ҳзыҟаҵаӡом – нормативла алшара шәымоуп анхарҭа ҩынқәа рыҟны шәнеины аԥхьаӡага мыруга аус ауоу иамуоу агәаҭаразы аппарат анаҿаку аамҭазы. Иаҳжьода, ҳхы ҳжьома? Амаининг-фермақәа змоу ирыхҟьаны ареспублика ауааԥсыра зегьы гәаҟуеит . Ари шьҭа зегьы ирбеит иаци жәаци. Алашара ааҳгеит Урыстәылантәи – акыр иахәама? Зегьы раппаратқәа аҿаркит», - иазгәеиҭеит Аҧыза-министр.

Аԥсны ауааԥсыра зегьы рзы азҵаара иамоу аҵак ду ҳасаб азуны, азыӡба рыдыркылеит изакәанымкәа акриптовалиута арҳара иаҿагыланы ақәԥаразы араионтә штабқәа русура арӷәӷәареи Аҧыза-министр хантәаҩра ззиуа Ареспубликатә штаб аԥҵареи рзы.

Ахада ихаҭыԥуаҩ Бадра Гәынба Ареспубликатә Еизаку Анаплакы "Амшынеиқәафымцамч" адиректор хада инапынҵақәа назыгӡои Аԥсны Аҳәынҭстандарт ахантәаҩи адҵа риҭеит Аԥсны Аҩныҵҟатәи аусқәа рминистрреи Аҳәынҭқарратә шәарҭадара амаҵзуреи алархәны изакәанымкәа иаҿаку амыругақәа рзы агәаҭаратә усурақәа рымҩаԥгаразы. Иара убас азинхьчаратә усбарҭақәа ирыдҵан акриптовалиута арҳаразы амыругақәа раагареи русуреи знапы алаку аиҿкаарақәеи ахаҿқәеи рхылаԥшра амҩаԥгара, иара убас асоциалтә каҭақәеи алаҳәарақәеи рылагьы убрахь иналаҵаны Аԥсны Аҳәынҭқарра адгьылҵакырахь аҭагалареи аус дыруреи хықәкы иҟаҵаны.

Аилацәажәара аиалахәын Ахада Иадминистрациа анапхгаҩы Џьансыхә Нанба, аԥыза-министр ихаҭыԥуаҩ, аекономика аминистр Кристина Озган, Аҩныҵҟатәи аусқәа рминистр Вальтер Быҭәба, Аҳәынҭқарратә шәарҭадара амаҵзура ахантәаҩы Роберт Киут, апрокурор хада Адгәыр Агрба, астандартқәеи, ахархәаратәи атехникатәи хылаԥшразы аҳәынҭқарратә еилакы ахантәаҩы Нарсоу Сангәлиа, Ареспубликатә Еизаку Анаплакы "Амшынеиқәафымцамч" адиректор хада ин.н. Рамин Зингишвили, аԥыза-министр ихаҭыԥуаҩ Дмитри Шамба.